“Şou” davam edir…
29 illik deputat Madər Musayev yenə namizəd oldu… Fəzail Ağamalı və Ziyad Səmədzadə də deputat olmaq istəyirlər.
Deyəsən İlham Əliyevin qocaman deputatları xoşluqla istirahətə getmək istəmir. İki ay əvvəl o, baş nazirin yaşlı müavinlərini öz ərizələri ilə yola salanda, yetmişini tamamlamış başqa vəzifəli şəxsləri də eyni addımı atmağa çağırmışdı. Bu çağırışdan sonra üsyan bayrağı qaldıraraq, sağlamlıq durumlarının yüksək səviyyədə olduğunu bəyan edən yaşlı deputatlar yenidən namizəd olmaq istədiklərini açıqlamışdılar. O kampaniyada xüsusi fəallıq edən şəxslərdən hələ ki, bir xəbər yox. Amma yetmişlərdən artıq üçü namizədliyini irəli sürəcəyini bəyan edib. Onlardan birincisi deputatlıq stajına görə parlamentin veteranı sayılan Madər Musayevdir ki, artıq 10 saylı Binəqədi 3-cü seçki dairəsindən deputatlığa namizədliyini irəli sürüb. 72 yaşlı Musayev 1990-cı ildən deputatdır. O, Mili Məclisə eyni dairədən 5 dəfə mandat alan yeganə şəxsdir. Belə görünür ki, Musayev məlum dairəni ömürlük adına keçirib. Hələ əbədi prezident olmaq istəyənlərə də öz həyat təcrübəsindən nümunə gətirib, dəstək verir. “Necə olur ki, Madər Musayev 5 dəfə deputat seçilə bilir, İlham Əliyev iki dəfədən artıq prezident ola bilmir?” Bu da Əliyevin üçüncü seçkisi ərəfəsində deputatın ona ünvanladığı dəstək mesajıdır.
Dünya praktikasında “siyasi mədəniyyət” deyilən bir anlayış var. O mədəniyyət qaydalarına görə, beş dəfə deputat olmaq bir adam üçün artıqlaması ilə çoxdur. Amma harda bizimkilərdə o abır-həya? Musayev hər seçki ərəfəsində deputatlıq istəyinə haqq qazandıraraq, “indiyə kimi mənim dairəmdən bir nəfər belə Milli Məclisin və Prezident Aparatının qarşısına şikayətə getməyib” deyir. İfadəyə baxın, adam “məni xalq seçir”, “xalq mənim işimdən razı olduğuna görə şikayətçi deyil” cümləsi işlətmir. Sadəcə, mesaj verir ki, kimin nə həddidir, oralara gəlib məndən şikayətçi olsun? Görünür, Musayev 29 illik deputatlıq fəaliyyəti dövründə elə zövq-səfa sürüb ki, dairəni buraxıb istirahətə getmək istəmir. Başqaları kimi onun da hər dəfə eyni dairədən necə seçildiyini xalq yaxşı bilir. MM-dəkilər bütün qanunları özləri pozmaq üçün yazırlar elə. Madər Musayevin “Bentley” markalı 10-DD-012 dövlət nömrə nişanlı avtomobili ilə yol qaydalarını pozub, sonra “cəriməsi nədirsə ödəyəcəm də” deməsi kimi. Bunların başını 29 illik parlament havası xarab edib. Hamısını birdəfəlik istirahətə, nəvələri ilə oynamağa göndərmək lazımdır ki, başları aydınlansın.
Madər Musayev parlamentə qayıtmaq istəyən tək yetmişli deyil. Milli Məclisin daha bir 72 yaşlısı Fəzail Ağamalı da namizəd olacağını açıqlayıb. Bu açıqlamasından əvvəl ağasının qılığına girmək üçün Space kanalında 92-ci il hakimiyyətini tənqid atəşinə tutan, yaşından-başından utanmadan AXCP sədri Əli Kərimli haqqında böhtan yağdıran Ağamalı mandat alacağına da əmin olmadığını ortaya qoyub. “Biz Ana Vətən Partiyası olaraq, parlament seçkilərində daha çox namizədlə çıxış etmək niyyətindəyik. Mən özüm də seçkilərə qatılmağı düşünürəm. Əgər YAP ciddi məqamları nəzərə alıb, həmin dairəyə bizə problem yaradacaq rəqib verməsə, ciddi vəziyyət olmasa mən elə öz dairəmdən namizədliyimi irəli sürəcəyəm”. Milli Məclisin 79 yaşlı deputatı Ziyad Səmədzadə də növbəti seçkilərdə namizəd olacağını bildirib. O, namizədliyini yenə eyni dairədən, 23 saylı Nəsimi-Səbail seçki dairəsindən irəli sürəcəyini deyib. Qeyd edək ki, akademik Səmədzadənin də parlament stajı az deyil. O, MM-də 2005-ci ildən deputat kimi fəaliyyət göstərir. Xülasə, fevral seçkilərinin ilk namizədləri yetmişlərdən başlayıb. Ümid edirik, proses bu axarda davam etməz. Xalqın daha bir qocalar məclisinə dözüm göstərəcək gücü qalmayıb.