ကိုဂျင်မီနဲ့ ကိုဇေယျာသော်တို့ကို ကွပ်မျက်လိုက်တယ်ဆိုတာထောင်အာဏာပိုင်တွေမိသားစုကိုအတည်ပြု၊ ရုပ်အလောင်းတွေထုတ်မပေး

ကိုဂျင်မီနဲ့ ကိုဇေယျာသော်တို့ကို သေဒဏ်စီရင်လိုက်တာကိုထောင်အာဏာပိုင်တွေက အတည်ပြုလိုက်ပေမယ့် ရုပ်အလောင်း ထုတ်မပေးကြောင်း မိသားစုနဲ့နီးစပ်သူတွေထံကသိရပါတယ်။

ဒီနေ့ထုတ် စစ်ကောင်စီရဲ့ သတင်းစာမှာ ကိုဂျင်မီ၊ကိုဇေယျာသော်တို့အပါအဝင်၄ ဦးကို ပြစ်ဒဏ်စီရင်ပြီးပြီဆိုတဲ့ကြေညာချက် ထုတ်ပြန်လာပါတယ်။

ဒီထုတ်ပြန်ချက်ကို ရှင်းရှင်းလင်းလင်းသိရဖို့မိသားစုဝင်တွေကဒီနေ့မနက်ပိုင်းမှာ အင်စိန်ထောင်ကိုသွားကာ ထောင်အာဏာပိုင်တွေကိုသွားရောက်မေးမြန်းခဲ့ကြပါတယ်။

မိသားစုဝင်တွေနဲ့နီးစပ်သူတစ်ဦးရေးသားချက်မှာတော့” အင်းစိန်ဒုထောင်ပိုင်ကနေ ဘယ်နေ့ လုပ်လိုက်တယ်ဆိုတာ ပြောလို့မရပါဘူး။ နောက် body သူတို့လက်ထဲမှာမရှိပါဘူး။Body ကို ပြန်ပေးဖို့ ဥပဒေမှာမရှိဘူးဆိုပြီးပြောလာတယ်။မိသားစုတွေအနေနဲ့ကတော့ ဒီဖြစ်ရပ်ကို လက်မခံဘူး” လို့ ရေးသားထားတာတွေ့ရပါတယ်။

ကိုဂျင်မီတို့ကိုကွပ်မျက်တာနဲ့ပတ်သက်ပြီး စစ်ကောင်စီရဲ့ ပြောရေးဆိုခွင့်ရှိသူက မီဒီယာတစ်ခုကိုဖြေကြားရာမှာ “သတင်းစာမှာပါတဲ့အတိုင်းပဲလို့ ” ဖြေထားပါတယ်။

စစ်ကောင်စီရဲ့သတင်းစာမှာ ကိုဂျင်မီ၊ ကိုဇေယျာသော်၊ ကိုလှမျိုးအောင်၊ကိုအောင်သူရဇော်တို့ကို ဥပဒေလုပ်ထုံးလုပ်နည်းတွေနဲ့အညီ ပြစ်ဒဏ်စီရင်ဆောင်ရွက်ပြီးစီး လို့ ကြေညာထားတာတွေ့ရပါတယ်။

ဒါပေမယ့် သေဒဏ်စီရင်တဲ့ အချိန်နဲ့ နေ့ရက် ကိုဖော်ပြထားတာမရှိပါဘူး။ သေဒဏ်မစီရင်မီ ရက်ပိုင်း ဇူလိုင်လ ၂၂ ရက်က အွန်လိုင်းကနေ တဆင့် မိသားစုနဲ့ ပေးတွေ့ခဲ့တယ်လို့သိရပါတယ်။

ဘယ်နေ့၊ဘယ်အချိန်မှာ စီရင်ခဲ့လဲဆိုတာကို မိသားစုဝင်တွေအနေနဲ့သိဖို့လိုပြီး အဖြစ်မှန်သိမှသာ မြန်မာ့ဓလေ့ထုံးစံအတိုင်း ဆောင်ရွက်စရာရှိတာတွေကို ဆောင်ရွက်နိုင်မှာဖြစ်တာကြောင့် အင်းစိန်ထောင်အရာရှိတွေနဲ့တွေ့ဆုံဖို့လိုအပ်ကြောင်း ကိုဇေယျာသော်ရဲ့မိခင်ဖြစ်သူက တောင်းဆိုထားတဲ့တောင်းဆိုစာလည်း ထွက်ပေါ်လာပါတယ်။

မြန်မာနောင်းမ် မီဒီယာရဲ့ဖော်ပြချက်မှာတော့ ဒီလိုမိသားစုနဲ့ပေးတွေ့ပြီး နောက်တစ်ရက်မနက်ပိုင်းမှာ ကြိုးပေးခဲ့တာဖြစ်ကာ ရုပ်အလောင်းတွေကို လှိုင်သာယာ ထိန်ပင်သုဿန်မှာ သဂြိဟ်ခဲ့တယ်လို့ သိရပါတယ်။