▪️စစ်ကောင်စီ၏ အကြမ်းဖက်ဝါဒကို သတ္တိရှိရှိရင်ဆိုင်နေသည့် မြန်မာလူမျိုးများကို ပြင်သစ်က လေးစားပြီး ဆက်လက်ထောက်ခံမည်ဟုဆို
၈၈ မျိုးဆက်ကျောင်းသားခေါင်းဆောင် ဦးဂျင်မီ၊ NLD ကိုယ်စားလှယ်ဟောင်း ကိုဖြိုးဇေယျာသော်အပါအဝင် လူပုဂ္ဂိုလ်လေးဦးကို စစ်ကောင်စီက ကွပ်မျက်ရန်ဆုံးဖြတ်ခြင်းကို ပြင်းပြင်းထန်ထန်ရှုတ်ချကြောင်း ပြင်သစ်သံရုံးက ယနေ့ထုတ်ပြန်သည်။
“တရားမ၀င်သည့် စစ်အစိုးရက ကျင့်သုံးနေသော အကြမ်းဖက်ဝါဒကို သတ္တိရှိရှိရင်ဆိုင်နေသည့် မြန်မာလူမျိုးများကို ပြင်သစ်က လေးစားပြီး ဆက်လက်၍ ထောက်ခံသွားပါမည်” ဟု မြန်မာနိုင်ငံဆိုင်ရာပြင်သစ်သံရုံးက ဖော်ပြသည်။
စစ်ကောင်စီ၏ သေဒဏ်ပေးမှုသည် ရက်စက်ကြမ်း ကြုတ်သော ဆုံးဖြတ်ချက်တစ်ခုဖြစ်ပြီး လွတ်လပ်မှုကို ခုခံကာကွယ်သူများကို နောက်တစ်ကြိမ် ထပ်မံပစ်မှတ်ထားရန် ရည်ရွယ်ခြင်းဖြစ်ကြောင်းနှင့် နိုင်ငံအတွင်း သေဒဏ်ပေးဆောင်မှုနှင့်ပတ်သက်၍ အနှစ်သုံးဆယ်ကျော် ဆိုင်းငံ့ထားမှုကို ဖောက်ဖျက်ခြင်းသည် ကြီးမား သောဆုတ်ယုတ်မှုတစ်ခုဖြစ်ကြောင်း ထုတ်ပြန်သည်။
ထို့အပြင် အာဏာသိမ်းမှုရလဒ်ကြောင့် နိုင်ထက်စီးနင်း ဖမ်းဆီးထားသူများ အားလုံးကို ပြန်လွှတ်ပေးရန်၊ စစ်တပ်မှကျူးလွန်နေသည့် အကြမ်းဖက်မှုများ အဆုံးသတ်ရန်နှင့် သက်ဆိုင်သူအားလုံး အပါအဝင် တွေ့ဆုံဆွေးနွေးရေး လုပ်ငန်းစဉ်များ ဖေါ်ဆောင်ရန် တောင်းဆိုချက်များကို ပြင်သစ်က ထပ်လောင်းအတည်ပြုသည်။
စစ်တပ်သည် အာဏာသိမ်းပြီးနောက် စစ်ခုံရုံးများက သေဒဏ် ၁၁၃မှုကို နိုင်ထက်စီးနင်း ချမှတ်ခဲ့သည်။
