Milli Şuranın sədri Cəmil Həsənli
Deməli Molla Nəsrəddin köhnə ayı doğrayıb təzə ulduz düzəltdiyi kimi İlham Əliyevin korrupsiya, kleptokratiya rejimi də Milli Şuranın 4 ay bundan əvvəl olmuş Zoom toplantılarından kibercinayətkarlıq yolu ilə əldə etdiyi oğurluq video materialdan özünə bəxt “ulduzu” düzəldir. Bəri başdan deyim ki, bu Zoom əhvalatı ilk gündən Gültəkin xanıma qarşı yönəlmişdi və indi də hədəf odur. Təsadüfdürmü? Yox! Öz çirkli təbliğatın kibercinayət materialı üzərində quran kleptokratik-korrupsiyoner rejim yaxşı bilir ki, Gültəkin Hacıbəyli Milli Şuranın əsas sütunlarından biridir. Şübhəsiz ki, rejimin məqsədi də bütün natəmiz əməllərin ailə-klan rejiminin üzünə deyən bir təşkilatın altına lağım atmaqdır. Doğrusu, artıq bu cür ucuz şoular heç kəs üçün maraqlı deyil.
İndi cəmiyyət üçün maraqlı olan digər vacib məsələlər var və DTX-nın xalqa sırımaq istədiyi “Zoom montajları” rejimin qarşısında duran məsələləri həll etmir. Əvvəla, ailə rejimin canfəşanlıqla yaydığı bu video materiallar hökuməti pandemiya dövründə öz sosial öhdəliklərindən azad edirmi? Əlbəttə yox. Bu Zoom materialları ilə xalqın qarnın doyurmağ mümkündürmü? Əlbəttə yox”. Millətə normal sosial paket, iş yeri, bir tikə çörək, səhiyyə sığortası, uşaq pulu, içməli su vermək lazımdır. Əliyev rejimi birbaşa öhdəlikləri olan bu sosial ödənişləri ödəmək əvəzinə, hökumətin yaxasından yapışıb bunları tələb edən Milli Şuranın 4 ay bundan əvvəl keçirilmiş qapalı Zoom toplantısının qeyri-rəsmi hissəsindən montaj edilmiş fraqmentləri yaymaqla vəziyyətdən çıxmaq istəyir. Keçməz!
Adamlar həqiqəti bilməlidir. Son zamanlar hətta, İlham Əliyev də “həqiqətpərəst” olub. Məsələn insanlar bilməlidirlər ki, sərhəddən 31 km içəriyə doğru ordumuzun bir generalının və 10 yüksək rütbəli zabitlərinin erməni quldurları tərəfindən qətlə yetrilməsində Əliyev rejimin ölkənin müdafiə xərclərini daldalayıb ofşor hesablara göndərməsi arasında bir əlaqə varmı? Məsələn millət bilməlidir ki, Əliyevin korrupsiya rejiminin Rusiyadan silah alverindən “otkat” qatlaması ilə Rusiya dronları ilə hərbçilərimizin qəfil qətlə yetirilməsi, ön mövqedə olan qərargahımızın külünün göyə sovrulması arasında bir bağlılıq varmı? Zoom videoların anladıq. Bəs Azərbaycanın 11 yüksək rütbəli zabitinin hansı cinayətin qurbanı olduğunun videoları niyə xalqa təqdim edilmir. Axı bütün bu məsələləri qeydə almaq üçün göyün yeddinci qatında Əliyevin yarım milyardlıq kosmik peyki avaralanır. Bəs hansı məqsədə xidmət edir bu peyk? Yoxsa o da Əliyevlərin bütün dünyanın ekzotik adalarına yayılmış ailə ofşor hesablarının “keşiyini” çəkir?
Məsələn, Milli Şuranın toplantısından kibercinayət yolu ilə əldə edilmiş bu video materiallar millətin cibindən oğurlanmış 3 milyard dollarlıq “Azərbaycan Laundramatını” arxa plana keçirib əfkari-ümumiyyəni mat edə biləcəkmi? Və ya bu yolla içərisində Əliyev ailəsinin üzvlərinin də bulunduğu üzərinə həbs qoyulmuş “Platus” bankın az qala Maltanı Aralıq dənizində çirkli adaya çevirən çirkli para əməliyyatların “təmizə” çıxarmaq olacaqmı?
Kibercinayət yolu ilə əldə edilmiş Zoom montajlarının nə günahı var, qoy yazılsın bizim adımıza. Amma Əliyev də zəhmət çəkib izahat versin ki, nə üçün önün büdcə hesabına öz xidməti istifadə üçün aldığı bir təyyarənin qiyməti pandemiyanın 3 ayı ərzində (aprel + may + qismən iyun) 600 mim Azərbaycan vətəndaşlarına verdiyi sosial paketin həcmindən iki dəfə artıqdır. Yaxud necə oldu ki, SOCAR-ın Monteneqroda aldığı dəyəri yarım milyard dollar olan şirkətlər hansı “möcüzə” Əliyevin ailə üzvlərinə transfer edildi. Axı, bütövlükdə Əliyevin qeyd edilən 3 ay ərzində xalqa verdiyi sosial paketin həcmi Monteneqro şirkətlərinin dəyərindən 2 dəfə azdır. Bu günə kimi Əliyev də daxil olmaqla heç kim izah edə bilmir ki, 17 illik idarəçilik dövründə niyə Azərbaycan vətəndaşları tibbi sığortasız qalıb və hazırda hakimiyyətin yarıtmazlığının, bivecliyinin girovuna çevrilib. Vallah bunun izahı millətə təqdim edilsə hər kəsin ailə hekayəsinə aid olan maraqlı bir süjet alınardı.
MŞ-nın Zoom toplantıların əldə bayraq etməkdənsə, bilavasitə hakim ailəyə bağlı olan bu kriminal xarakterli məsələlərə aydınlıq gətirmək lazımdır. Çünki bu Zoom toplantılarında xalqın cibinə girilmir, onun büdcəsi talan edilmir, ölkənin müdafiə xərcləri oğurlanmır, silah alverindən “otkat” alınmır, SOKAR Milli Şuraya şirkət “hədiyyə” etmir, Azərbaycan körpələrinin boğazından uşaq pulu kəsilmir, vətəndaşlar tibbi sığortasız qoyulmur. Olsa-olsa mənəvi məsuliyyət var. Bəs yuxarıda sadalanan bütün bu kriminal əməllərin videosu niyə yayılmır? Bax buna aydınlıq gətirilmir. Məsələn, ona aydınlıq gətirilməlidir ki, iyul ayında sərt karantin şərtləri altında hökumət sosial paket verməkdən niyə yayındı? Məşhur filmidə deyildiyi kimi, avqustda paket – yəni çörək olacaq, ya olmayacaq? Yeri gəlmişkən, bu suala hökumət Zoom vasitəsi ilə də cavab verə bilər.