မကွေးတိုင်း ဆိပ်ဖြူမြို့နယ်အတွင်း စစ်ကြောင်းထိုးနေသော အကြမ်းဖက် စစ်ကောင်စီတပ်ကို ဆော – ဆိပ်ဖြူလမ်းပိုင်းတွင် မိုင်းဆွဲတိုက်ခိုက်ခဲ့ကြောင်း လောင်းရှည်ဒေသကာကွယ်ရေးတပ်ဖွဲ့ (LSRPDF)က ယနေ့(ဇူလိုင် ၁၈)တွင် ထုတ်ပြန်သည်။
ယနေ့ နေ့လယ် ၂ နာရီခွဲက ဆိပ်ဖြူမြို့နယ်အတွင်း အင်အား ၂၀၀ခန့်ဖြင့် စစ်ကြောင်းထိုးနေသော စစ်ကောင်စီတပ်ကို ဆော – ဆိပ်ဖြူလမ်းပိုင်း မိုင်တိုင်(၄၄)တွင် မိုင်းလေးလုံးဖြင့် ဖောက်ခွဲတိုက်ခိုက် ခဲ့ကြောင်း ဖော်ပြသည်။
အဆိုပါတိုက်ခိုက်မှုတွင် စစ်ကောင်စီတပ်မှ အများအပြားဒဏ်ရာရပြီး ခုနှစ်ဦးသေဆုံးကာ နှစ်ဖက် အပြန်အလှန်ပစ်ခတ်မှုဆက်ဖြစ်ခဲ့ကြောင်း ထုတ်ပြန်သည်။
နှစ်ဖက် အပြန်လှန်ပစ်ခတ်မှုတွင် လက်နက်ကြီးများ အချက်၅၀ကျော် ပစ်ခတ်ကြပြီး ပြည်သူ့မေတ္တာ ကြောင့် LSRPDF မှ ထိခိုက်ဒဏ်ရာ မရှိခဲ့ဟု အသိပေးသည်။
“ကျွန်တော်တို့ ပြည်သူအတွက် အတတ်နိုင်ဆုံးကာကွယ်သွားပါမယ် ပြည်သူ့မေတ္တာကြောင့် အကောင်းဆုံးတိုက်ပွဲဝင်နိုင်မှာပါ”ဟု LSRPDF မှ ရဲဘော်တစ်ဦးက ပြောသည်။
စစ်ကောင်စီတပ်များသည် မိုင်တိုင်(၄၄)မှတဆင့် နဂါးပွက်တောင်အထိ ဆက်လက်စစ်ကြောင်း ထိုးလာခြင်းကြောင့် ဒေသခံပြည်သူများအနေဖြင့် ဆော-ဆိပ်ဖြူလမ်ပိုင်းအား လုံးဝ အသွားအလာမပြုလုပ်ကြရန်နှင့် နဂါးပွတ်တောင်နှင့် နီးစပ်သော ကျေး ရွာများမှ ပြည်သူများ အထူးသတိပြု နေထိုင်ကြရန် အသိပေးထားသည်။
