စစ်ကောင်စီတပ်က မင်းတပ်မြို့နယ်ရှိ ကျေးရွာအချို့ကို လေကြောင်းမှ ဗုံးကြဲချခဲ့ရာ မပေါက်ကွဲပဲ ကျန်နေသည့် ဗုံးများကို မင်းတပ် ချင်းကာကွယ်ရေးတပ်(CDF) ရဲဘော်များက ဖယ်ရှားရှင်းလင်းခဲ့ကြောင်း မင်းတပ်ဒေသခံ တစ်ဦးက အသိပေးထားသည်။
စစ်ကောင်စီတပ်သည် ဇူလိုင် ၂ရက် နံနက်က မင်းတပ်မြို့နယ် ချပ်ကျေးရွာနှင့် ဆွန်တောင်ကျေးရွာကို တိုက်လေယာဉ် ၂စီးဖြင့် ဗုံးကြဲခဲ့ရာ CDF ရဲဘော် သုံးဦး ကျဆုံးပြီး ပြည်သူလူထုများနှင့် ရဲဘော်များ စုစုပေါင်း ၁၄ဦး ဒဏ်ရာရရှိခဲ့သည်။
“အကြမ်းဖက် စကစ တပ်သားများမှ မင်းတပ်မြို့နယ်ထဲရှိ ရွာငယ်လေးကို တိုက်လေယာဉ် ၂စင်းသုံးပြီး ဗုံးမိုးရွာခဲ့စဉ် မပေါက်ကွဲသေးသည့် ဗုံးများကို CDF ပြည်သူ့ရဲဘော်များမှ အများပြည်သူ ဘေးကင်းအောင် တစ်စစီဖြုတ်ပြီး ဖယ်ရှားရှင်းလင်းကြတယ်လို့ သိရ” ဟု မင်းတပ် ဒေသခံက ဓာတ်ပုံများနှင့်တကွ ဖော်ပြသည်။
ကြီးမားသည့် ဗုံးအရွယ်အစားကို ကြည့်ရုံဖြင့် အပြစ်မဲ့ ပြည်သူများကို ရွာလုံးကျွတ် ပြုတ်အောင် ရည်ရွယ်ချက်ရှိရှိ လုပ်ဆောင်သည်ဟု မြင်ကြောင်း ရေးသားထားသည်။
