အရပ်ဘက်အဖွဲ့အစည်းအမည်ခံပြီး စစ်ကောင်စီနဲ့ တွေ့ဆုံ ဆွေးနွေးညှိနှိုင်းတဲ့ လုပ်ရပ်ကို ရှုတ်ချ

အရပ်ဘက်အဖွဲ့အစည်းအမည်ခံပြီး အကြမ်းဖက် စစ်ကောင်စီကို နိုင်ငံရေး အင်အားစုအဖြစ် သဘောထားကာ နိုင်ငံရေးရလဒ်တစ်ခုထွက်လာအောင်ဆွေးနွေးညှိနှိုင်းဖို့ကြိုးပမ်းတဲ့လုပ်ဆောင်ချက်တွေကို ကန့်ကွက်ရှုတ်ချကြောင်း အဖွဲ့အစည်း ပေါင်း ၁၈၀ ကျော် စုပေါင်းပြီး ဒီနေ့မှာ သဘောထားထုတ်ပြန်လိုက်ကြပါတယ်။

အဲဒီသဘောထားထုတ်ပြန်ချက်ကို အရပ်ဘက်အဖွဲ့အစည်းတွေ ၊ နွေဦးတော်လှန်ရေး လူထုသပိတ်စစ်ကြောင်းတွေ ၊ ကျောင်းသားသမဂ္ဂတွေ ၊ CDM တွေ ၊စစ်အာဏာရှင်ဆန့်ကျင်ရေးအင်အားစုတွေ ပူးပေါင်းထုတ်ပြန်ကြတာဖြစ်ပါတယ်။

စစ်ကောင်စီရဲ့ ရာဇဝတ်မှုတွေကို လျစ်လျူရှုပြီး အရပ်ဘက်အဖွဲ့အစည်းအမည်ခံကာ စစ်ကောင်စီနဲ့တွေ့ဆုံဆွေးနွေးတာ ၊ ဆွေးနွေးညှိနှိုင်းဖို့ကြိုးပမ်းတာတွေကို ထုတ်ပြန်ချက်မှာ ရှုံ့ချထားတာတွေ့ရပါတယ်။

အရပ်ဘက်လူ့အဖွဲ့အစည်းဆိုတာဟာ လူ့အဖွဲ့အစည်း တရပ်လုံးရဲ့ ကောင်းကျိုးအတွက် လူ့အခွင့်အရေး စံတန်ဖိုးတွေကို တည်ဆောက်ရမှာလို့ ဒီနေ့ ထုတ်ပြန်တဲ့ သဘောထားကြေညာချက်မှာ ရှင်းပြထားပါတယ်။

စစ်ကောင်စီဟာ လူ့စံနှုန်းကင်းမဲ့နေတဲ့ အကြမ်းဖက်အစုအဖွဲ့သာဖြစ်တဲ့အတွက် သူတို့ကို နိုင်ငံရေးအင်အားစု အဖြစ်သဘောထားပြီး နိုင်ငံရေးရလဒ်ထွက်အောင် ဆွေးနွေးတာ ၊ ဆွေးနွေးဖို့ ကြိုးပမ်းတာ တွေကိုလုပ်ဆောင်နေတဲ့ မည်သူမဆို ၊ မည်သည့်အဖွဲ့အစည်းမဆို စစ်ကောင်စီ ကျုးလွန်ထားတဲ့ ရာဇဝတ်မှုတွေကို မျက်ကွယ်ပြုရာရောက်နေတယ်လို့ အရပ်ဘက်အဖွဲ့အစည်းတွေရဲ့ ကြေညာချက်မှာ ထောက်ပြထားပါတယ်။

ဒါအပြင် ဒီလုပ်ရပ်တွေဟာ အရပ်ဘက်အဖွဲ့အစည်း အမည်တပ်ပြီး လူ့အဖွဲ့အစည်းတရပ်လုံးရဲ့ကောင်းကျိုးအတွက် ရပ်တည်ရမယ့် စံနှုန်းတွေကို ချိုးဖောက်ရာ ရောက်တယ်လို့လည်း ကြေညာချက်မှာ ရှုမြင်ထားပါတယ်။

ဒီလုပ်ရပ်တွေကို အရပ်ဘက်အဖွဲ့အစည်း ခေါင်းစဉ်တပ်ပြီး လုပ်ဆောင်နေတာတွေကိုလည်းရပ်တန့်ကြဖို့ တောင်းဆိုထားပါသေးတယ်။