မန္တလေးတိုင်းရဲ့ NLD ပါတီတိုင်းရုံးကို ပြီးခဲ့တဲ့ စနေနေ့ ညပိုင်းက လူအုပ်စု လိုက် လာရောက်ဖျက်ဆီးသွားတယ်လို့ အဲဒီရုံး အနီးဝန်းကျင်မှာ နေထိုင်သူအချို့ထံကသိရပါတယ်။
ချမ်းအေးသာစံမြို့နယ် ၊ ၆၂ လမ်း ပေါ်မှာရှိတဲ့ NLD ပါတီတိုင်းရုံးဆီ ညအချိန် ကရိန်းကားပါ ခေါ်လာတဲ့ လူအုပ်စုဟာ ဝင်ရောက်ဖျက်ဆီးတာလို့ဆိုကြပါတယ်။
ရုံးမှာ ချိတ်ဆွဲထားတဲ့ ဆိုင်းဘုတ် ကို ကရိန်းနဲ့ဆွဲခွာချသလို မျက်နှာစာက သံဘာဂျာတံခါးကို ကရိန်း ဆွဲဖျက်သွားခဲ့တယ်လို့ ဒေသခံအချို့ဆီကတဆင့်စုံစမ်းသိရပါတယ်။
အခုလို ဖျက်ဆီးခံရတဲ့ NLD မန္တလေးတိုင်းပါတီရုံးဟာ စစ်တပ်အာဏာသိမ်းပြီးနောက်ပိုင်း မကြာခဏ ဖျက်ဆီးခံရတဲ့အဆောက်အဦးလည်းဖြစ်ပါတယ်။
အဆောက်အဦးရဲ့ မှန်တံခါးတွေ ရိုက်ခွဲဖျက်ဆီးခံရသလို ရုံးအတွင်းပိုင်းလည်း ဝင်ရောက်မွှေနှောက်ခံထားရတယ်လို့သိရပါတယ်။
စနေနေ့ ညပိုင်းက လာရောက်ဖျက်ဆီးမှုမှာတော့ စစ်ကောင်စီတပ်ဖွဲ့ဝင် ၁၀ ဦးနီးပါးပါဝင်တယ်လို့ မနတလေး မြေပြင်သတင်းတွေကို ကင်းထောက် ဖော်ပြတဲ့ သပြေညိုသတင်းလွှာ ဖေ့ဘွတ်ခ်မှာ အသိပေးထားတာတွေ့ရပါတယ်။
