စစ်ကိုင်းတိုင်း၊ စစ်ကိုင်းမြို့နယ်ရှိ ကျေးရွာ သုံးရွာကို စစ်ကောင်စီတပ်က ဝင်ရောက်ဖျက်ဆီးမီးရှို့ခဲ့ပြီး ဒေသခံ ရွာသားနှစ်ဦးကို သတ်ဖြတ်သွားခဲ့ကြောင်း ဒေသတွင်း သတင်းရင်းမြစ်များက ပြောသည်။
ဒီဇင်ဘာ ၂၃ ရက် မွန်းလွဲ ၁၂ နာရီခွဲခန့်က စစ်ကိုင်းမြို့နယ် ဆားတောင်မြို့၊ သိမ်ချောင်းကျေးရွာဘုရားငါးဆူ၌ တပ်စွဲစခန်းချထားသည့် စစ်ကောင်စီတပ်က ဝင်ရောက် မီးရှို့ခဲ့ရာ ရွာလုံးကျွတ်နီးပါး မီးလောင်ကျွမ်းပျက်စီးခဲ့ကြောင်း ဒေသခံများက ပြောသည်။
ညနေ ၄ နာရီခန့်တွင် ထန်းတောကုန်းရွာ၊ ည ၇ နာရီခန့်တွင် ဂူကြီးကုန်းရွာရှိ နေအိမ်များကို ထပ်မံမီးရှို့ခဲ့ကြကြောင်း၊ ပျက်စီးအိမ်ခြေအတိအကျမသိရသေးကြောင်း နယ်ခံများက ပြောသည်။
ထို့အပြင် ဖမ်းဆီးခံရသူများလည်းရှိနေပြီး ဂူကြီးကုန်း ရွာသားနှစ်ဦးလည်း ပစ်ခတ်သတ်ဖြတ်ခံခဲ့ရကြောင်းစစ်ကိုင်းမြို့နယ် သတင်းမှန်ပြန်ကြားရေးက ပြောသည်။
“ကားလမ်းဘေးအိမ်တွေကို စာရင်းနဲ့ရှို့သွားတာဖြစ်ပါတယ်။ ကားတာယာတွေနဲ့ မလောင်မချင်း မီးရှို့ခဲ့ကြတာပါ။ ကားလမ်းနဲ့ဝေးပြီးမီးရှို့မခံရတဲ့အိမ်တွေကတော့ အိမ်ထောင်ပရိဘောဂ၊ ဗီရို၊ ကြောင်အိမ်၊ ရေခဲသေတ္တာ ၊ တီဗွီ အားလုံးရိုက်ခွဲဖျက်ဆီးတာခံရပါတယ်။”ဟု စစ်ကိုင်းမြို့နယ် သတင်းမှန်ပြန်ကြားရေးက ပြောသည်။
ထို့နောက် ည ၈နာရီခွဲခန့်တွင် စစ်ကောင်စီ စစ်ကြောင်းသည် ဆားတောင်မြို့၏ အရှေ့ဘက်ရှိ ၎င်းတို့တပ်စွဲရာ ညောင်ငုပ်တိုရွာကို ဝင်ရောက်သွားကြောင်း ဒေသခံများက ပြောသည်။
စစ်ကောင်စီတပ်သည် ဒီဇင်ဘာ၂၁ ရက်ကလည်း စစ်ကိုင်းမြို့နယ်၊ မိုးသောက်(ဘောက်သောက်) ကျေးရွာအုပ်စု၊ လင်းယဉ် ၅ ရွာသို့ စစ်ကောင်စီတပ် ဝင်ရောက်ကာ မိုးသောက်ရွာမှ နေအိမ်၂၅၀ ၊ လင်းယဥ်ရွာမှ နေအိမ်၁၅၀၊ လင်းယဉ်ရွာသစ်မှ နေအိမ် ၁၃၀ ၊ ရှမ်းကုန်းရွာမှ နေအိမ် ၁၄၈ ၊ ကုန်းကြီးရွာမှ နေအိမ် ၅၁ လုံး စုစုပေါင်း လူနေအိမ် ၇၂၉လုံးကို တပ်မ (၃၃) စစ်ကောင်စီ စစ်ကြောင်းက မီးရှို့ဖျက်ဆီးခဲ့သည်။ ထို့အပြင် သက်ကြီးရွယ်အိုများအပါအဝင် ဒေသခံ ပြည်သူ သုံးဦးကို သတ်ဖြတ်သွားခဲ့သည်။
