ရှမ်းပြည်နယ်မြောက်ပိုင်း သီပေါမြို့မှ ရဲစခန်း၊ ထွေအုပ်ရုံးအပါအဝင်စစ်ကောင်စီစခန်းများကို မဟာမိတ်ပူးပေါင်းတပ်ဖွဲ့များက ထိုးစစ်ဆင်တိုက်ခိုက်နေပြီး သီပေါထောင်လည်း ပွင့်သွားပြီဟု ကနဦးသတင်းရရှိသည်။
သီပေါမြို့တွင် ယနေ့ နံနက်အစောပိုင်းမှာစ၍ တအာင်းအမျိုးသားလွတ်မြောက်ရေးတပ်မတော်(TNLA) နှင့် မဟာမိတ်တပ်များက စစ်ကောင်စီစခန်းများကိုတိုက်ခိုက်ခြင်းဟု မြို့ခံအချို့ကပြောသည်။
![](https://i0.wp.com/www.ludunwayoo.com/wp-content/uploads/2024/08/1027-p2_1-1.jpg?resize=675%2C1080&ssl=1)
“သီပေါထောင်ပါ ပွင့်သွားပြီဗျ။ အကျဉ်းသားတွေကို မဟာမိတ်က လွှတ်ပေးနေတယ်။ ရဲစခန်း၊ထွေအုပ်ရုံးတွေရပြီလို့လည်းကြားတယ်။ လေကြောင်းကြောက်လို့ အပြင်မထွက်ရဲလို့ တိတိကျကျမသိရသေးပါဘူး” ဟု ဒေသခံတဦးကပြောသည်။ သီပေါထောင်ပွင့် သည်ဆိုသောသတင်းကို People’s Spring ကသီးခြားအတည်မပြုနိုင်သေးပေ။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
စစ်ကောင်စီတပ်ဖွဲ့ဝင်အများအပြား ထွက်ပြေးနေပြီး မဟာမိတ်တပ်ဖွဲ့များက လိုက်လံတိုက်ခိုက်နေကြောင်း၊ စစ်ကောင်စီကလည်း သီပေါမြို့နယ်ပတ်ဝန်းကျင်ကျေးရွာအချို့ကို လေကြောင်းမှတိုက်ခိုက်နေကြောင်း သတင်းရရှိသည်။
တော်လှန်ရေးတပ်ဖွဲ့များသည်သီပေါမြို့ရှိ တောင်ခမ်းအမြောက်တပ်ကိုလည်း ထိုးစစ်ဆင်တိုက်ခိုက်နေပြီး စစ်ကောင်စီကလည်း လက်နက်ကြီးများပစ်ခတ်နေကြောင်း ဒေသခံများကပြောသည်။
![](https://i0.wp.com/www.ludunwayoo.com/wp-content/uploads/2024/08/454856801_831604349038359_736168216173919236_n.jpg?resize=880%2C493&ssl=1)
တိုက်ပွဲအတွင်း လက်နက်ကြီးထိမှန်၍ အရပ်သားတစ်ဦးသေဆုံးကြောင်း သတင်းရရှိထားသည်။ ဒေသခံအများအပြားသည် နေအိမ်များနှင့် ဘုန်းကြီးကျောင်းအချို့၌ခိုလှုံနေကြကြောင်းသိရသည်။
သီပေါမြို့ရှိ နောင်တော်၊ယာပြင်၊မဲပုတ်ကျေးရွာတို့တွင်လည်း တိုက်ပွဲဖြစ်ပွားနေကြောင်းသတင်းရရှိသည်။
သီပေါမြို့သည် ကိုးကန့်တပ်မတော်(MNDAA)ထိန်းချုပ်ထားသည့်လားရှိုးမြို့ နှင့် TNLA ထိန်းချုပ်ထားသည့် ကျောက်မဲမြို့ကြား၌တည်ရှိသည်။
ယနေ့ (သြဂုတ် ၁၀ ရက်) နေ့လယ်ပိုင်းတွင် သီပေါမြို့ပေါ်၌ တိုက်ပွဲပြန်လည်ငြိမ်သက်နေပြီး ရွာအချို့၌ ဆက်လက်ဖြစ်ပွားနေသည်ဟု ဒေသခံအချို့ကပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)