ဖားကန့်တွင်စစ်ကောင်စီတပ်က ဒေသခံများထံမှ လိုင်စင်မဲ့ကားများကို သိမ်းယူပြီး လိုင်စင်ပြန်လုပ်၍ ရောင်းပြီးငွေရှာနေကြောင်း ဒေသခံများကပြောသည်။
လိုင်စင်မဲ့ကားများစွာရှိသည့်ဖားကန့်တွင် နိုဝင်ဘာလမှစ၍ စစ်ကောင်စီတပ်က ဒေသခံများ၏လိုင်စင်မဲ့ကားများကို စီမံချက်ဖြင့်လိုက်လံ ဖမ်းဆီးခဲ့သည်။ဖမ်းဆီးထားသော ကားအစီးရေ တစ်ရာထက်မနည်းရှိပြီး စစ်ကောင်စီက ထိုကားများကို လိုင်စင်လုပ်၍ ပြန်ရောင်းနေခြင်းဖြစ်ကြောင်းဒေသခံများကပြောသည်။
“လေကြောင်းကနေ လာတိုက်တော့ ကုန်တဲ့ စရိတ်တွေ ဒီမှာ ပြန်ရှာခိုင်းနေတယ်ကြားတယ်။ ဖမ်းသွားတဲ့ ကားတွေ လိုင်စင်ဝင်ပြီး ပြန်ရောင်းနေတယ်။ တော်တော် ရုပ်ပျက်
ဆင်းပျက်ဖြစ်နေပြီ” ဟု စစ်အာဏာရှင်ဆန့်ကျင်ရေးလှုပ်ရှားနေသောဖားကန့်ဒေသခံတစ်ဦးကပြောသည်။
စစ်ကောင်စီတပ်သည် ဖားကန့်တွင် ဒေသခံများ၏လိုင်စင်မဲ့ကားများကိုဖမ်းဆီးသောအခါ ကြမ်းကြမ်းတမ်းတမ်းပြုလုပ်ခဲ့သည်ဟု ဒေသခံအချို့ကပြောသည်။
“ဘုရားကျောင်းတက်နေချိန် ကျောင်းထဲကကားတွေဝင်ဖမ်းတယ်။ တော်တော်လေးကို ဒုက္ခရောက်တယ်။ ပြည်သူ့ကို ဒုက္ခပေးဖို့ပဲသိတဲ့ စစ်အာဏာရှင်ပဲ” ဟု ကားသိမ်းဆည်းခံရသူတစ်ဦးကပြောသည်။
စစ်ကောင်စီကလိုင်စင်လုပ်ပြီး လက်သိပ်ထိုးရောင်းချသည့် ကားများကို ဒေသခံများကမဝယ်ကြဟုလည်းသိရသည်။ ထို့ကြောင့် ဖားကန့်ဒေသ ပြင်ပသို့ လိုက်လံရောင်းချနေသည်ဟု ဒေသတွင်း စီးပွားရေးလုပ်ငန်းရှင်တစ်ဦးကပြောသည်။
ဖားကန့်တွင် ယခုရက်ပိုင်း တိုက်ပွဲမဖြစ်ပွားဘဲ ငြိမ်သက်နေသည်။ မှော်ပုံကျေးရွာတွင်KIA ၊ PDF ပူးပေါင်းအဖွဲ့နှင့် စစ်ကောင်စီသည် ဒီဇင်ဘာလ ၅ရက် ညမှ ဒီဇင်ဘာလ ၇ ရက်အထိည တိုက်ပွဲဖြစ်ခဲ့သည်။
