ဧပြီ – ၃၀ ၊ ၂၀၂၆ ၊နိုင်ပကောင်း/People’s Spring
ကရင်ပြည်နယ်၊ ကြာအင်းဆိပ်ကြီးမြို့နယ်၊ ဘုရားသုံးဆူမြို့ရဲ့ မြောက်ဘက် မက္ကသာရွာအနီးရှိသတ္တုခဲမိုင်းလုပ်ကွက်ကို မနေ့ (ဧပြီ ၂၉ ရက်) က အာဏာသိမ်းစစ်တပ် ရဲ့လေတပ်က ဗုံးကြဲ တာကြောင့် ထိခိုက်သေဆုံးမှုရှိတယ်လို့ ဒေသခံ သတင်းရင်းမြစ်အချို့ဆီကသိရပါတယ်။
ထိုင်း – မြန်မာ နယ်စပ်မြို့ ဖြစ်တဲ့ ဘုရားသုံးဆူမြို့ ၊မက္ကသာရွာ အနီးက သတ္တုလုပ်ကွက် ကို မနေ့ နေ့ခင်း ၂ နာရီခန့်က လေယာဉ်နဲ့ ဗုံးကြဲသွားတာဖြစ်ပြီး သတ္တုလုပ်သားတွေ ထိခိုက်သေဆုံးမှုရှိတယ်လို့ သိရပေမယ့် သေဆုံး ၊ ဒဏ်ရာရသူဦးရေ အတိအကျ သိရဖို့ စုံစမ်းနေဆဲပါ။
ထိခိုက်ဒဏ်ရာရသူဦးရေဟာ ခန့်မှန်းခြေ ၁၀ ဦးထက်မနည်းရှိနေပြီး ၊ သေဆုံးသူတွေကတော့ ကိုယ် လက် အစိတ်အပိုင်းတွေ ပြတ်တောက်သွားတာကြောင့် ဦးရေ အတိအကျ သိရဖို့ ခက်ခဲနေတယ်လို့ ဒေသခံ တစ်ဦးကပြောပါတယ်။
Public Service Announcement
သတ္တုလုပ်ကွက်ရှိရာမက္ကသာ ရွာဟာ ကရင်အမျိုးသားအစည်းအရုံး (KNU) ရဲ့ အုပ်ချုပ်ရေးနယ်မြေသတ်မှတ်ပုံအရ ဒူးပလာယာခရိုင်၊ ဝင်းရေးမြို့နယ်၊ တပ်မဟာ(၆) ထိန်းချုပ်နယ်မြေထဲမှာ တည်ရှိတာပါ။
အခုနှစ် မတ်လ ၃၁ ရက် ကလည်း မက္ကသာရွာအနီးကို ဒရုန်းနဲ့တိုက်ခိုက်လို့ အမျိုးသမီးနှစ်ဦးသေဆုံးပြီး ကလေးတစ်ဦး ထိခိုက် ခဲ့ပါသေးတယ်။
မက္ကသာကျေးရွာအနီးကသတ္တုခဲမိုင်းလုပ်ကွက်မှာတော့ တရုတ်နိုင်ငံသားတွေပါ ဝင်ရောက်လုပ်ကိုင်နေကြတယ်လို့ သိရပါတယ်။
“ အဲနားတဝိုက်က ပြည်သူတွေက မိုင်းကိုပဲမှီခိုနေရတာ၊ မိုးတွင်းဆို မိုင်းပိတ်ရင် အလုပ်ကမရှိ” လို့ ဒေသခံတစ်ဦးက ပြောပါတယ်။
KNU တပ်မဟာ(၆) နယ်မြေ ကြာအင်းဆိပ်ကြီးမြို့နယ်၊ ဘုရားသုံးဆူမြို့အနီးဝန်းကျင်တဝိုက်မှာတိုက်ပွဲတွေဖြစ်ပွားတာမရှိပေမယ့် တပ်မဟာ(၆) နယ်မြေထဲကပဲ မြ၀တီမြို့တောင်ပိုင်း က မင်းလက်ပံ ၊ဖလူးဒေသတွေနဲ့ ဝေါ်လေဗျုဟာတွေမှာ KNU ပူးပေါင်းတပ်နဲ့ စစ်တပ်တို့ တိုက်ပွဲအပြင်း အထန် ဖြစ်နေပါတယ်။
