မုန်တိုင်းအရှိန်ကြောင့် ကရင်ပြည်နယ်အတွင်း မိုးဆက်တိုက်ရွာသွန်းခဲ့ပြီး သောင်ရင်းမြစ်ရေဟာ နောက် ၁ ရက်အတွင်း မြဝတီမြို့ရဲ့ စိုးရိမ်ရေမှတ်ကို ရောက်ရှိနိုင်တယ်လို့ မိုးဇလက သတင်းထုတ်ပြန်ထားပါတယ်။
ဒီကနေ မေ ၂၁ ရက်ည ၆ နာရီခွဲအချိန်က မိုးဇလရဲ့တိုင်းထွာချက်အရ သောင်ရင်းမြစ်ရေဟာ မြဝတီမြို့မှာ မြို့ရဲ့ စိုးရိမ်ရေမှတ်အောက် ၅ ပေခန့်မှာရောက်ရှိနေပြီး အဆိုပါမြစ်ရေဟာ နောက် ၁ ရက်အတွင်းမှာ စိုးရိမ်ရေမှတ်ကို ရောက်ရှိနိုင်တာပါ။
ဒါကြောင့် မြဝတီမြို့နယ်အတွင်းရှိ မြစ်ကမ်းအနီးနဲ့ မြေနိမ့်ပိုင်းမှာ နေထိုင်သူတွေအနေနဲ့ အထူးသတိပြုနေထိုင်ကြဖို့ မိုးဇလက အကြံပြုထားပါတယ်။
မိုးသည်းထန်စွာရွာသွန်းခဲ့မှုကြောင့် ဒီကနေ့ မြဝတီမြို့က အနိမ့်ပိုင်းရပ်ကွက်တွေမှာ ရေကြီးရေလျှံမှုတွေ ဖြစ်ပွါးခဲ့ပြီး ရပ်ကွက်နေပြည်သူတွေတချို့ဟာ စာသင်ကျောင်းတွေမှာ ယာယီခိုလှုံနေရတယ်လို့ သိရပါတယ်။
ကရင်ပြည်နယ်က ဘားအံ မြဝတီ ကော့ကရိတ် ပိုင်ကျုံမြို့တွေမှာ မိုးရေချိန်လက်မ များပြားတယ်လို့ မိုးဇလက ဆိုထားပါတယ်။
မြဝတီမြို့ရဲ့တစ်ဖက်ခြမ်း ထိုင်းနိုင်ငံ တာ့ခရိုင် မဲဆောက် မဲလမတ် ဖုတ်ဖရ အုန်းဖျန်စတဲ့ မြို့နယ်တွေမှာလည်း ရေကြီးရေလျှံမှုတွေ မြေပြိုတာတွေဖြစ်နေတာဖြစ်ပါတယ်။
ဒီလို မိုးဆက်တိုက်ရွာသွန်းပြီး သောင်ရင်းမြစ်ရေထပ်တက်လာပါက မြစ်အနီးမှာ ယာယီခိုလှုံနေထိုင်ရတဲ့ စစ်ဘေးရှောင်တွေအတွက် အခက်ပိုမိုကြုံရနိုင်တယ်လို့ စစ်ရှောင်အရေးကူညီပေးနေတဲ့ အဖွဲ့အစည်းတွေက ပြောပါတယ်။
