AXCP sədri partiya funksionerinin xilası üçün çağırış etdi
AXCP Rəyasət Heyətinin üzvü Fuad Qəhrəmanlı iki həftədən artıqdır ətraf aləmdən təcrid vəziyyətində, faktiki girov kimi saxlanılır. Artıq ictimaiyyət bilir ki, Fuad bəy 14 iyul mitinqində heç iştirak belə etməyib. Buna baxmayaraq siyasi sifarişlə həbs olunub, ağır cinayətlərdə ittiham edilir. Həbs olunduqdan sonra təqribən 10 gün tam təcrid vəziyyətində saxlanılıb. Vəkili və ailəsi ilə hər hansı əlaqə yaratmasına imkan verilməyib. Sosial şəbəkələrdə Fuad Qəhrəmanlıya işgəncələr verilməsi haqqda məlumatlar yayıldıqdan sonra Ombudsman onunla görüşmüş, qardaşı ilə bir neçə saniyəlik danışığı onun sağ olduğunu təsdiq etmişdir. Dünən baş verənlər isə Fuad bəyin hələ də çox ciddi təzyiq altında olduğunu göstərir.
Belə ki, Fuad bəy onu müdafiə etmək üçün partiyadaşlarının müqavilə bağladığı tanınmış vəkil Bəhruz Bayramovla qısa görüşü zamanı heç bir ifadə vermədiyini, özünü günahkar saymadığını deməklə yanaşı, vəkilin xidmətindən də imtina edib. Dünən günün sonunda məlum olub ki, Fuad bəy apellyasiya şikayətindən də imtina edib. Hər halda ondan belə bir ərizə alınıb.
Fuad Qəhrəmanlı təcrübəli və cəsarətli siyasətçidir. O, artıq 4-cü dəfədir ki, siyasi fəaliyyətinə görə həbs edilir. Onun kimi təcrübəli və cəsarətli siyasətçi heç vaxt öz iradəsi ilə vəkil xidmətindən və apellyasiya şikayətindən imtina etməzdi. Bu, birmənalıdır ki, Fuad bəy çox ciddi təzyiq altındadır. Biz hələ bilmirik ki, bu təzyiq nədən ibarətdir. Ancaq əlbəttə, bir gün biləcəyik. İndi isə toplum olaraq, hamılıqla Fuad bəyin xilası üçün çalışmalıyıq. Ombudsman, Qırmızı Xaç, beynəlxalq təşkilatlar öz vəzifələrini yerinə yetirməli, bu tanınmış, prinsipial siyasətçini xilas etmək üçün əməli addımlar atmalıdır. Fuad bəyi vəkilsiz qoymamaq üçün partiyadaşları digər vəkillərlə də müqavilə bağlayacaq.
Bu arada iki həftədən artıq müddətdə vəkili və ailəsi ilə əlaqə yaratmağa imkan verilməyən, 14 iyul mitinqi bəhanəsilə şərlənərək həbs olunmuş digər AXCP funksionerlərinin, eləcə də inzibati qaydada həbs olunsa da, hələ də cinayət işi açılmaqla təhdid olunub saxta ifadələr verməyə məcbur edilən AXCP fəallarının da ağır durumu ölkə və beynəlxalq ictimaiyyətin diqqətində olmalıdır. Hazırda AXCP-yə qarşı təkcə total repressiya həyata keçirilmir, həm də girov götürülmüş partiya funksionerlərinə humanitar fəlakət yaşadılır. İnsanlıq əleyhinə olan bu davranışlara etiraz etmək indi hamımızın vicdan borcudur.
Yazını AXCP sədrinin səhifəsinin admin heyəti paylaşıb