(Ceyhun Novruzova və d. siyasi məhbuslara Azadlıq!)
İyulun 14-dən 15-nə keçən gecə Bakıda Ordumuza dəstək məqsədilə keçirilən yürüşlə bağlı qərəzli həbsindən bir neçə gün öncə, yaxın bir qohumuma təcili olaraq qan köçürülməsindən ötrü ağlıma gələn ilk zəngi də Ceyhuna etdim: Ceyhun, “1+” qan tapılmır “Qanköçürmə”də, xahiş edirəm 1-2 nəfəri tap, M.-in vəziyyəti çox ağırdır, ölümlə çarpışır… Ceyhunun dərhal – “müəllim, darıxma, 15 dəqiqəyə özümü çatdırıram ora, elə məndə “1+”-dir” cavabından az qala göydə uçacaqdım…O, köhnə bir avtomobili ilə “taksovatlıq” edirdi… Vaxtında yetişib qan verdikdən bir neçə saat sonra onunla birgə xəstəni evlərinə gətirdik… Amma bu yeganə hal deyildi, o dəfələrlə nəinki biz – dost,qohum-əqrəbalara, hətta tanımadığı istənilən digərlərinin də harayına ilk yetişən Dost idi…
Keçən ilin sonlarında yaşadığı 20-ci sahə mərkəzində aparılan tikinti işləri ilə əlaqədar olaraq yuxarı məhəllədən əsas dayanacağa çıxan mövcud qısa keçid yolun bağlanması ilə əlaqədar Ceyhunun narahatçılığı yerə-göyə sığmırdı… Min bir həyəcanlı zəngində dili yer tutmurdu: “Ay müəllim, həmin yerdə tikiləcək ticarət binası ilə qısa keçid yolunu yuxarı məhəllədəki insanların üzünə bağlamaqla on mindən artıq sakin, o cümlədən, uşaqlar,qocalar və xəstələr də 200-300 metr dolayı yol ilə bu dayanacaqa çıxmalı olacaqlar…Müəllim, xahiş edirəm, Bakı şəhəri və Səbail rayon İcra Hakimiyyətinə bir qrup sakin tərəfindən hazırladığımız cızma-qaramaya bir əl gəzdir və göndər mənə, görək nə edə bilərik, vallah, yazığdı bu xalq…”
Ceyhunun mənə göndərdiyi ərizəni redaktə edib geri göndərdim. Çox sevindi və məktubu bir çox qonşularına imzalatdırıb müvafiq ünvanlara çatdırdı…Həqiqətən də qısa bir müddət ərzində ərizəyə baxıb həmin sahəyə gələn rəsmi nümayəndələr Ceyhunun tamamilə haqlı olduğunu bilib tələb edilən ciddi qüsuru aradan qaldırdılar və bununla da minlərlə insanların sevincinin həddi-hüdudu yox idi…
Ceyhunu sevməyən bir qonum-qonşu, qohum-qardaş çətin ki tapıla… Doğrudur, bir neçə dəfə bilavasitə xalqın problemlərinə görə polisə aparılıb və hətta “15 sutkalıq” da yatıb, amma insafla desək yerli hüquq-mühafizə işçiləri də onun mərdanə şəxsiyyətinə həmişə hörmətlə yanaşıblar…
Ceyhun uşaqlıqdan belə comərd və xeyirxah idi, yüzlərlə digər misallar da gətirə bilərik…Biz onun atası Fərhad kişi və babası Novruz kişi ilə də köhnə dostlardanıq… Rəhmətlik babası Novruz kişi və onun bacı-qardaşları atam və babamın yaxın dostları olublar, ata-babamla ötən əsrin 20-30-cu illərindən Astarada qonşu kəndlərdə yaşayıb və birgə də müəllim işləyiblər…Doğrudur, Ceyhun məndən yaşca çox kiçikdir, 1982-ci il təvəllüdlüdür, amma rəhmətlik atası Fərhad ilə yaxın dost olduğumuz illərdə onun da necə mehriban və diqqətli oğul olduğunun şahidi olmuşduq….Uşaq ikən anasını itirsə də Atası evlənmədi, hər iki oğlunu ləyaqətlə böyütdü və oxutdurdu… . Ceyhun İqtisad Universitetinin bitirdi, hərbi xidmətdə oldu…Amma xeyli təəssüf ki müvafiq bir işlə təmin oluna bilmədi… Babası və atası Fərhad kişi vaxtı ilə bir çox mühüm dövlət vəzifələrində işləsələr də özlərinin təmiz zəhməti ilə dolanardılar, dünya malının ardıyca getmədilər, elə 20-ci sahədəki sadə bir evdə yaşadılar…Atası bir neçə il öncə ürək çatışmamazlığından vəfat etdi. O da hər hansı haqsızlığa tablaşmayan və hər yerdə öz sözünü deyən (atası Novruz kişi kimi) köhnə kişilərdən idi…
Ceyhun subay idi, vaxtı ilə arzuladığı bir qızla (o qız da ailələrimizə yaxın idi) evlənə bilməməsi onu çox məyus etmişdi, elə hey qohum-əqrəbaya “bu il evlənəcəyəm!” vədi ilə illəri illərə calayırdı… Qardaşı çoxdan idi ki Moskvada yaşayırdı… İndi Bakıdakı evinin və doğma Astaradakı yurd-yuvasının qapısı bağlı qalıb…O, digər cəbhədaşları ilə birgə tamamilə haqsız olaraq həbs edilib və barəsində 186.2.1-ci (zərərçəkmiş şəxsə külli miqdarda ziyan vurmaqla əmlakı qəsdən məhv etmə və ya zədələmə), 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə ittiham elan edilib.
Doğrusu, Ceyhun elə də köhnə “cəbhəçi” deyildi, 1-2 il idi ki AXCP-yə qoşulmuşdu və bu da onun öz şəxsi seçimi idi, özünün mübarizə əqidaşlarlarını məhz Cəbhədə görürdü… Bununla belə, bu 1-2 ildə artıq bir “cəbhəçi” kimi, məsləkdaşlarına qarşı mövcud haqsız təqib-təzyiqlərdən onun da başı xeyli ağrısa da bircə dəfə olsa dostlarına üz çevirmədi, mərdi-mərdanə onlara arxa oldu…
Əlbəttə ki, digər əqidaşları kimi, onun da İyulun 14-dən 15-nə keçən gecə Bakıda Orduya dəstək məqsədilə keçirilən yürüşdə AXCP-na qarşı hazırlanan məlum təxribatdan xəbərdar idi, hətta o gecə onunla ünsüyyətimizdə bir dost və qohumu olaraq tövsiyyə etmişdim ki, “bəlkəm birgə 1-2 günlük gedək Astaraya?!”, o isə “müəllim, narahat olmayın, bilirsiniz ki mən heç bir provokasiyaya gedən deyiləm, sadəcə olaraq bir vətəndaş borcu olaraq o yürüşə qoşulmaq istəyirəm…”.
Doğrusu, digər dost-qohumları kimi biz də çox narahat idik Ceyhuna görə, axı açıq-aşkar tələ hazırlanmışdı onlara…
Əlbəttə ki, Ceyhun və silahdaşları nə o Milli Məclis binasında olublar, nə də ki bir kimsəyə əl qaldırmayıblar…Sadəcə olaraq cəmi bircə dəfə cəbhəçi dostu Asif Yusiflinin arxasında görünmüşdür (bax.: aşağıdakı videoya), vəssalam…Bu “vəssalama” görə ona və digər dostlarına qarşı 3 saxta ittiham irəli sürülmüşdür…
Uşaqlıq illərindən yaxşı tanıdığımız Ceyhun bir qarışqanı belə bilərəkdən əzmək iqtidarında deyildi, öz yüksək əxlaq və mədəniyyəti, səbri və təmkini, ağlı və mərhəməti və i.a. dəyərlərilə bir çoxlarına nümunəvi “təcili yardım” dostu idi… Digər haqsız həbs edilmiş məsləkdaşları kimi, bu gün onu da bir neçə il azadlıqdan məhrumiyyət gözləyir… Amma ümidvar olmaq istərdik ki, cəmi fədakar haqq-ədalətsevərlərimiz, o cümlədən yuxarıda adlarını tağ etdiyimiz dost və kolleqalarımız bu zülmlə barışmayacaq və tamamilə haqsız olaraq həbs edilmiş AXCP üzvlərinin və digər siyasi məhbuslarımızın azadlığı naminə əllərindən gələni əsirgəməyəklər…