ရန်ကုန်မြို့ ဒဂုံမြို့သစ်တောင်ပိုင်းမြို့နယ်ရှိ ကျည်စုရပ် ကွက်ရုံးကို Yangon UG Association ၏ မဟာမိတ်ညီနောင်အဖွဲ့များက ဖောက်ခွဲတိုက်ခိုက်ခဲ့ကြောင်း သတင်းထုတ်ပြန်သည်။
ဇူလိုင် ၁၇ရက်တွင် ယင်းတိုက်ခိုက်မှုကို Secret Underground Force (SUF ) ၊ Special Nway Oo (SNO) နှင့် God’s Hand Forces(GHF) အဖွဲ့တို့က လုပ်ဆောင်ခဲ့ခြင်းဖြစ်ပြီး ထိခိုက်ပျက်ဆီးမှုရှိခဲ့ကြောင်း Yangon UG Association(YUA) က အသိပေးထားသည်။
အဆိုပါတိုက်ခိုက်မှုအပြင် ဒဂုံမြို့သစ်တောင်ပိုင်းမြို့နယ် လှော်ကားလမ်းမကြီး၌ အကြမ်းဖက်စစ်ကောင်စီယာဉ်တန်းကို ဖောက်ခွဲရန်ပြင်ဆင်ထားခဲ့သော်လည်း စစ်ကောင်စီဘက်ကို သတင်းပေးသူရှိသောကြောင့် မအောင်မြင်ခဲ့ကြောင်း ထပ်မံထုတ်ပြန်ထားသည်။
“ဘေးတွဲဆိုင်ကယ်နှင့် တွဲလျက်တပ်ဆင်ထားမှုကို နံနက် ၈ နာရီခွဲ အချိန်ခန့်တွင် တွေ့ရှိသွားပြီး ဖောက်ခွဲချိန်မရပဲ စစ်ကောင်စီ တပ်သားများက လာရောက်သိမ်းဆည်းသွားခဲ့ပါသည်”ဟု YUAက ဆိုသည်။
ဒုတိယစစ်ဆင်ရေးမအောင်မြင်ခဲ့သော်လည်း အဖွဲ့သားအားလုံး ဘေးကင်းကြောင်းနှင့် YUA ညီနောင်များအနေဖြင့် မြို့ပြ၌ စစ်ကောင်စီကို အရှိန်အဟုန်တိုးမြှင့်၍ တိုက်ခိုက်သွားမည်ဟု အသိပေးထားသည်။
