ခင်ဦးမြို့နယ်သာဂရကျေးရွာကိုစစ်ကောင်စီတပ်ကရွာလုံးကျွတ်နီးပါးမီးရှို့ဖျက်ဆီးသွား၍ ဒေသခံများသည် မိုးရာသီတွင်နေစရာမရှိတော့ဘဲဒုက္ခမျိုးစုံကြုံတွေ့နေရကြောင်းခင်ဦးမြို့နယ်သတင်းမှန်ပြန်ကြားရေးက ထုတ်ပြန်သည်။
အကြမ်းဖက်စစ်ကောင်စီတပ်က သာဂရကျေးရွာကို ဇွန် ၄ရက် နံနက်မှစ၍မီးရှို့ဖျက်ဆီးခြင်းဖြစ်သည်။ ရွာလုံးကျွတ်နီးပါး မီးလောင်ပြာကျသွားပြီး ဒေသခံများသည် နေစရာမရှိတော့၍ ဝိုင်းဝန်းကူညီပေးကြရန် တိုက်တွန်းထားသည်။
“မိုးရွာထဲမှာ နေစရာမရှိ ဒုက္ခရောက်နေရပါတယ်။လူသားချင်းစာနာထောက်ထားမှု အကူအညီများပေးကြဖို့ မေတ္တာရပ်ခံလိုက်ရပါတယ်”ဟုခင်ဦးမြို့နယ်သတင်းမှန်ပြန်ကြားရေးက အကူအညီတောင်းထားသည်။
ခင်ဦးမြို့နယ်သည်လတ်တလောတွင်စစ်ကောင်စီ၏အကြမ်းဖက်ဖျက်ဆီးမှုကိုဆိုးရွားစွာရင်ဆိုင်နေရပြီးသာဂရ ရွာသာမကမြင်းဒေါင်း၊မြို့သစ်၊ဂွေးကုန်းရွာဒေသခံများလည်းထွက်ပြေးတိမ်းရှောင် နေရသည်ဟု ဒေသခံများကပြောသည်။
“မိုးကလည်း ရွာတယ်။အိမ်လည်းမရှိတော့ဘူးဗျ။တော်တော်ကိုစာနာစိတ်ကင်းမဲ့တဲ့ စစ်တပ်ပါဗျာ။မဲမဲမြင်ရာအကုန်မီးတိုက်တာ” ဟုထွက်ပြေးတိမ်းရှောင်နေရသည့်သာဂရရွာသားတစ်ဦးကပြောသည်။
နွေဦးတော်လှန်ရေးအတွက်လက်နက်ဆွဲကိုင်တော်လှန်ခဲ့သည့်အချိန်မှစ၍လက်ရှိကာလအထိခင်ဦးနယ်တွင်ကျေးရွာပေါင်း ၃ဝ ကျော်မှ ဘာသာရေးအဆောက်အဦအချို့အပါအဝင်နေအိမ်ပေါင်း၁၃၀၀ကျော်ကိုအကြမ်းထက်စစ်ကောင်စီတပ်က မီးရှို့ဖျက်ဆီးခဲ့သည်ဟု ခင်ဦးမြို့နယ်သတင်းမှန်ပြန်ကြားရေးက မေ ၃၀ရက်အထိ စာရင်းကိုထုတ်ပြန်ထားသည်။
ထိုအပြင်မေ ၃၀ ရက်နောက်ပိုင်းထပ်မံမီးရှို့ဖျက်ဆီးခံရသောရွာငါးရွာထက်မနည်းရှိနေကြောင်းဒေသခံများကပြောသည်။
