စစ်ကိုင်းတိုင်း၊ ဒီပဲယင်းမြို့နယ်အခြေစိုက် ဂဠုန်တပ်တော် PDF အဖွဲ့၏ လက်နက်ခဲယမ်းဂိုဒေါင် မီးလောင်ကျွမ်းခဲ့ရာ လက်နက်ခဲယမ်းများအပါအဝင် ကျပ်သိန်း ၃,၀၀၀ခန့် ဆုံးရှုံးခဲ့ကြောင်း ၎င်းအဖွဲ့က သတင်းထုတ်ပြန်သည်။
ယမန်နေ့ (မတ်လ ၂၂ ရက်) နံနက် ၆နာရီခန့်က ယမ်း၊မိုင်းနှင့် လက်နက်ပစ္စည်းများထားရှိသောဂိုဒေါင်သည် ယမ်းအမျိုးအစား အပူအအေးမမျှတခြင်းကြောင့် ယမ်းမတည့်၍ စတင်ပေါက်ကွဲ လောင်ကျွမ်းခဲ့ကြောင်း ဂဠုန်တပ်တော်က အသိပေးသည်။
ရဲဘော်များ PTပြေးနေချိန်တွင် ဖြစ်ပွားခဲ့ခြင်းဖြစ်ပြီး မီးလောင်ကျွမ်းမှုကြောင့် ယမ်းများ၊ မိုင်းများ၊ လက်နက်များ(လက်နက်ငယ်များအပါအဝင် လက်နက်ကြီးပြောင်းများ၊အဖူးများ)၊ တဲ သုံး လုံး၊ ရဲဘော်များ၏ဖုန်း ၁၀လုံးခန့် ၊ အ၀တ်စားများ ၊စောင်များ ၊ ဖိနပ်များနှင့် အထွေထွေအသုံးအဆောင်အားလုံး ဆုံးရှုံးခဲ့ကြောင်း၊ စုစုပေါင်း ဆုံးရှုံးမှုတန်ဖိုး ကျပ်သိန်း ၂,၉၀၀ မှ ၃,၀၀၀ ကြား ရှိကြောင်း ဂဠုန်တပ်တော်၏ ထုတ်ပြန်ချက်တွင် ဖော်ပြသည်။
တော်လှန်ရေးရဲဘော်များ ထိခိုက်မှုမရှိခဲ့သော်လည်း အားလုံးသောထောက်ပို့ ပြည်သူတို့၏ ချွေးနဲစာဖြင့် ထောက်ပံ့ကူညီထားသော ပစ္စည်းများဖြစ်၍ များစွာစိတ်မကောင်းဖြစ်ရကြောင်း ဂဠုန်တပ်တော်က ဆိုသည်။
ဖြစ်စဥ်နှင့်ပတ်သက်၍ ဂဠုန်တပ်တော်ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
ပြည်သူများအနေဖြင့် ဂဠုန်တပ်တော် ရှေ့ဆက်တော်လှန်နိုင်ရန်နှင့် လက်နက်၊ခဲယမ်းများပြန်လည် ထုတ်လုပ်၊စုဆောင်းနိုင်ရန်အတွက် တတ်နိုင်သည့်ဘက်ပေါင်းစုံမှ ကူညီထောက်ပံ့ပေးကြပါရန် ဂဠုန်တပ်တော် (ဒီပဲယင်း)က မေတ္တာရပ်ခံထားသည်။
