စစ်ကိုင်းတိုင်း၊ တန့်ဆည်နှင့် ရွှေဘိုမြို့နယ်တို့တွင် စစ်ကောင်စီတပ်လက်အောက်ခံ ပျူစောထီးများအား မိုင်းဆွဲတိုက်ခိုက်ရာ ပျုအဖွဲ့ဝင် လေးဦးသေဆုံးကြောင်း ဒေသတွင်း PDFအဖွဲ့များက ပြောသည်။
ယမန်နေ့ (ဧပြီ ၉ ရက်) နံနက် ၉နာရီခွဲခန့်က တန့်ဆည်မြို့နယ်၊ ဆင်ငယ်ကျေးရွာမှ မြို့ပေါ်လမ်းဆုံဘက်သို့ ကူးလာသော ပျူစောထီးများအား အသင့်ဆင်ထားသောမိုင်းများဖြင့် ဖောက်ခွဲတိုက်ခိုက်ခဲ့ရာ တစ်ဦးသေဆုံးခဲ့ကြောင်း Guerrilla Warfare- K.P.K အဖွဲ့က ပြောသည်။
“မိုးကာစနဲ့ လိပ်သယ်သွားတယ်။ ကျန်တဲ့ပျူတွေလည်း အထိအခိုက်ရှိနိုင်တယ်။”ဟု Guerrilla Warfare- K.P.K အဖွဲ့ တာဝန်ရှိသူက ပြောသည်။
“ဧပြီ ၈ ရက်နေ့နံနက် ၁၀နာရီဝန်းကျင်ခန့်က ရွှေဘိုမြိုနယ်၊ မြင်းစီးပျူကျေးရွာမှ ပျူခေါင်းဆောင်ဌေးအောင်၏ တပည့်များ သုံးဘီးဖြင့်ထွက်လာစဉ် မြို့လှရွာ ကြက်ခြံအနီးအရောက်တွင် ပဒေသာမိုင်းဖြင့် မိုင်းဆွဲတိုက်ခိုက်ခဲ့ကြောင်း၊ ထိုတိုက်ခိုက်မှုကြောင့် ဌေးအောင်၏ တပည့်ရင်း ပျူတင်ဌေးအပါအဝင် ပျူသုံးဦးပွဲချင်းပြီး သေဆုံးကြောင်း DOG KILLER – SHWEBO(LPDF) အဖွဲ့တာဝန်ရှိသူက ပြောသည်။
“သုံးဘီးနဲ့ အလောင်းသုံးလောင်းကိုတင်ပြီး မောင်းနေတုန်း မအလောင်းတစ်လောင်းနဲ့ သေနတ်တွေပါ ကျကျန်ရစ်တာကို မကောက်ဘဲ ထွက်ပြေးသွားတယ်။ သေနတ်ကောက်ဖို့ကြိုးစားပေမယ့် သီးလုံးနဲ့ ဇီးဖြူကုန်းရွာက စစ်သားတွေ နှစ်ဖက်ညှပ်လာလို့ ပြန်ဆုတ်ခဲ့တတယ်။”ဟု DOG KILLER – SHWEBO(LPDF) အဖွဲ့တာဝန်ရှိသူက ပြောသည်။
တန့်ဆည်နယ် စစ်ဆင်ရေးကို Guerrilla Warfare- K.P.K၊ TSR၊ MDF-Taze Tiger၊ PLA၊ မြောက်ပိုင်းတိုက်နယ်ပကဖနှင့်အံ့ဘွားစွန်ရဲအဖွဲ့တို့ကလည်းကောင်း၊ ရွှေဘိုနယ်စစ်ဆင်ရေးကို DOG KILLER – SHWEBO(LPDF)အဖွဲ့ ၊ ဗိုလ်ကျားရိုင်း – ရွှေဘို (LPDF) အဖွဲ့၊မင်းဂေါင် – SHWEBO (LDF)အဖွဲ့၊ ဗိုလ်ဂျပန်ကြီး(
.T)- SHWEBO (LPDF)အဖွဲ့ ၊ တောင်သူကြီးများအဖွဲ့ -LDF၊ဖားရွှေကျော် – ဒီပဲယင်း ပြည်သူ့ကာကွယ်ရေးတပ်ဖွဲ့၊မတစ်ထောင်( တစ်ကောင်ဘွား ) – ဒီပဲယင်းအဖွဲ့နှင့် ရွှေဘိုမြို့နယ် တိုက်နယ်-၂ မဟာမိတ်အင်အားစုများကလည်းကောင်း တိုက်ခိုက်ခဲ့ကြောင်း အသိပေးထားသည်။
ရွှေဘိုနှင့် တန့်ဆည်နယ်များတွင် စစ်ကောင်စီတပ်လက်အောက်ခံ ပျူရွာအချို့ရှိပြီး စစ်အုပ်စုက လက်နက်ပါတပ်ဆင်ပေးထားပြီးနောက် ၎င်းတို့က ဒေသခံများအား ဖမ်းနှိပ်စက်သတ်ဖြတ်ခြင်း၊ ကျေးရွာများအား မီးရှို့ဖျက်ဆီးခြင်းများ ပြုလုပ်နေသည်။
