အာဆီယံသည် နိုင်ငံတော်၏အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ သမ္မတဦးဝင်းမြင့်၊ NUG ၊ NUCC တို့နှင့် တွေ့ဆုံဆွေးနွေးရမည်ဟု မလေးရှားနိုင်ငံခြားရေးဝန်ကြီး Saifuddin Abdullah က တိုက်တွန်းပြောကြားသည်။
‘မြန်မာ့ရှေ့ရေးအဖြေရှာခြင်း’ ခေါင်းစဉ်ဖြင့် ကျင်းပသော IISS အာရှလုံခြုံရေးထိပ်သီးဆွေးနွေးပွဲ၌ မလေးရှားနိုင်ငံခြားရေးဝန်ကြီးက အာဆီယံ၏ဘုံ ဆုံးဖြတ် ချက် ၅ရပ်တွင် နိုင်ငံရေးတွေ့ဆုံအဖြေရှာရေးနှင့်ပတ်သက်၍ တိကျသည့် ပါဝင်သင့် ပါဝင်ထိုက်သူများကို ဖော်ပြမထားသဖြင့် ယင်းသို့ ထည့်သွင်းရမည်ဖြစ်ကြောင်း တိုက်တွန်းခဲ့ခြင်းဖြစ်သည်။
“တိုးတက်မှုမရှိတဲ့ အာဆီယံဘုံသဘောတူညီချက် ၅ ရပ်ကို အဓိပ္ပာယ်ရှိရှိအကောင်အထည် ဖော်ဖို့ အားလုံးပါဝင်ပြီး ဘက်ပေါင်းစုံဖြစ်တဲ့ နည်းလမ်းသစ်တွေ၊ တီထွင်ဖန်တီးမှုရှိတဲ့ နည်းလမ်းတွေကို လိုအပ်တယ်ဆိုတာ ကျွန်တော် ထပ်လောင်းပြောလိုပါတယ်”ဟု မလေးရှားနိုင်ငံခြားရေး ဝန်ကြီးက ပြောသည်။
အာဆီယံသည် သင့်လျော်သောအချိန်ကာလအတွင်း အာဆီယံဘုံဆုံးဖြတ်ချက် ၅ရပ် အောင်မြင်မှုရရှိရေး ပြန်လည်ရေးဆွဲသည့်ဘုတ်အဖွဲ့ထံ ပြန်သွားရမည်ဖြစ်ပြီး လူသားချင်းစာနာမှု အထောက်အပံ့နှင့် ကာကွယ်ဆေးထိုးနှံရေးတို့ကို ထိပ်တန်းဦးစားပေးအနေဖြင့်ပါဝင်သော ပိုမိုတိကျသည့် လမ်းစဉ်ကိုချမှတ်အကောင်အထည်ရမည်ဖြစ်ကြောင်း Saifuddin Abdullahက ပြောသည်။
လူသားချင်းစာနာမှုနှင့် နယ်စပ်ဖြတ်ကျော်အကူအညီများကို နှောင့်နှေးကြန့်ကြာမှု၊ ခွဲခြားမှု မရှိဘဲပေးအပ်နိုင်ရမည်ဖြစ်ပြီး ဒေသခံအရပ်ဘက်အဖွဲ့အစည်းများ ပါဝင်ရမည်ဟု ၎င်းက ဆွေးနွေးသည်။
အထက်ပါဆွေးနွေးပွဲတွင် မလေးရှားနိုင်ငံခြားရေးဝန်ကြီးနှင့်အတူ အမေရိကန်နိုင်ငံခြားရေးဝန်ကြီးဌာန အကြံပေးပုဂ္ဂိုလ်၊ ကုလသမဂ္ဂအတွင်းရေးမှူးချုပ်၏ အထူးကိုယ်စားလှယ်၊ ထိုင်းနိုင်ငံ၏ မြန်မာနိုင်ငံဆိုင်ရာအထူးကိုယ်စားလှယ်တို့ တက်ရောက်ဆွေးနွေးကြသည်။
