နွေဦးတော်လှန်ရေးကာလအတွင်း နိုင်ငံတဝှမ်း အခြေခံပညာသင်ကြားနိုင်တဲ့ ကျောင်းသားဦးရေ ၃၀ရာခိုင်နှုန်းသာရှိပြီး ကျန်တဲ့ ၇၀ ရာခိုင်နှုန်းက စာရင်းပျောက် နေတယ်လို့ နွေဦးဆရာအတတ်သင်တက္ကသိုလ် အဓိပတိ ဒေါက်တာသိန်းလွင်က ပြောပါတယ်။
မေလ ၂၆ရက်က အွန်လိုင်းကနေပြုလုပ်တဲ့ ကြားကာလပညာရေးဆိုင်ရာပို့ချအကြံပြုချက်များအစီအစဉ်မှာ ဒေါက်တာသိန်းလွင်ကပြီးခဲ့တဲ့ ၂၀၂၁ခုနှစ် ကိန်းဂဏန်းတွေကို ကိုးကားပြီးပြောခဲ့တာပါ။
ကြားကာလအတွင်းအခြေခံပညာရေးကိုသင်ကြားနိုင်တဲ့ ကျောင်းသား ၃၀ ရာခိုင်နှုန်း ရှိပြီး ဒီပမာဏာမှာ စစ်ကောင်စီဖွင့်တဲ့ကျောင်းတွေမှာတက်နေတဲ့ ကျောင်းသားဦးရေက တဝက်လောက်ပါဝင်တယ်လို့ ဒေါက်တာသိန်းလွင်က ဆိုပါတယ်။
နိုင်ငံတဝှမ်းက ကလေးငယ်အားလုံးပညာသင်ကြားခွင့်ရဖို့ အရေးကြီးပြီး စစ်ကောင်စီကျောင်းတွေထံ မသွားတဲ့ကလေးငယ်တွေ ပညာရေးကို လက်လှမ်းမီဖို့ အတွက် တာဝန်ရှိနေတယ်လို့လည်း ဒေါက်တာသိန်းလွင်က ပြောပါတယ်။
“ကျွန်တော်တို့နိုင်ငံမှာရှိတဲ့ကလေးအားလုံးပညာသင်ကြားခွင့်ရဖို့ စကစကိုတော့ကျွန်တော်တို့အားမကိုးဘူး ၊စကစကျောင်းကိုမသွားတဲ့ကလေးတွေက ကျွန်တော်တို့ဘက်ကို လက်လှမ်းမမီဘူးဆိုရင် ကျွန်တော်တို့မှာတာဝန်ရှိတယ်” လို့ ဒေါက်တာသိန်းလွင်က ထောက်ပြပါတယ်။
ဒါကြောင့် ကြားကာလပညာရေးမှာ ကလေးငယ်အားလုံးပညာသင်ကြားခွင့် လက်လှမ်းမီနိုင်ဖို့ ထည့်သွင်းစဉ်းစားရမယ်လို့ ဒေါက်တာသိန်းလွင်ကပြောပါတယ်။
လက်ရှိအချိန်မှာ တိုင်းရင်းသားတော်လှန်ရေးအဖွဲ့အစည်းတွေက ဖွင့်လှစ်တဲ့ကျောင်းတွေ ၊ဘာသာရေးအခြေပြုကျောင်းတွေ မှာေ ကျာင်းသားတက်ရောက်မှုပိုများလာပြီး ရပ်ရွာအခြေပြုကျောင်းတွေလည်းပေါ်ထွက်လာတယ်လို့ဒေါက်တာသိန်းလွင်ကဆိုပါတယ်။ စစ်ကောင်စီနဲ့ မဆက်နွယ်တဲ့ ဘာသာစုံသင်ပုဂ္ဂလိက အွန်လိုင်းကျောင်းတွေလည်းရှိလာပါတယ်။
ဒါအပြင် NUG ပညာရေးဝန်ကြီးဌာနက Home base learning အစီအစဉ်ပြုလုပ်ထားပြီး အဲဒီအစီအစဉ်မှာ သင်ကြားတဲ့ကျောင်းသားဟာ တစ်သိန်းခွဲလောက်ရှိတယ်လို့သိရပါတယ်။
စစ်ကောင်စီကတော့ ဒီနှစ်ပညာရေးနှစ်အတွက် မေလ ၂၆ ရက်ကနေ ဇွန်လ ၁ ရက်အထိ ကျောင်းအပ်တဲ့ ဦးရေဟာ ၅၆ သိန်းရှိတယ်လို့ထုတ်ပြန်ထားပါတယ်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)