ဇေအောင်/People’s Spring
စစ်ကိုင်းတိုင်း၊ ဆားလင်းကြီးမြို့နယ်တွင် စစ်ကောင်စီတပ်၏ လက်နက်ကြီးဖြင့် ပစ်ခတ်တိုက်ခိုက်မှုကြောင့် ကလေးတစ်ဦး ထိမှန်ကာ ခြေတစ်ဖက်ဖြတ်လိုက်ရပြီး အမျိုးသမီးတစ်ဦး လည်းထိမှန်ပြီး အသက်အန္တရာယ် စိုးရိမ်ရကြောင်း ဒေသခံများက ပြောသည်။
သြဂုတ် ၂၃ ရက် နေ့လယ် ၁နာရီ၁၅မိနစ်ခန့်က မုံရွာမြို့၊ ညောင်ပင်သာစစ်တပ်ဂိတ်စခန်းမှ ၁၂၀မမ လက်နက်ကြီးဖြင့် လေးလုံးဖြင့် ချင်းတွင်းမြစ်အနောက်ဘက် ကျေးရွာများသို့ ပစ်ခတ်ခဲ့သည်။
လက်နက်ကြီး နှစ်လုံးမှာ ဖောင်းကတာကျေးရွာအတွင်း ကျရောက်ပေါက်ကွဲပြီး ၆တန်းကျောင်းသူကလေးငယ်တစ်ဦး ပေါင်ထိမှန်ပြီး ခြေထောက်တစ်ဖက်ဆုံးရှုံးခဲ့ကြောင်း ချင်းတွင်းမြစ်ကမ်းဘေးကျေးရွာများသပိတ်ကော်မတီ၏ ပြန်ကြားရေးတာဝန်ခံက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
ထို့အပြင် အသက်(၄၀)ကျော် အမျိုးသမီးတစ်ဦးလည်း ပြင်းထန်ထိခိုက်ဒဏ်ရာရခဲ့ကြောင်း သိရသည်။
“ကလေးက ခြေထောက်ဖြတ်ပစ်လိုက်ရတာ ။၆တန်းဆိုတော့ အသက်က ၁၃၊ ၁၄ပဲရှိဦးမယ်။ နောက်တစ်ဦးက လက်နက်ကြီးအစ ခါးကနေဖောက်ထွက်သွားတာ။ အတော်စိုးရိမ်ရတယ်။”ဟု ချင်းတွင်းမြစ်ကမ်းဘေးကျေးရွာများသပိတ်ကော်မတီ၏ ပြန်ကြားရေးတာဝန်ခံက ပြောသည်။
ထို့အပြင် ဖောင်းကတာကျေးရွာရှိ နေအိမ်အချို့လည်း လက်နက်ကြီးထိမှန်၍ ထိခိုက်ပျက်စီးမှုရှိကြောင်း သိရသည်။
မုံရွာမြို့မှ စစ်ကောင်စီတပ်သည် တိုက်ပွဲဖြစ်ပွားခြင်းမရှိဘဲ မြစ်အနောက်ဘက်ကျေးရွာများကို လက်နက်ကြီးများ မကြာခဏ ပစ်ခတ်နေပြီး သြဂုတ် ၁၄ရက်ကလည်း ပစ်ခတ်မှုကြောင့် ကူးတို့ကုန်းကျေးရွာရှိ ကိုယ်ဝန်ဆောင်သည် အမျိုးသမီးတစ်ဦး လက်နက်ကြီးထိမှန်၍ ကိုယ်ဝန်ပျက်ကျခဲ့ဖူးသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)