မကွေးတိုင်း၊ ရေစကြိုမြို့နယ်တွင် နိုဝင်ဘာနှင့် ဒီဇင်ဘာအတွင်း ကျေးရွာ ၁၂ရွာရှိ နေအိမ်ပေါင်း ၁၆၂လုံးမီးရှိ့ဖျက်ဆီးခံခဲ့ရကြောင်း ရေစကြိုမြို့နယ် ပြည်သူ့အုပ်ချုပ်ရေးအဖွဲ့က သတင်းထုတ်ပြန်သည်။
ရေစကြိုမြို့နယ်တွင် နိုဝင်ဘာအတွင်းနှင့် ဒီဇင်ဘာ ၂၆ရက်အထိကာလအတွင်း စစ်ကောင်စီတပ်၏ စစ်ကြောင်းထိုးဖျက်ဆီးမှုကြောင့် ကျေးရွာ ၁၂ရွာရှိ နေအိမ်ပေါင်း ၁၆၂လုံးကို မီးရှို့ဖျက်ဆီးခဲ့ကြကြောင်း ရေစကြို(ပအဖ)က အသိပေးသည်။
![မီးရှိူ့ခံရသော ထန်းပင်ချောင်းနှင့် ရွာသာအေး ကျေးရွာတို့အား တွေ့ရစဥ်၊ဓာတ်ပုံ - CJ](https://i0.wp.com/www.ludunwayoo.com/wp-content/uploads/2022/12/321767232_896572024715120_4550471341113109676_n.jpg?resize=720%2C324&ssl=1)
![မီးရှိူ့ခံရသော ထန်းပင်ချောင်းနှင့် ရွာသာအေး ကျေးရွာတို့အား တွေ့ရစဥ်၊ဓာတ်ပုံ - CJ](https://i0.wp.com/www.ludunwayoo.com/wp-content/uploads/2022/12/321359145_932435147689895_8311974461457047412_n.jpg?resize=720%2C341&ssl=1)
![မီးရှိူ့ခံရသော ထန်းပင်ချောင်းနှင့် ရွာသာအေး ကျေးရွာတို့အား တွေ့ရစဥ်၊ဓာတ်ပုံ - CJ](https://i0.wp.com/www.ludunwayoo.com/wp-content/uploads/2022/12/321198908_3453580364916041_7544940057917688626_n.jpg?resize=720%2C405&ssl=1)
![မီးရှိူ့ခံရသော ထန်းပင်ချောင်းနှင့် ရွာသာအေး ကျေးရွာတို့အား တွေ့ရစဥ်၊ဓာတ်ပုံ - CJ](https://i0.wp.com/www.ludunwayoo.com/wp-content/uploads/2022/12/321834017_566068512198341_2476698548518075040_n.jpg?resize=720%2C540&ssl=1)
ထို့အပြင် စစ်ကောင်စီတပ်က စစ်ကြောင်းထိုးရာကျေးရွာများရှိ ပြည်သူပိုင် ပစ္စည်းဥစ္စာများကို ခိုးယူ လုယက်ယူဆောင်ခြင်း၊ အိမ်မွေးတိရစ္ဆာန်များကို သတ်ဖြတ်ချက်ပြုတ်စားသောက်ခြင်း၊ အပြစ်မဲ့ပြည်သူများကို လူသားဒိုင်းအဖြစ် ဖမ်းဆီးခေါ်ဆောင်ခြင်းစသော စစ်ရာဇဝတ်မှုများကျူးလွန်လုပ်ဆောင်ခဲ့ကြကြောင်း ရေစကြို(ပအဖ)အဖွဲ့က ဆိုသည်။
![မီးရှိူ့ခံရသော ထန်းပင်ချောင်းနှင့် ရွာသာအေး ကျေးရွာတို့အား တွေ့ရစဥ်၊ဓာတ်ပုံ - CJ](https://i0.wp.com/www.ludunwayoo.com/wp-content/uploads/2022/12/320019179_626752159207594_5278087963581316222_n.jpg?resize=720%2C540&ssl=1)
စစ်ကောင်စီတပ်ဖွဲ့ဝင်များသည် ဒီဇင်ဘာ ၉ရက် မွန်းလွဲပိုင်းကလည်း ရေစကြိုမြို့နယ်၊ ပခန်းငယ်ရွာကို ပျူစောထီးအဖွဲ့များနှင့် ဝင်ရောက်ပစ်ခတ်ကာ နေအိမ် ငါးလုံးကိုဖျက်ဆီးခဲ့ကြောင်း၊ နေအိမ်များထဲရှိ ပြည်သူပိုင်ပစ္စည်းဥစ္စာများကို ခိုးယူလုယက် ယူ ဆောင်သွားခဲ့ကြကြောင်း ရေစကြို(ပအဖ)အဖွဲ့၏ ထုတ်ပြန်ချက်တွင် ဖော်ပြသည်။
မီးရှို့ဖျက်ဆီးခြင်းခံခဲ့ရသော မီးဘေးသင့် မိဘပြည်သူများအား ထောက်ပံ့ကူညီ လှူဒါန်းမှုများပြုလုပ်နိုင်ရန် ဆောင်ရွက်နေကြောင်း သတင်းရရှိသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)