စစ်ကိုင်းတိုင်း၊ မုံရွာမြို့နယ်၊ တောပုကျေးရွာရှိ စစ်ကောင်စီတပ်သားများနှင့် ပျူစောထီးများကို တစ်ပတ်အတွင်း နှစ်ကြိမ်တိုက်ခိုက်ရာ ထိခိုက်သေဆုံးမှုရှိနိုင်ကြောင်း မုံရွာခရိုင်တပ်ရင်း(၇)-Lightning People Defence Force အဖွဲ့ သတင်းနှင့် ပြန်ကြားရေးတာဝန်ခံက ပြောသည်။
ပြီးခဲ့သည့် ဒီဇင်ဘာ ၁၅ရက် ည ၈နာရီခန့်က ပျူစောထီးကြီးစိုးရာ တောပုရွာအတွင်းရှိ ပျူနှင့်စစ်အုပ်စု အထိုင်ချနေသော နေရာအား (၄၀)မမ လက်နက်ကြီးဖြင့်လေးချက် ပစ်ခတ်တိုက်ခိုက်ခဲ့ကြောင်း Lightning People Defence Force အဖွဲ့ သတင်းနှင့် ပြန်ကြားရေးတာဝန်ခံက ပြောသည်။
ထိုသို့တိုက်ခိုက်မှုကြောင့် ပျူနှင့်စစ်သား လေးဦးခန့် နေရာ၌ပင် ပွဲချင်းပြီး သေဆုံးပြီး ခြောက်ဦး မှာလည်း အပြင်းအထန်ထိခိုက်ဒဏ်ရာရရှိသွားသည်ဟု ၎င်းက ဆိုသည်။
အဆိုပါ စစ်ဆင်ရေးကို မုံရွာခရိုင်တပ်ရင်း (၇)-Lightning People Defence Forceနှင့် Dragon Brother’s PDF တို့ပူးပေါင်းတိုက်ခိုက်ခဲ့ကြောင်း အသိပေးသည်။
ဒီဇင်ဘာ ၁၀ရက် ည ၁၀ခန့်ကလည်း မုံရွာမြို့နယ်၊ ကြာပိုင်ကျေးရွာအနောက်ဘက် တောရကျောင်းအနီးတွင် ပြည်သူပိုင်ကွမ်းခြံများကို မီးရှို့ဖျက်ဆီးရန် တောပုပျူရွာမှ ထွက်လာသော ပျူနှင့်စစ်အုပ်စုအား သတင်းအတိအကျရ၍ (၄၀)မမ နှစ်ချက်ပစ်ခတ်တိုက်ခိုက်ခဲ့ကြောင်း Lightning People Defence Force အဖွဲ့ သတင်းနှင့် ပြန်ကြားရေးတာဝန်ခံက ပြောသည်။
စစ်အုပ်စုဝင်များ ထိခိုက်ဒဏ်ရာများရရှိသွားပြီးနောက် ရမ်းသမ်းပစ်ခတ်ပြီး တောပုရွာသို့ ပြန်လည်ဆုတ်ခွာသွားသည်ဟု ဆိုသည်။
အဆိုပါ စစ်ဆင်ရေးကို Lightning People Defence Force နှင့် Dragon Brother’s PDF တို့ပူးပေါင်း တိုက်ခိုက်ခဲ့ကြောင်း အသိပေးထားသည်။
ပျူစောထီးကြီးစိုးရာ တောပုရွာမှ ပျူများသည် စစ်အုပ်စုနှင့်ပေါင်း၍ PDFအဖွဲ့ဝင်များအားဖမ်းဆီးသတ်ဖြတ်ခြင်း၊ပြည်သူများအား ခြိမ်းခြောက်ငွေညှစ်ခြင်းများ ပြုလုပ်နေသည်။
