မန္တလေးမြို့ ချမ်းမြသာစည်မြို့နယ်ရှိ စစ်ကောင်စီခန့်အုပ် ချုပ်ရေးမှူးတစ်ဦး၏ နေအိမ်ကို ဖောက်ခွဲ တိုက်ခိုက်ခဲ့ကြောင်း မြို့ပြပြောက်ကျားတပ်ဖွဲ့(KCGF)က ယနေ့(ဇူလိုင် ၁၉)ထုတ်ပြန်သည်။
ချမ်းမြသာစည်မြို့နယ် (၆၂)လမ်း၊ (၁၀၇)လမ်းနေ အကြမ်းဖက်စစ်ကောင်စီခန့် အုပ်ကြီးလည်း ဖြစ်သူ ပျုစောထီးအဖွဲ့ဝင် ဦးထွန်းထွန်း၏ နေအိမ်ကို ယမန်နေ့ (ဇူလိုင် ၁၈ ရက်) ည ၈နာရီခွဲတွင် လက်လုပ်မိုင်းတစ်လုံးဖြင့် ပစ်ခတ်တိုက်ခိုက် ခဲ့ကြောင်း ဖော်ပြသည်။
“နောက်ဆက်တွဲ အထိအခိုက်မသိရဘူးခင်ဗျ။ ပြည်သူကိုဖိနှိပ်နေလို့ တိုက်ခိုက်ခဲ့တာပါ။ အဲဒီအုပ်ကြီးဟာ လာဘ်စားတဲ့နေရာမှာလည်း စံပဲခင်မျ”ဟု KCGF တပ်ဖွဲ့ခေါင်းဆောင် ဗိုလ်မြွေပွေးက ပြောသည်။
စစ်ကောင်စီခန့်အုပ်ကြီး ဦးထွန်းထွန်းသည် အကြမ်းဖက်စစ်ကောင်စီ သြဇာခံလျက် စစ်ကောင်စီ၏ လုပ်ငန်းရပ်အများကိုအားတက်သရောပါဝင် ကူညီနေပြီး အထူးသဖြင့် ဒေသခံများ၏ နေအိမ်များကို တပည့်တပမ်းများဖြင့် ဖျက်သိမ်းရာတွင် နာမည်ကြီးသူတစ်ဦးဖြစ်ကြောင်းလည်း ထောက်ပြသည်။
“ပြည်သူက သတင်းပေးတာ မနေ့က နေ့လည် ၂ နာရီလောက်ပေါ့။ သတင်းရပြီး နာရီပိုင်းအတွင်း ဆင်း၍ လုပ်ဆောင်ခဲ့တာပါ”ဟု ဗိုလ်မြွေပွေးက အသိပေးသည်။
ယခုတိုက်ခိုက်မှုမှာ ပထမဆုံးအကြိမ်အဖြစ် သတိပေးဖောက်ခွဲတိုက်ခိုက် ခဲ့ခြင်းဖြစ်ပြီး နောက်တစ်ကြိမ်ဆိုလျှင် ၎င်း၏အသက်အန္တရာယ်အား တာဝန်ယူတော့မည်မဟုတ်ကြောင်း K.C.G.F ၊ MRRF ၊ MSMS စသည့် MDY-UG တပ်ပေါင်းစုက သတိပေးထားသည်။
