စစ်ကိုင်းတိုင်း၊ တန့်ဆည်နှင့် ခင်ဦးမြို့နယ်အစပ်ရှိ ချောင်းရိုးကျေးရွာကို စစ်ကောင်စီတပ်က ဝင်ရောက်မီးရှို့ဖျက်ဆီးနေ၍ အနီးတဝိုက်ကျေးရွာများမှ ဒေသခံပြည်သူအများအပြားထွက်ပြေးတိမ်းရှောင်နေရကြောင်း ဒေသခံများက ပြောသည်။
ယနေ့ (ဧပြီ ၁၁ ရက်) နံနက် ၅ နာရီခန့်က တန့်ဆည်နှင့် ရေဦးမြို့နယ်နယ်အစပ်ရှိ ချောင်းရိုးကျေးရွာကို စစ်ကောင်စီတပ်က ပစ်ခတ်ဝင်ရောက်ခဲ့ပြီး တစ်နာရီခန့်အကြာတွင် စတင်မီးရှို့ဖျက်ဆီးခဲ့ကြောင်း ဒေသခံများက ပြောသည်။
“ပျူစောထီးတွေလည်း ပါတယ်။ မနက် ၅ခွဲလောက်မှာ တန့်ဆည်-ရေဦးလမ်းပေါ်မှာရှိတဲ့ ချောင်းရိုးရွာနဲ့ ဖန်းခါးဇင်ရွာကို ဝင်ပြီးလက်နက်ကြီးတွေနဲ့ထုတယ်။ ချောင်းရိုးရွာကို မီးရှို့တယ်။”ဟု ဒေသတွင်းသတင်းရင်းမြစ်က ပြောသည်။
ချောင်းရိုးကျေးရွာအပြင် အနီးတဝိုက်ရှိ ကျေးရွာများမှ ဒေသခံပြည်သူများ ထွက်ပြေးတိမ်းရှောင်နေရပြီး ပြည်သူအချို့ ပိတ်မိနေကြောင်း ဒေသခံများက ပြောသည်။
စစ်ကောင်စီတပ် စစ်ကြောင်းထိုးနေ၍ တန့်ဆည် – ရေဦး လမ်းမကြီးအား လုံခြုံရေးအခြေအနေကြောင့် ဖြတ်သန်းသွားလာခွင့် ယာယီပိတ်ထားလိုက်ကြောင်း ၊ပြည်သူများအနေဖြင့် ဖြတ်သန်းသွားလာခြင်း လုံးဝမပြုကြရန် ပြည်သူ့ကာကွယ်ရေး အဖွဲ့များက သတိပေးသည်။
ယမန်နေ့( ဧပြီ ၁၀ ရက်) နံနက်ပိုင်းကလည်း ရေဦးနယ်မှ ခင်ဦးမြို့နယ်သို့ကူးလာသော စစ်ကောင်စီတပ်သည် အင်းပတ်ကျေးရွာကို လက်နက်ကြီးဖြင့် ရမ်းသမ်းပစ်ခတ်မှုကြောင့် ကလေးငယ် တစ်ဦး ထိခိုက်ဒဏ်ရာရရှိခဲ့သည်။
အာဏာသိမ်းကာလအတွင်း ၂၀၂၃ ဖေဖော်ဝါရီ ၂၈ရက်အထိ စစ်ကောင်စီတပ်၏ မီးရှို့ဖျက်ဆီးမှုကြောင့် အရပ်သားပြည်သူများ၏ နေအိမ်ပေါင်း ၆၀,၄၅၉ လုံး မီးရှို့ဖျက်ဆီးခံခဲ့ရပြီး စစ်ကိုင်းတိုင်းမှာ အများဆုံးဖြစ်ကာ ၄၇,၇၇၈ လုံး ပျက်စီးဆုံးရှုံးခဲ့သည်။
