မကွေးတိုင်း၊ ပခုက္ကူမြို့နယ်၊ မြစ်ခြေ – ကျွန်းချောင်းလမ်းတွင် PDFအဖွဲ့ဝင်များကို လိုက်လံပစ်ခတ်သည့် ပျူစောထီးများအား ပြန်လည်ပစ်ခတ်တိုက်ခိုက်ရာ ပျူအုပ်စုထိခိုက်မှုရှိကြောင်း မြိုင်မြို့နယ် ပြည်သူ့ကာကွယ်ရေးတပ်ဖွဲ့ခေါင်းဆောင် ကိုလယျာ်က ပြောကြားသည်။
ယမန်နေ့(ဒီဇင်ဘာ ၁၈ ရက်)ညနေ ၄နာရီခန့်က ပခုက္ကူမြို့နယ်၊ မြစ်ခြေ – ကျွန်းချောင်း လမ်းပေါ်၌ မြိုင်(ပကဖ)အဖွဲ့ ရဲဘော်များ ဆိုင်ကယ်ဖြင့်ဖြတ်သန်းလာစဥ် အိုင်ကြီးကျေးရွာအနီး၌ စစ်ကောင်စီတပ်သားများနှင့် ပျူစောထီးများက ဆိုင်ကယ်ဖြင့် လိုက်လံပစ်ခတ်ခဲ့ကြောင်း ကိုလယျာ်က ပြောသည်။
အဆိုပါ စစ်ကောင်စီတပ်နှင့်ပျူများသည် ဆိတ်ခဝကျေးရွာမှဖြစ်ပြီး ဆိုင်ကယ် လေးစီးဖြင့် လိုက်လံပစ်ခတ်ခဲ့သည်။
PDFများက ဆိုင်ကယ်အားရပ်တန့်ပြီး ပြန်လည်ပစ်ခတ်စဉ် ပျူတစ်ဦးပေါင်ကျည်ထိမှန်၍ သုံးမိနစ်ခန့် ပစ်ခတ်မှု ဖြစ်ပွားပြီး ကျန်ပျူများလည်း ဒဏ်ရာရရှိနိုင်ကြောင်း၊ သို့သော် အင်အားမမျှ၍ ပြန်လည်ဆုတ်ခွာခဲ့ပြီး ရဲဘော်များအထိအခိုက်မရှိကြောင်း ကိုလယျာ်က ပြောသည်။
မြစ်ခြေ – ကျွန်းချောင်းလမ်းတွင် ယခင်ကလည်း စစ်ကောင်စီလက်အောက်ခံ ပျူများနှင့် ဒေသတွင်းPDFများ ပစ်ခတ်မှုအချို့ ရှိခဲ့ဖူးသည်။
