ကချင်ပြည်နယ် ဖားကန့်မြို့နယ် ဆယ်ဇင်းတိုက်ပွဲမှာ ယနေ့ အထိ ဆက်လက်ပြင်းထန်နေပြီး စစ်ကောင်စီတပ်ကတိုက်လေယာဉ်၊ရဟတ်ယာဉ်များအသုံးပြု တိုက်ခိုက်နေကြောင်း ကချင်လွတ်လပ်ရေးတပ်မတော်(KIA)သတင်းနှင့်ပြန်ကြားရေးဌာနက ဖော်ပြသည်။
KIA တပ်မဟာ(၉) ၊ တပ်ရင်း(၂၆) နယ်မြေ ဆယ်ဇင်းအနီး၌ ဇူလိုင် ၁၆ရက်မှစ၍ နေ့စဉ် တိုက်ပွဲပြင်းထန်နေပြီး ဇူလိုင် ၁၇ရက်တိုက်ပွဲ၌ စစ်ကောင်စီတပ်ကသေဆုံးထိခိုက်များခဲ့သည်။
ဇူလိုင် ၁၉ရက်တွင် စစ်ကောင်စီတပ်သည် တိုက်လေယာဉ်ဖြင့် မနက် ၅နာရီ အချိန်မှ ညနေ ၇နာရီခွဲအထိ ဆယ်ဇင်း ကုန်းဘက် ဗုံး ၁၃ကြိမ်တိုင်ကြဲချပစ်ခတ်ခဲ့ပြီးနောက် ရဟတ်ယာဉ်ဖြင့် လူအင်အား ဖြည့်တင်းကာသေဆုံးသူနှင့် ဒဏ်ရာရသူများကိုလည်းရဟတ်ယာဥ်ဖြင့်သယ်ယူသွားသည်ဟု KIA ၏ သတင်းနှင့် ပြန်ကြားရေးဌာနကယနေ့ထုတ်ပြန်သည်။
ဆယ်ဇင်းအနီးတစ်ဝိုက်တွင် စစ်ကောင်စီတပ်များ စစ်ရေးလှုပ်ရှားမှုကြောင့် KIAနှင့် ဖြစ်ပွားနေသည့် တိုက်ပွဲအတွင်း ပြည်သူများ ထိခိုက်မှုမရှိသော်လည်း နေ့တိုင်း တိုက်ပွဲဖြစ်နေ၍ ဒေသခံများ စိုးရိမ်ကြောက်ရွံ့နေကြသည်ဟု ဖော်ပြထားသည်။ ထိုကြောင့်ဒေသခံအချို့မှာထွက်ပြေးတိမ်းရှောင်နေကြကြောင်းဒေသခံများကပြောသည်။
တိုက်ပွဲတွင် စစ်ကောင်စီတပ်မှ သေဆုံးဒဏ်ရာရသူများသော်လည်းKIA ကထုတ်ပြန်ခြင်းမရှိပေ။ ဒေသခံများနှင့် PDFများနှင့်နီးစပ်သူများ၏ အပြောအရ စစ်ကောင်စီတပ်မှသေဆုံးသူ အနည်းဆုံး ၅၀ ခန့်ရှိပြီးလက်နက်ခဲယမ်းများကိုလည်း KIAကသိမ်းဆည်းရမိကြောင်း သိရသည်။
KIAနှင့် စစ်ကောင်စီတပ်တို့သည် ဝိုင်းမော်မြို့နယ်၊ တနိုင်းမြို့နယ်တို့တွင်လည်း ယခုရက်ပိုင်းအတွင်း တိုက်ပွဲဖြစ်ပွားမှုရှိခဲ့သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)