မိထက်/People’s Spring
အင်းတော်မြို့သိမ်းတိုက်ပွဲအတွင်း စစ်ရေးအရာအချက်အချာကျသော နဘားလမ်းဆုံကို KIAနှင့် PDF ပူးပေါင်းတပ်ဖွဲ့များက သိမ်းပိုက်ထားပြီး အင်းတော်မြို့၌တိုက်ပွဲပြင်းထန်နေကြောင်း သတင်းရရှိသည်။
ရွှေဘို – မြစ်ကြီးနားလမ်းပိုင်း၊ အင်းတော်မြို့လမ်းဆုံဖြစ်သည့် နဘားမြို့နယ်ခွဲရှိ နဘားလမ်းဆုံကို ဩဂုတ်လ ၂၂ရက်တွင် သိမ်းယူခဲ့ပြီး စစ်ကောင်စီတပ်ဖွဲ့ဝင်များသည် အင်းတော်မြို့ထဲသို့ ထွက်ပြေးသွားကြောင်း ပြည်သူ့ကာကွယ်ရေးရဲဘော်တစ်ဦးကပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
“KIA နဲ့ PDF တွေ အပြီးထိန်းထားတယ်။ အင်းတော်မြို့ထဲမှာတိုက်ပွဲဆက်ပြင်းထန်နေပြီး စစ်တပ်ကလေကြောင်းကနေပစ်နေတယ်။ မြို့ထဲမှာတော့အရပ်သားတွေမရှိတော့ဘူး” ဟု PDFတစ်ဦးကပြောသည်။
နဘားလမ်းဆုံ စစ်ဆေးရေးဂိတ်သည် တပ်မ(၇၇)လက်အောက်ခံစစ်ကောင်စီတပ်ဖွဲ့ဝင်များ ၂၀၂၁ အာဏာသိမ်းပြီးနောက်ပိုင်းကတည်းက တပ်စွဲခဲ့သည့်နေရာဖြစ်သည်။ PDF နှင့် KIA ပူးပေါင်းတပ်ဖွဲ့များက အင်းတော် မြို့သိမ်းတိုက်ပွဲဆင်နွှဲစဉ် ယင်းစခန်းကို စစ်ကောင်စီကလက်လွှတ်လိုက်ရခြင်းဖြစ်သည်။
” နဘားကို ရတာက စစ်ရေးအတွက် တော်တော်လေးအကျိုးရှိတယ်။ တခြားနေရာကလာမယ့်စစ်ကူတွေကိုလည်း ဖြတ်တောက်ထားနိုင်တယ်”ဟု PDF ထောက်ပို့ရဲဘော်တစ်ဦးကပြောသည်။
ဧရာဝတီ မြစ်အနောက်ဘက်ခြမ်းရှိသော နဘားမြို့သည် မြို့နယ်ခွဲဖြစ်ပြီး ကသာခရိုင် ၊အင်းတော်မြို့နယ်အတွင်းတည်ရှိသည်။လူဦးရေ တစ်ထောင်ဝန်းကျင် ရှိပြီး မန္တလေး-မြစ်ကြီးနားရထားလမ်း နှင့်ကားလမ်းပေါ်တွင် ရှိ ၍ စစ်ရေးအရ အရေးပါသောတည်နေရာတွင်ရှိသည့်မြို့ဖြစ်သည်။
အမှတ် (၁ )စစ်ဒေသ ဦးဆောင်မှုဖြင့် KIA နှင့် PDF ပူးပေါင်းတပ်ဖွဲ့များသည် ပြီးခဲ့သည့် ဇွန်လကတည်းက အင်းတော်မြို့သိမ်းတိုက်ပွဲအတွက် ကြိုတင်ပြင်ဆင်ခဲ့ခြင်းဖြစ်သည်။ တပ်မ-၇၇ လက်အောက်ခံ ခလရ(၆)မှ စစ်ကောင်စီတပ်ဖွဲ့ဝင်များတပ်စွဲထားပြီး အင်တော်မြို့အား ကာထားသည့်နံ့သာရွာစခန်းကို ဇွန်လ ၂၈ရက်တွင် ကသာခရိုင် တပ်ရင်း-၂၊KIA နှင့် အင်းတော်မြို့နယ် ပကဖ ပူးပေါင်းအဖွဲ့တို့က တိုက်ခိုက်သိမ်းပိုက်ခဲ့သည်။
ထို့နောက် ဩဂုတ်လ တတိယလပတ်ထဲတွင် အမှတ် (၁) စစ်ဒေသ၏ အင်းတော်၊ထီးချိုင့်၊ ပင်လယ်ဘူးမြို့သိမ်းတိုက်ပွဲများ တပြိုင်နက်စတင်ခဲ့ပြီး လက်ရှိအချိန်အထိတိုက်ပွဲများပြင်းထန်နေသည်။
မြို့သုံးမြို့စလုံးတွင် စစ်ကောင်စီ၏စခန်းအနေဖြင့် မြို့ပေါ်၌သာ ကွက်ကွက်လေးကျန်ရှိတော့ပြီး လေကြောင်းမှအပြင်းအထန်တိုက်ခိုက်၍ ခုခံနေသည့်အနေအထားဟု စစ်ရေးသတင်းရင်းမြစ်များကပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)