CRPHဥက္ကဌ ဦးအောင်ကြည်ညွန့် Internaltional IDEA အကြီးအကဲကို လက်ခံတွေ့ဆုံ

ပြည်ထောင်စုလွှတ်တော်ကိုယ်စားပြုကော်မတီ ဥက္ကဌ ဦးအောင်ကြည်ညွန့်သည် Internaltional IDEA(နိုင်ငံတကာ ဒီမိုကရေစီနှင့် ရွေးကောက်ပွဲအထောက်အကူပြုဆိုင်ရာ အင်စတီကျု့) အစီအစဉ်အကြီးအကဲ မစ္စတာမားကပ်ဘရန့်ဒ်အား ယနေ့ လက်ခံတွေ့ဆုံကြောင်း သတင်းထုတ်ပြန် သည်။

တွေ့ဆုံစဉ် လက်ရှိမြန်မာနိုင်ငံရေး အခြေအနေများ၊ ဖက်ဒရယ်ဒီမိုကရေစီ နိုင်ငံတော်ပေါ်ပေါက်လာရေးနှင့် ဖွဲ့စည်းပုံအခြေခံဥပဒေရေးဆွဲမှုဖြစ်စဉ်ဆိုင်ရာကိစ္စရပ်များ၊ ဖက်ဒရယ် ဒီမိုကရေစီ ပဋိဉာဉ်ဆိုင်ရာ ကိစ္စရပ်များကို ဆွေးနွေးခဲ့သည်ဟု ဆိုသည်။

ထို့အပြင် IDEA သည် လက်ရှိကြားကာလလွှတ်တော်လုပ်ငန်းစဉ်များအပေါ် ကူညီပံ့ပိုးမှုဆောင်ရာ ကိစ္စရပ်များကိုလည်း ထည့်သွင်းဆွေးနွေးခဲ့သည်ဟု ထုတ်ပြန်ချက်၌ ဖော်ပြသည်။

International IDEA သည် ပြည်ထောင်စုလွှတ်တော်ကိုယ်စားပြုကော်မတီနှင့် နားလည်မှုစာချွန်လွှာ(MOU) သက်တမ်းတိုး ရေးထိုး၍ လွှတ်တော်ဖွံ့ဖြိုး‌‌ရေး အထောက်အကူပြုလုပ်ငန်းများကို စဉ်ဆက်မပြတ်ကူညီပံ့ပိုးနေသော မိတ်ဖက်အဖွဲ့အစည်းဖြစ်သည်။