ဓာတ်ဆီပေပါ ၁၀၇လုံးတွင် ရေရောစပ်ထား၍ သုံးစွဲသူမိဘပြည်သူများ၏ ကား၊ဆိုင်ကယ်များ ပျက်စီးကြောင်း တိုင်တန်းလာသဖြင့် ဓာတ်ဆီပေပါတင်လာသည့် ကုန်တင်ယာဥ်နှစ်စီးနှင့် ယာဥ်မောင်းကိုထိန်းသိမ်းထားကြောင်း ကောလင်းမြို့နယ်ပြည်သူ့အုပ်ချုပ်ရေးအဖွဲ့ (ပအဖ)က ယနေ့(ဇူလိုင် ၁၈ ရက်) ထုတ်ပြန်သည်။
ကောလင်းခရိုင်၊ကောလင်းမြို့သို့ ဇူလိုင်၁၆ ရက်က ကုန်တင်ကားနှစ်စီးဖြင့် တင်ပို့လာသော ဓာတ်ဆီပေပါများတွင် ရေရောစပ်ထား၍ သုံးစွဲသူမိဘ ပြည်သူများ၏ ကား၊ဆိုင်ကယ်များ ပျက်စီးကြောင်းတိုင်တန်းလာသဖြင့် ကောလင်းမြို့နယ် ပြည်သူအုပ်ချုပ်ရေး (ပအဖ)၊
ကောလင်းမြို့နယ်ပြည်သူ့ကာကွယ်ရေး(ပကဖ)၊ ကောလင်းမြို့နယ် ပြည်သူ့လုံခြုံရေး(ပလဖ) တို့က အဆိုပါ ဓာတ်ဆီပေပါကိုပို့ဆောင်လာသော ကားနှစ်စီးနှင့်ယဥ်မောင်းနှစ်ဦးတို့အား ခေတ္တထိန်းသိမ်းခဲ့သည်ဟု ဆိုသည်။
နစ်နာသည့်ပြည်သူများနှင့် ကုန်သည်တို့အား ဆွေးနွေး ညှိနှိုင်းခိုင်းထားပြီး ထိန်းသိမ်းခံထားရသော ယာဥ်မှာ ၁၂ဘီးယာဥ် (4N/ 6650) နှင့် ခြောက်ဘီးယာဥ်တစ်စီး (8J / 3962)တို့ဖြစ်ကြောင်း အသိပေးသည်။
နောက်နောင်တွင်လည်း ယခုလိုအများပြည်သူအကျိုးကိုထိခိုက်အောင် လုပ်ဆောင်လာမည့် မည်သူ့ကိုမဆို ဖမ်းဆီးပြီးထိုက်သင့်သည့် ပစ်ဒဏ်များချမှတ်သွားမည်ဟု ကောလင်း (ပအဖ)က သတိပေးသည်။
မကြာသေးမီရက်ပိုင်းကလည်း ကောလင်းခရိုင်ရှိ စစ်ကောင်စီခန့် အုပ်ချုပ်ရေးမှူးများအနေဖြင့် ဇူလိုင် ၁၅ရက်နောက်ဆုံးထား၍ ရာထူးတာဝန်မှ စွန့်ခွာကြရန် ၊တာဝန်ကျရာနယ်မြေမှ စွန့်ခွာကြရန်ညွှန်ကြားလိုက်ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန ကောလင်းခရိုင်ပြည်သူ့ကာကွယ်ရေးအဖွဲ့ (ပကဖ) ကြေညာထားသည်။
ညွှန်ကြားချက်ကို လိုက်နာဆောင်ရွက်ခြင်းမပြုပါက အကြမ်းဖက်ယန္တရားတွင် ကိုယ်တိုင် ကာယကံမြောက်ပါဝင်ကာ ပြည်သူ့အသက်အိုးအိမ်စည်းစိမ်ကို နှောက်ယှက်ဖျက်ဆီးသူများဟု မှတ်ယူလျက် အကြမ်းဖက်မှုတိုက်ဖျက်ရေး ဥပဒေအပါအဝင် တည်ဆဲဥပဒေ များနှင့်အညီ ပြင်းထန်စွာ အရေးယူဆောင် ရွက်မည်ဟု ဖော်ပြသည်။
