●အမှန်တစ်ကယ်ရှိသောအရေအတွက်မှာထိုထက်ပိုများဟုမြေပြင်တွင်ကူညီပေးနေသောအဖွဲ့အစည်းအချို့ပြော
စစ်တပ်အာဏာသိမ်းပြီးနောက်ပိုင်း ဖြစ်ပွားသော တိုက်ပွဲများနှင့် မလုံခြုံမှုကြောင့် ပြည်တွင်း နေရပ်စွန့်ခွာသူဦးရေ ၇ သိန်းခန့်ရှိလာကြောင်း ကုလသမဂ္ဂလူသားချင်းစာနာမှုဆိုင်ရာညှိနှိုင်းရေးရုံး(OCHA)က ထုတ်ပြန်သည်။
မြန်မာနိုင်ငံ၏ လူသားချင်းစာနာမှုဆိုင်ရာအခြေအနေနှင့်ပတ်သက်သောနောက်ဆုံးထုတ်ပြန်လိုက်သော အစီရင်ခံစာတွင် ဖော်ပြခြင်းဖြစ်ပြီး စစ်တပ်အာဏာသိမ်းပြီးနောက်ပိုင်း အမျိုးသား၊ အမျိုးသမီးနှင့် ကလေးသူငယ်များအပါအဝင် နေရပ်စွန့်ခွာရသူအရေအတွက်သည် ပထမဆုံး အကြိမ် တစ်သန်းကျော်ရှိလာသည်။
![(စစ်ကောင်စီတပ်၏ အကြမ်းဖက်မှုကြောင့်စစ်ကိုင်းတိုင်နှင့်ကရင်ပြည်နယ်မှ စစ်ရှောင်ပြည်သူများ)](https://i0.wp.com/www.ludunwayoo.com/wp-content/uploads/2022/06/285511126_394944439361681_3022647668315383655_n.jpg?resize=720%2C540&ssl=1)
စစ်တပ်အာဏာသိမ်းမှုနောက်ဆက်တွဲ တိုက်ပွဲများကြောင့်နေရပ်စွန့်ခွာသူအရေအတွက်သည် စစ်ကိုင်းတိုင်းတွင် ၃၃၆,၆၀၀ ဖြင့် အများဆုံးဖြစ်ပြီး ကရင်နီပြည်(ကယား)တွင် တစ်သိန်းနီးပါးဖြင့် ဒုတိယအများဆုံးဖြစ်သည်။
ထို့အပြင် ကရင်ပြည်နယ်တွင် ၈၀၀၀၀ ကျော်၊ ရှမ်းတောင်နှင့် မကွေးတို့တွင် ၅၀၀၀၀ ကျော်စီ၊ ချင်းပြည်နယ်တွင် ၃၆၀၀၀၊ မွန်ပြည်နယ်တွင် ၁၈၀၀၀ ၊တနသာ်ရီတိုင်းတွင် ၁၁၅၀၀ ၊ ပဲခူးအရှေ့ပိုင်းတွင် ၃၇၀၀ ကျော် စသဖြင့်နေရပ်စွန့်ခွာခဲ့ရကြောင်း OCHA က အစီရင်ခံသည်။
![(စစ်ကောင်စီတပ်၏ အကြမ်းဖက်မှုကြောင့်စစ်ကိုင်းတိုင်နှင့်ကရင်ပြည်နယ်မှ စစ်ရှောင်ပြည်သူများ)](https://i0.wp.com/www.ludunwayoo.com/wp-content/uploads/2022/06/284912055_394944462695012_6424981282337723342_n.jpg?resize=720%2C540&ssl=1)
ကရင်နီပြည်နယ်တွင် OCHA စာရင်းအရ စစ်ရှောင်ပြည်သူတစ်သိန်းခန့်သာရှိသည်ဆိုသော်လည်းကရင်နီပြည် နယ်အတိုင်ပင်ခံကောင်စီ( KSCC) ၏ အဆိုအရ ကရင်နီပြည်နယ် တွင်(မိုးဗြဲနှင့်ဖယ်ခုံမြို့)ကို ထည့်သွင်းထားသည့် စစ်ဘေးရှောင်အရေအတွက်မှာ နှစ်သိန်းကျော်ထိရှိနေပြီး အစာငတ်မွတ်ဘေး မကြာမီကြုံတွေ့ရနိုင်သည်ဟုမကြာသေးမီရက်ပိုင်းတွင်ပြောကြားထားသည်။ အခြားဒေသများတွင်လည်း အမှန်တစ်ကယ်ရှိသော စစ်ဘေးရှောင်ပြည်သူအရေအတွက်မှာ OCHA စာရင်းထက်ပိုများကြောင်းမြေပြင်တွင်ကူညီပေးနေသောအဖွဲ့အစည်းအချို့ပြောသည်။
![(စစ်ကောင်စီတပ်၏ အကြမ်းဖက်မှုကြောင့်စစ်ကိုင်းတိုင်နှင့်ကရင်ပြည်နယ်မှ စစ်ရှောင်ပြည်သူများ)](https://i0.wp.com/www.ludunwayoo.com/wp-content/uploads/2022/06/285640691_394944496028342_4854789904826852125_n.jpg?resize=720%2C960&ssl=1)
အာဏာမသိမ်းခင်က နေရပ်စွန့်ခွာထွက်ပြေးနေရသောစစ်ရှောင်ပြည်သူ သုံးသိန်းခွဲခန့် ရှိခဲ့ပြီး အဓိကအားဖြင့် ကချင်၊ရခိုင်၊ ချင်းနှင့် ရှမ်း စသောပြည်နယ်များမှဖြစ်ကြောင်း လည်း OCHA က အစီရင်ခံသည်။
ပြီးခဲ့သည့် ဧပြီမှစ၍ ရခိုင်၊ ကချင်၊ ရှမ်းတောင်ပိုင်း၊ ကရင်တို့တွင် မိုးသက်လေပြင်းနှင့်အတူ မုတ်သုန်ရာသီ ရောက်ရှိလာပြီး ဒုက္ခသည်များနားခိုရာ ယာယီတဲများကို ပျက်စီးဆုံးရှုံးစေပြီး လူသားချင်းစာနာမှုတုံ့ပြန်ရေးနှင့် ပြင်ဆင်ကြိုးပမ်းမှုများသည် အန္တရာယ်မြင့်မားသောဒေသများ၌ ကျရောက်နေ ကြောင်း OCHA က ဆိုသည်။
![(စစ်ကောင်စီတပ်၏ အကြမ်းဖက်မှုကြောင့်စစ်ကိုင်းတိုင်နှင့်ကရင်ပြည်နယ်မှ စစ်ရှောင်ပြည်သူများ)](https://i0.wp.com/www.ludunwayoo.com/wp-content/uploads/2022/06/284496553_394944532695005_5084334988616761042_n.jpg?resize=880%2C660&ssl=1)
လူသားချင်းစာနာမှုဆိုင်ရာအကူအညီများကို ထိခိုက်မှုအများဆုံးပြည်သူများထံ အရေးပေါ်အသက်ကယ်ဆယ်ရေးအထောက်အပံ့များ ဆက်လက်ပေးအပ်နေသော်လည်း သွားရောက်နိုင်ရေး စိန်ခေါ်မှုများနှင့် ရန်ပုံငွေအကန့်အသတ်များရှိနေကြောင်း OCHA ၏ အစီရင်ခံစာ၌ ဖော်ပြသည်။
ယခုနှစ် ပထမလေးလပတ်တွင် မြန်မာနိုင်ငံလူဦးရေ ၂.၆ သန်းသည် လူသားချင်းစာနာမှုဆိုင်ရာ အကူအညီလိုအပ်မည်ဖြစ်ကြောင်း ကုလသမဂ္ဂက ခန့်မှန်းသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)