မိုးဗြဲမြို့တွင် အကြမ်းဖက်စစ်ကောင်စီတပ်နှင့် တိုက်ပွဲပြင်းထန်နေကြောင်း မိုးဗြဲပြည်သူ့ကာကွယ်ရေးတပ်(MBPDF)က ယနေ့ ညပိုင်းတွင် ထုတ်ပြန်သည်။
အကြမ်းဖက်စစ်ကောင်စီတပ်က မိုးဗြဲမြို့ပေါ် လူနေရပ်ကွက်အတွင်းသို့ လက်နက်ကြီးများဖြင့် ပစ်ခတ်မှုရှိသည်ဟုလည်း အသိပေးထားသည်။
ထို့ကြောင့် ပြည်သူများအနေဖြင့် လုံခြုံစိတ်ချရသောနေရာတွင် နေပေးကြရန် MBPDF က တိုက်တွန်းသည်။
“ပြီးခဲ့တဲ့ နာရီဝက်( ည ၉နာရီခွဲခန့်)က လက်နက်ကြီးသံတွေကြားတယ်။အခုတော့ ငြိမ်နေ တယ်”ဟု မိုးဗြဲမြို့ခံတစ်ဦးက People’s Springသို့ ပြောသည်။
ဇူလိုင် တတိယပတ်ကစ၍ အကြမ်းဖက်စစ်ကောင်စီတပ်က မိုးဗြဲမြို့ကို ထိန်းချုပ်ရန်ကြိုးပမ်းနေ ကြောင်း ဒေသခံစစ်ရေးသတင်း ရင်းမြစ်များက အသိပေးထားသည်။
စစ်ကောင်စီတပ်က ဝါရီဆူးပလိုင်၊ နန်းမယ်ခုံ၊ ကျွန်းတော၊ဒေါကမီး၊ ပူဖားနှင့် ဒေါငံခါး တကြောလုံးကို စစ်ရေးအရထောက်ပို့ နိုင်ရန် မိုးဗြဲ မြို့ကို စနစ်တကျ အထိုင်ချနိုင်ရန် စစ်ထိုးနေခြင်းဟု ဆိုသည်။
