“Müdafiə Xətti”nin bəyanatı;
Biz, Fuad Qəhrəmanlının və qondarma ittihamlarla həbsə atılmış başqa şəxslərin sağlıq durumundan və onların hələ də işgəncə, qeyri-insani və insan ləyaqətini alçaldan rəftara məruz qalmaqda davam edə biləcəyindən narahatdır.
Həbs olunmalarından uzun zaman keçməsinə baxmayaraq bu şəxslərin çoxu öz vəkilləri ilə görüşmək imkanından məhrum ediliblər. Qanunla vəkilin müdafiə etdiyi şəxslə görüşlərinə hər hansı məhdudiyyətlər qoyulmasının qadağan olunmasına baxmayaraq bu şəxslərin saxlandıqları Penitensiar Xidmət, polis strukturları vəkillərə imkan verməyiblər. Tamamilə qanunsuz olaraq prokurorluğun müstəntiqlərinin razılıqlarını tələb ediblər. Müstəntiqlər isə həmin şəxslərlə bağlı vəkil orderlərini birbaşa vəkillərdən qəbul etməyərək poçt vasitəsilə göndərmələrini tələb ediblər. Nəticədə belə qanunsuz üsullarla prokurorluq, polis və penitensiar xidmət orqanları mümkün işgəncə və ağır psixoloji təzyiq altında saxladıqları şəxslərin öz vəkilləriylə görüşməsinin qarşısını alıblar.
Fuad Qəhrəmanlıya, Seymur Əhmədzadəyə və digər tutulanlara ağır işgəncələr verilməsi barədə xəbərlər yayılandan sonra Azərbaycan Respublikasının İnsan Hüquqları üzrə Müvəkkili Səbinə Əliyeva 2 avqustda Kürdəxanıda yerləşən 1 saylı İstintaq Təcridxanasına gedərək hər iki şəxslə görüşdüyünü bildirdi. Ombudsman ofisi bəyan etdi ki, guya nə F.Qəhrəmanlının, nə də S.Əhmədzadənin işgəncə faktlarından şikayətləri yoxdur. Sonradan bəlli oldu ki, ombudsmanın ən azı S.Əhmədzadə barədə dediyi həqiqəti əks etdirmir.
Təəssüf ki, F.Qəhrəmanlının durumu ilə bağlı məlumatlar tam qapalı saxlandığından, vəkilinin və yaxınlarının onunla ünsiyyəti qanunsuz olaraq qadağan olunduğundan ombudsmanın onunla bağlı dediklərinin doğru olub-olmadığını yoxlamaq imkanından məhrumuq.
Ombudsman F.Qəhrəmanlının vəkili ilə növbəti gün görüşünə heç kimin mane olmayacağını deyib buna yardım edəcəyinə söz versə də 4 gün keçməsinə baxmayaraq sözünə əməl etməyib. Vəkilə hələ də müxtəlif qanunsuz bəhanələrlə maneə yaradılmasını sadəcə seyr etməkdədir.
Prezident İ.Əliyevin 15 iyuldakı siyasi tənqidçilərinə nifrətdən və onların əzilməsinə çağırışdan ibarət olan bəlli çıxışından sonra həbs olunmuş və qondarma ittihamlar verilmiş siyasi fəalların əksəriyyəti həm də ailə üzvləri ilə qanuni ünsiyyət imkanlarından məhrum ediliblər. Onların çoxunun tutulandan sonrakı durumlarından heç bir xəbər yoxdur.
Həbsdə saxlanılanlardan qeyri-müəyyən şəraitdə alınmış “razılıqlar” əsas gətirilərək onların appelyasiya məhkəmələrinə hakimlər qarşısına gətirilmələri belə əngəllənir. MX-nin əldə etdiyi məlumatlara əsasən yalnış bir neçə şəxs ( Asif Yusifli, Telman Seyfullayev (onlayn), Gündüz Mirzəyev) appelyasiya şikayətlərinə baxılarkən məhkəmə önünə çıxarılıblar.
Biz, ombudsmanı öz sözünü tutmağa, F.Qəhrəmanlının və digər tutulanların vəkilləri ilə bir an belə gecikmədən görüşməsinə, onların müdafiə hüququnun, ailələri ilə ünsiyyət hüququnun və işgəncələrin, qeyri insani və insan ləyaqətini alçaldan rəftara məruz qalmamaq hüquqlarının təmin olunması üçün təcili tədbirlər görməyə çağırır.
Biz, yerli və beynəlxalq hüquq müdafiəçilərindən və qurumlarından durmadan həyəcan təbilləri çalmağı, beynəlxalq insan haqları qurumlarının ölkədəki insan haqlarının bu ağır durumuna, insan faciələrinə yaxından müdaxilə etmələri üçün fəal hərəkətə keçməyə səsləməyi xahiş edir.