တိုက်ပွဲမရှိသည့်ကျောက်တော်မြို့တွင် လူစည်ကားသည့်ဈေး ဗုံးကြဲခံရခြင်း

ထိုသို့ အရပ်သားပြည်သူများကို ဗုံးကြဲ တိုက်ခိုက်နေခြင်းကြောင့် ပြည်သူများ၏ ရင်ထဲတွင် နာကြည်း ဝမ်းနည်း မှုများ၊ နာကျင် ဒေါသထွက်မှုများသာ ဖြစ်ပေါ်စေမည်။  

စစ်ပွဲဒဏ်ကြား ကုန်ဈေးနှုန်းကြီးမား၊ ဆေးဝါးအခက်အခဲ စသဖြင့် ဒုက္ခဝေဒနာပေါင်းစုံကြုံတွေ့နေကြရသည့် ပြည်သူများကို မကူညီသည့်အပြင် ဒုက္ခကြီးကြီးမားမား ပေးနေခြင်းဖြစ်သည်။  

AA ထိန်းချုပ်နယ်မြေများတွင်ရှိသည့် ပြည်သူများသည်လည်း မြန်မာနိုင်ငံအတွင်းတွင် နေထိုင်သည့် ပြည်ထောင် စု တိုင်းရင်းသားဟုသာ စစ်ခေါင်းဆောင်များမှတ်ယူပါက စစ်ဘေးရှောင်တို့အတွက်   ကူညီထောက်ပံ့မှုများကို နည်းလမ်းအမျိုးမျိုးဖြင့် လုပ်ဆောင်နိုင်သည်။ သို့သော်လည်း စားဝတ်နေရေးခက်ခဲနေသော စစ်ဘေးရှောင်တို့ကို  ကူညီထောက်ပံ့ရန် မဆိုထားနှင့် လူသားချင်းစာနာမှုအရ  စာနာဝမ်းနည်းကြောင်းပင် ထုတ်ဖော်ပြောဆိုခြင်း မရှိပေ။ ရေကြောင်း၊ လေကြောင်း၊ လက်နက်ကြီး၊ ဒရုန်းတို့ဖြင့် တိုက်ခိုက်ကာ  ရက်စက်ယုတ်မာပြနေသည်။ 

အိန္ဒိယ‌ဈေးနှင့် ကစ္ဆပနဒီတံတားတို့ကို ဗုံးကြဲတိုက်ခိုက်ခြင်းနှင့် ပတ်သက်၍ ကိုယ့်ကိုယ်ကိုယ် သမ္မတအဖြစ် တင်မြှောက်ထားသည့် မင်းအောင်လှိုင်၏ စစ်အစိုးရက တစုံတရာ ထုတ်ပြန်ခြင်းမရှိပေ။ 

သို့သော် ၎င်းတို့၏ အမာခံ စစ်လော်ဘီများက အရပ်သားပြည်သူတို့ သေဆုံးခြင်းကို ဂရုမမူ၊ ထပ်တလဲလဲ ဗုံးကြဲတိုက်ခိုက်ရန်သာ  တိုက်တွန်းပြီး စစ်ရာဇဝတ်မှုကို အားပေးအားမြှောက်ပြုလုပ်ပေးနေကြသည်။ 

စစ်လော်ဘီတစ်ဦးဖြစ်သည့် နရီမိုး အမည်ခံထားသူက “လေယာဥ်သံကြားနေရင်ကို စိတ်‌ချောက်ချား နေရအောင်အထိ နာနာဗျင်း”ဟု ၎င်း၏ တယ်လီဂရမ် စာမျက်နှာတွင် ရေးသားထားသည်။ 

စစ်တပ်နှင့် ၎င်းတို့၏ လိမ်ညာလှည့်ဖြားတတ်သော အကျင့်ဗီဇသည် မွေးရာပါ ပါလာကြသူများသာဖြစ်ပေလိမ့်မည်။ ထို အိန္ဒိယဈေးသည် AA ၏ ကြားစခန်း၊ ပုဏ္ဏားကျွန်းနှင့် ဆက်စပ်နေရာများကို ယခုဈေးမှသာ ရိက္ခာနှင့်အထောက်အပံ့များ ပို့ဆောင်နေကြသည်ဟု လိမ်လည် ရေးသားနေကြပေသည်။ အာဏာသိမ်းစစ်အုပ်စုသည် မည်သူ့ကိုမျှ လိမ်လည် လှည့်ဖြားရန် ဝန်မလေးကြပေ။ မရှက်မကြောက်ကြပေ။ 

ယခုနှစ် စက်တင်ဘာလ ၃ ရက်တွင်  စစ်အုပ်စုက ကုလသမဂ္ဂသို့ ပေးပို့သည့် အစီရင်ခံစာတွင်လည်း   မြောက်ဦးပြည်သူ့ဆေးရုံနှင့် ကျောက်တော်မြို့ စာသင်ကျောင်းကို ဗုံးကြဲတိုက်ခိုက်ရခြင်းမှာ AA က စစ်ရေးရည်ရွယ်ချက်အဖြစ်အသုံးပြုနေ၊ လှုပ်ရှားနေသောကြောင့်  ဖြစ်သည်ဟု ဖော်ပြထားသည်။ 

စစ်တပ်နှင့်အပေါင်းအပါတို့သည် ဤသို့ လိမ်လည်ထုတ်ဖော်ပြောဆိုမှုများကို အကြိမ်ပေါင်းမနည်းကျူးလွန်ခဲ့ ဖူးလေပြီ။ အထက်ကဆိုခဲ့သကဲ့သို့ ၎င်းတို့၏ အာဏာစက်မသက်ရောက်သော မြို့၊ ရွာများတွင် သာမန်ပြည်သူများမရှိတော့ဘဲ အားလုံးသည် ၎င်းတို့၏ ရန်သူပင် ဖြစ်သည်ဟုသတ်မှတ်၍ သတ်ဖြတ်နေခြင်းဖြစ်‌ ပေသည်။ ထိုဆေးရုံများ၊ ထိုစာသင်ကျောင်းများ၊ ထိုဈေးများသည် AA ထိန်းချုပ်နယ်မြေရှိ အရပ်သား ပြည်သူ အားလုံးအသုံးပြုနေရသည့် နေရာဖြစ်သည်။ မည်သည့် AA စစ်သားမျှမရှိသည့် နေရာဖြစ်သည်။ 

စစ်တပ်သည် ယခုနှစ်အတွင်း တော်လှန်ရေးတပ်ဖွဲ့များ သိမ်းပိုက်ထားသည့် မြို့၊ ရွာများကို သိမ်းပိုက်ရရှိမှုများ ရှိခဲ့ရာ ပြန်လည်သိမ်းပိုက်ရရှိသည့် မြို့၊ ရွာများတွင် ကျန်ရစ်နေထိုင်သူများသည် ပြည်သူများဖြစ်နေသည်ကို တွေ့ရမည်။ ထို့ကြောင့် တော်လှန်ရေး တပ်ဖွဲ့များ ထိန်းချုပ်ထားသည့် နေရာများတွင် ပြည်သူများရှိနေသည်ကို လည်း ၎င်းတို့သိပါလျက် အကြင်နာကင်းမဲ့စွာဖြင့် ပြည်သူ၊ ပြည်သားများကို သတ်ဖြတ်ပြနေခြင်းဖြစ်သည်။ 

စစ်မြေပြင်တွင် ရှုံးနိမ့်မှုများကြောင့် အရှုံးနည်းပါး၊ ဖိအားနည်းပါးစေရန် ပြည်သူလူထုကို ဗုံးကြဲသတ်ဖြတ်ပြခြင်းလည်းဖြစ်နိုင်သည်။ တိုင်းရင်းသားလက်နက်ကိုင်အဖွဲ့များ “ငြိမ်းချမ်းရေး” ဆွေးနွေးပွဲသို့ လာရောက်စေရန် ထိုသို့ ဗုံးကြဲသတ်ဖြတ်ပြခြင်းလည်းဖြစ်နိုင်သည်။