ကရင်အမျိုးသားအစည်းအရုံး(KNU) တပ်မဟာ(၅)နယ်မြေ ဖာပွန်ခရိုင်အတွင်း ဇူလိုင်လက တိုက်ပွဲ ၁၁၀ ကြိမ်ဖြစ်ခဲ့ပြီး စစ်ကောင်စီတပ်ဖွဲ့ဝင် ၈၈ဦး သေဆုံးခဲ့ကြောင်း KNU တပ်မဟာ(၅)က သတင်း ထုတ်ပြန်သည်။
ဇူလိုင် ၁ရက်မှ ဇူလိုင် ၃၁ရက်အထိ တစ်လအတွင်း ကရင်အမျိုးသား လွတ်မြောက်ရေးတပ်မတော် (KNLA) တပ်မဟာ(၅)နှင့် စစ်ကောင်စီတပ်၊ စစ်ကောင်စီလက်ပါးစေ နယ်ခြားစောင့်တပ်(BGF) တို့ အကြား တိုက်ပွဲဖြစ်စဉ် များကို ဖော်ပြခဲ့ခြင်းဖြစ်သည်။
တိုက်ပွဲပေါင်း ၁၁၀ ကြိမ်ဖြစ်ပွားခဲ့ရာ စစ်ကောင်စီတပ်နှင့် BGF တပ်ဖွဲ့ဝင် ၈၈ဉီးသေဆုံးပြီး ၅၇ဦး ထိခိုက်ဒဏ်ရာရခဲ့ကြောင်း တပ်မဟာ(၅)က ထုတ်ပြန်သည်။
စစ်ကောင်စီတပ်မှ သေဆုံးခဲ့သူများအနက် ဗိုလ်တစ်ဦး ပါဝင်ကြောင်း၊ဒဏ်ရာရသူများတွင် တပ်ရင်းမှူး တစ်ဦးနှင့် တပ်ကြပ်ကြီး တစ်ဦး ပါဝင်ခဲ့ကြောင်း ဖော်ပြထားသည်။
တိုက်ပွဲများအတွင်း စစ်ကောင်စီ၏ ထောက်ပံ့ပို့ဆောင်ရေးမြင်းလား (၈)ကောင်သေဆုံးကာ (၅)ကောင်ဒဏ်ထိခိုက်အနာတရ ရရှိသွားကြောင်း၊ စစ်ကောင်စီ၏ စစ်လက်နက်နှင့်ကျည်ဆံများ သယ်ဆောင်သည့် စစ်ကားတစ်စီးကိုလည်း ဖျက်ဆီးနိုင်ခဲ့ကြောင်း အသိပေးထားသည်။
ဇူလိုင် တိုက်ပွဲများ၌ KNU ဘက်က စစ်သည် ၉ဦး ဒဏ်ရာရခဲ့ပြီး ကျဆုံးသူမရှိဟု ဆိုသည်။
တိုက်ပွဲများဖြစ်ပွားတိုင်း အကြမ်းဖက်စစ်ကောင်စီဖက်မှ အမြောက်လက်နက် ကြီးများ အများအပြားအသုံးပြုကာ အပြစ်မဲ့ပြည်သူများနေထိုင်ရာကျေးရွာနှင့် လုပ်ငန်းခွင်များ အတွင်း အကြောင်းမဲ့ ပစ်ခတ်မှုများ ပြုလုပ်ခဲ့၍ အရပ်သား ပြည်သူ ၂ဦး သေဆုံးကာ ၅ဦး ထိခိုက်ဒဏ်ရာ ရခဲ့ကြောင်း ဖော်ပြထားသည်။
