ရှမ်းပြည်နယ် မြောက်ပိုင်း ၊နမ့်ဆန်မြို့နယ် ၊ ကုန်းသာရွာ တဝိုက်မှာ စစ်ကောင်စီတပ်နဲ့ TNLA တို့ကြားဖြစ်ပွားတဲ့တိုက်ပွဲတွေကြောင့် ဘေးလွတ်ရာကိုတိမ်းရှောင်နေရသူ စစ်ဘေးရှောင် ၁,၀၀၀ ဝန်းကျင်ဟာ နေရပ်မပြန်နိုင်သေးကြောင်း ကူညီကယ်ဆယ်ရေးလုပ်ဆောင်နေသူတွေက ပြောပါတယ်။
တိုက်ပွဲဟာ ဒီဇင်ဘာ ၇ ရက်ကစတင်ပြီး တစ်ပတ်ကြာ ဖြစ်ပွားခဲ့တာကြောင့် ကုန်းသာ၊မန်လုံး၊ ဟူးမန်း၊ဆာမ်ငမ်၊ပန်းအလောက်နဲ့ ပိန်းလုံးရွာခံတွေဟာ နမ့်ဆန်မြို့ပေါ်ကိုလာရောက်တိမ်းရှောင်ခဲ့ကြရပါတယ်။
![စစ်ကောင်စီတပ်နဲ့ TNLA ကြားတိုက်ပွဲကြောင့် ဒေသခံ ၁,၀၀၀ ကျော် နေရပ်မပြန်နိုင်သေး](https://i0.wp.com/www.ludunwayoo.com/wp-content/uploads/2022/12/320172136_1341339276721614_3008590329655902402_n.jpg?resize=880%2C587&ssl=1)
လက်ရှိမှာတော့ တိုက်ပွဲပြီးသွားလို့ အချို့လည်းနေရပ်ပြန်နေကြပါတယ်။
တိုက်ပွဲအဓိက ဖြစ်ပွားတဲ့ ကုန်းသာရွာကတော့ ပြန်လည်ထူထောင်ရေးလုပ်ဖို့လိုတယ်လို့ ကုန်းသာရွာဒေသခံတွေကပြောပါတယ်။
“အကုန်လုံးနီးပါးပျက်စီးသွားတယ်၊ လက်နက်ကြီးတွေထိပြီး လုံးဝနေလို့မဖြစ်တော့တာ” လို့ ကုန်းသာရွာသားတစ်ဦးကပြောပါတယ်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
ကုန်းသာရွာမှာ လူနေအိမ် ၉လုံးမီးလောင်ပြာကျပြီး၊ နေအိမ်၄၀ကျော် လက်နက်ကြီးထိမှန်ပျက်စီးသွားတယ်လို့ ဆိုပါတယ်။
ဟူးမန်းရွာကတော့ နယ်မြေလုံခြုံရေးအခြေအနေနဲ့ သွားလာရေးအခက်အခဲကြောင့် နေရပ်မပြန်နိုင်ကြသေးဘူးလို့သိရပါတယ်။
နေရပ်မပြန်နိုင်သေးတဲ့စစ်ရှောင်တွေအတွက် လာရောက်ကူညီသူတွေရှိသလို အချို့မှာလည်း လိုအပ်ချက်ရှိနေသေးတယ်လို့ သိရပါတယ်။
ဒီနေ့ ဒီဇင်ဘာလ ၁၉ရက်အထိ နမ့်ဆန်မြို့ပေါ် ဇယန်းကြီးကျောင်း၊ မန်လုံနဲ့ မန်ဖတ်တို့မှာ စစ်ရှောင် ၁,၀၀၀ကျော် ရှိနေသေးပါတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)