ရေတာရှည်မြို့နယ်၊ ရေတာရှည်လေးကျေးရွာမြောက်ဘက်ထိပ်၌ ကင်းပုန်းဝပ်နေသော စစ်ကောင်စီတပ်သားသုံးဦးကို မိုင်းဆွဲတိုက်ခိုက်ခဲ့ရာ သုံးဦးစလုံးသေဆုံးကြောင်း ရေတာရှည်မြို့နယ်ပြည်သူ့ကာကွယ်ရေး တပ်ဖွဲ့ခွဲ (၂) မှ ယနေ့(ဇူလိုင် ၂)ထုတ်ပြန်သည်။
စစ်တောင်းမြစ်အရှေ့ဘက်ကမ်း၊ ပိတောက်ကုန်းကျေးရွာအုပ်စု၊ ရေတာရှည်လေးကျေးရွာ မြောက်ဖက်ထိပ် ဗျူဟာလမ်းအနောက်ခြမ်းတွင် ကင်းပုန်း၀ပ်နေသော စစ်ကောင်စီတပ်သားသုံးဦးအား ရှေ့ထွက်မိုင်းဖြင့် ဖောက်ခွဲတိုက်ခိုက်ခဲ့ခြင်းဖြစ်ကြောင်း ဖော်ပြသည်။
ယင်းတိုက်ခိုက်မှုကို သံတောင်မြောက်ပိုင်း အထူးဒေသ ဥက္ကဌဟောင်း ဦးကိုကြီး၏ ဦးဆောင်ညွှန်ကြားမှုဖြင့် သံတောင်မြောက်ပိုင်း ကာကွယ်ရေးတပ်ဖွဲ့ (NTDF)၊ တပ်ရင်းအမှတ် (၈၀၁)နေပြည်တော်ပြည်သူ့ကာကွယ်ရေး တပ်ဖွဲ့(NPT 8001)၊ ရေတာရှည်မြို့နယ် ပြည်သူ့ကာကွယ်ရေးရှားလော့တပ်ဖွဲ့(YPDF) တို့မှ ပူးပေါင်းတိုက်ခိုက်ခဲ့ခြင်းဖြစ်သည်ဟု ထုတ်ပြန် သည်။
ရေတာရှည် PDF တပ်ဖွဲ့ခွဲ (၂)သည် ပြီးခဲ့သည့် ဇွန် ၂၂ ရက်ကလည်း ရေတာရှည်မြို့နယ် ဂွေးသဲရွာသို့လာရောက်သော အင်အား ၂၀ခန့်ပါ စစ်ကောင်စီတပ်အား လက်ဦးမှုယူတိုက်ခိုက်ခဲ့ရာ စစ်ကောင်စီမှ ငါးဦးသေဆုံးခဲ့သည်။
