မြ၀တီမြို့အနီး၊ မဲကနယ်ကျေးရွာကို ယနေ့မနက်ပိုင်းတွင် စစ်ကောင်စီတပ်က လေကြောင်းတိုက်ခိုက်ခဲ့ပြီး တိုက်ပွဲပြင်းထန်ခဲ့ကြောင်း ဒေသခံများက ပြောသည်။
စစ်ကောင်စီတပ်နှင့် KNLA ပူးပေါင်းစစ်ကြောင်းတို့အကြား စစ်ရေးတင်းမာမှုများရှိနေသည့် ကေအဲန်ယူ-ကရင်အမျိုးသားအစည်းအရုံး တပ်မဟာ(၆)နယ်မြေ မဲကနယ်ကျေးရွာဖြစ်ပွားခဲ့ခြင်းဖြစ်သည်။
ယနေ့ ဧပြီ ၁၁ ရက် မနက်ပိုင်းက မဲကနယ်ကျေးရွာဘက်ခြမ်းသို့ စစ်ကောင်စီတပ်ဘက်မှ ဂျက်ဖိုက်တာလေယာဉ်နှစ်စီးဖြင့် နံနက်(၇)နာရီ (၃၂)မိနစ်တွင် တစ်ကြိမ်၊ (၇)နာရီ (၃၉)မိနစ်တွင် တစ်ကြိမ် စုစုပေါင်းနှစ်ကြိမ် ဗုံးကြဲတိုက်ခိုက်ခဲ့ပြီး လက်နက်ကြီးများဖြင့်လည်း ပစ်ခတ်ခဲ့သည်ဟု ဒေသခံများက ဆိုသည်။
ပစ်ခတ်မှုကြောင့် လတ်တလောတွင် ထိခိုက်မှုကို မသိရှိရသေးဘဲ ကျေးရွာအတွင်းပိုင်းတွင် နှစ်ဖက်တိုက်ပွဲပြင်းထန်နေကြောင်း ဒေသခံတစ်ဦးက ပြောသည်။
ဧပြီလ(၄)ရက်နေ့ကနေ (၉)ရက်နေ့အတွင်း တိုက်ပွဲများပြင်းထန်နေခဲ့ပြီး ကနယ်ကျေးရွာဘက်ကို စစ်ကောင်စီတပ်နှင့် နယ်ခြားစောင့်တပ်(BGF)က စစ်ကြောင်း(၃)ကြောင်း ထိုးစစ်ဆင်တိုက်ခိုက်နေပြီး လက်နက်ကြီးများနှင့်ပါပစ်ကူခဲ့ခြင်းဖြစ်သည်။
နှစ်ဖက်တိုက်ပွဲပြင်းထန်မှုကြောင့် သင်္ဃန်းညီနောင်၊ ဖားချောင်း၊ မဲကနယ်၊ နို့ဖိုး(ကွင်းကလေး) စသောကျေးရွာများမှ ဒေသခံပြည်သူများသည် ပြီးခဲ့သည့်မတ်လကုန်ပိုင်းမှစ၍ ထွက်ပြေးတိမ်းရှောင်နေရပြီး တိမ်းရှောင်နေရသူများအတွက် လူသားချင်းစာနာထောက်ထားမှု အကူအညီများ အရေးတကြီးလိုအပ်လျက်ရှိနေသည်ဟု ကရင်လူ့အခွင့်အရေးအဖွဲ့က ပြောကြားထားသည်။
