စစ်ကောင်စီဟာ ဒေါ်လာကို အေးဓားပြတိုက်နေတာလို့စီးပွားရေးအသိုင်းအဝိုင်းထုတ်ပြောလာ
နိုင်ငံခြားရှယ်ယာ ၃၅ ရာခိုင်နှုန်းအထိပါတဲ့ ပြည်တွင်းကုမ္ပဏီတွေရဲ့ နိုင်ငံခြားသုံးငွေဘဏ်စာရင်းထဲက ဒေါ်လာတွေကို မြန်မာငွေနဲ့မဖြစ်မနေ လဲလှယ်ရမယ်လို့ အာဏာသိမ်းစစ်ကောင်စီက ဇူလိုင်လ ၁၅ ရက်မှာ ကြေညာလိုက်ပါတယ်။
အဲဒီကုမ္ပဏီတွေ ဘဏ်စာရင်းထဲက ဒေါ်လာတွေကို မြန်မာငွေနဲ့လဲလှယ်နိုင်ဖို့အတွက် ကုမ္ပဏီစာရင်းကို စစ်ကောင်စီရဲ့ဗဟိုဘဏ်ဆီပေးပို့ဖို့ နိုင်ငံခြားသုံးငွေရောင်းဝယ်ဖောက်ကားခွင့်လုပ်ငန်းလိုင်စင်ရထားတဲ့ ပြည်တွင်းက ဘဏ်တွေကို စစ်ကောင်စီက ညွှန်ကြားထားပါတယ်။
စစ်ကောင်စီရဲ့ဗဟိုဘဏ်ထံ ပေးပို့ရမယ့် စာရင်းထဲမှာ နိုင်ငံခြား ရင်းနှီးမြှုပ်နှံမှု ၃၅ ရာခိုင်နှုန်းအထိရှိတဲ့ဖက်စပ် ကုမ္ပဏီရဲ့ နိုင်ငံခြားငွေ စာရင်းလက်ကျန်ကိုပါ တပါတည်း တင်ပြရမယ်လို့ပါရှိတာတွေ့ရပါတယ်။
စစ်ကောင်စီဟာ ကုမ္ပဏီပိုင် ဒေါ်လာတွေကို ကျပ်ငွေလဲလှယ်ရာမှာ အမေရိကန် ၁ ဒေါ်လာကို ကျပ် ၁၈၅၀ နှုန်းနဲ့သာလဲပေးတာလို့သိရပါတယ်။
ဒီလုပ်ရပ်ဟာ ဒေါ်လာကိုစစ်ကောင်စီက အေးဓားပြတိုက်တာလို့စီးပွားရေးအသိုင်းအဝိုင်းက သူအချို့ဟာ ဖေ့ဘွတ်ခ်လူမှုကွန်ရက်မှာ သဘောထားရေးလာကြတာတွေရှိပါတယ်။
ပြင်ပ ငွေကြေးဈေးကွက်မှာ အမေရိကန် ၁ ဒေါ်လာဟာ ကျပ် ၂၂၀၀ ကျော် ပေါက်ဈေးရှိတဲ့အတွက် နစ်နာမှုကြီးမားတယ်လို့စီးပွားရေးအသိုင်းအဝိုင်းဆီက အသံတွေထွက်လာကြပါတယ်။
ဒေါ်လာကို မြန်မာကျပ်ငွေနဲ့လဲလှယ်ဖို့ စစ်ကောင်စီက စာထုတ်ပြီး သိပ်မကြာခင်မှာပဲ နိုင်ငံခြားသား ရင်းနှီးမြှုပ်နှံမှု ၃၅ ရာခိုင်နှုန်းအထိပါဝင်တဲ့ ပြည်တွင်းကုမ္ပဏီ တွေရဲ့ ဘဏ်စာရင်းထဲက ဒေါ်လာတွေ မြန်မာကျပ်ငွေနဲ့ လဲလှယ်ခံလိုက်ရပါတယ်။
ပြည်တွင်းက စီးပွားရေးလုပ်ငန်းရှင်တစ်ဦးကဆို သူ့ကုမ္ပဏီဘဏ်အကောင့်ထဲမှာ ရှိတဲ့ အမေရိကန်ဒေါ်လာ တွေဟာ ညသန်းခေါင်မှာတင် ၁ ဒေါ်လာ ကျပ် ၁၈၅၀ နှုန်းနဲ့လဲထည့်ခံလိုက်ရတယ်လို့ ဖေ့ဘွတ်ခ်မှာရေးသားထားတာရှိပါတယ်။
ဘက်ပေါင်းစုံက အကြပ်အတည်းနဲ့ရင်ဆိုင်နေရတဲ့ စစ်ကောင်စီဟာ နိုင်ငံခြားကို ဒေါ်လာစီးမထွက်ဖို့အတွက် နည်းမျိုးစုံနဲ့ပိတ်ဆို့နေတာပါ။
စစ်ကောင်စီရဲ့လုပ်ရပ်ကြောင့် ပို့ကုန်၊သွင်းကုန်လုပ်ငန်းတွေ အခက်အခဲတွေ့စေမှာသေချာတယ်လို့ စီးပွားရေးလုပ်ငန်းရှင်တွေက ပြောဆိုထားကြပါတယ်။
