ယမန်နေ့တိုက်ပွဲ စစ်ကောင်စီတပ် ဆွဲမိုင်းထိ၍ ၁၀ဦးခန့် သေဆုံးဟု ခန့်မှန်း
ချင်းပြည်နယ် ဟားခါးမြို့သို့ ရိက္ခာ၊ လက်နက်၊ ခဲယမ်းလာပို့သည့် စစ်ကောင်စီထောက်ပို့ယာဉ်တန်းကို ချင်းပူးပေါင်းတပ်က တိုက်ခိုက်လျက်ရှိရာ ယမန်နေ့ (ဧပြီ ၁၀ရက်)တွင် ယာဉ်တစ်စီး ထပ်မံသိမ်းပိုက်နိုင်ခဲ့ကြောင်း ချင်းအမျိုးသားတပ်မတော်(CNA) ပြောရေးဆိုခွင့်ရှိသူ ဆလိုင်းထက်နီက ပြောသည်။
တင့်ကား ၂စီး အပါအဝင် ယာဉ်အစီး ၃၀ခန့်ပါသည့် စစ်ကောင်စီယာဉ်တန်းကို ဖလမ်း – ဟားခါးလမ်းပိုင်း၌ ကြားဖြတ်တိုက်ခိုက်မှုများ လုပ်ဆောင်ခဲ့ရာ ဧပြီ ၈ရက်တွင် ယာဉ်တန်းမှယာဉ် ၂စီး၊ ဧပြီ ၁၀ရက် နံနက်အစောပိုင်း၌ ယာဉ် ၂စီးနှင့် နေ့ခင်းပိုင်းတွင် ယာဉ်တစ်စီး သိမ်းပိုက်နိုင်ခဲ့သည်ဟုဆိုသည်။ ယာဉ်များ တိုက်ခိုက်ခံရ၍ ပျက်စီးသွားရာ ယာဉ်တန်းမှ ချန်ထားခဲ့ခြင်းဖြစ်သည်။
ထို့ပြင် ယမန်နေ့ (ဧပြီ ၁၀ရက်)တွင် ချင်းတပ်ဖွဲ့ ၏ မိုင်းဆွဲတိုက်ခိုက်မှုကြောင့် စစ်ကောင်စီတပ်မှ ထိခိုက်သေဆုံးရှိခဲ့ကြောင်း ဆလိုင်းထက်နီက ပြောသည်။
“ကား ၅စီးရယ် သူတို့ ၁၀ယောက်လောက်တော့ ဆွဲမိုင်းထိလို့ သေကြတယ်ပေါ့။ ဟားခါးမြို့နယ်ထဲမှာပဲ” ဟု ၎င်းက ဆိုသည်။
စစ်ကောင်စီတပ်သည် အရပ်သားများ၏ ကားများကို ချောဆွဲ ပြီး စစ်ရေးအတွက် အသုံးပြုလာခြင်းဖြစ်သည်ဟု ဆလိုင်းထက်နီက ပြောသည်။
စစ်ကောင်စီတပ်သည် ယမန်နေ့တွင် အဆိုပါ ဟားခါး – ဖလမ်း ကြားရှိ ရမ်ထလိုရွာ အနီးကို ယမန်နေ့က လေကြောင်းမှ ဗုံးကြဲတိုက်ခိုက်ခဲ့ကြောင်း၊ သို့ရာတွင် ထိခိုက်မှုမရှိကြောင်း ဆလိုင်းထက်နီက ပြောသည်။
ဧပြီ ၆ရက်က စစ်ကောင်စီတပ်ယာဉ်တန်း ရန်ထလိုရွာသို့ ရောက်ရှိစဉ်ကလည်း ကျေးရွာအတွင်းမှ လူနေအိမ် ၁၉လုံးကို မီးရှို့ဖျက်ဆီးသွားသည်ဟု The Chin Journal က ဖော်ပြသည်။
အဆိုပါယာဉ်တန်းသည် ဧပြီ ၁၀ရက်တွင် ဟားခါးနှင့် (၁၇)မိုင်ခန့် ဝေးသည့် ချွန်ကျုံးရွာအနီး ရောက်ရှိနေသည်ဟု ဆိုသည်။
စစ်ယာဉ်တန်းသည် မတ်လ ၇ရက်တွင် ကလေးမြို့မှ ထွက်ခွာလာခြင်းဖြစ်ပြီး လမ်းခရီးတွင် ချင်းပူးပေါင်းတပ်များ၏ အကြိမ်ကြိမ် ကြားဖြတ်တိုက်ခိုက်မှုကြောင့် ဧပြီ ၁၁ရက်အထိ ဟားခါးသို့ မရောက်သေးဘဲ ဖြစ်နေသည်။
