ရဲခေါင်/People’s Spring
ကရင်နီပြည်အတွင်း မြို့နယ်ရဲဌာနမှူးရုံး၊ရဲစခန်းနှင့် ရဲကင်း ၂၇ခုကို တိုးချဲ့ဖွဲ့စည်းနိုင်ခဲ့ကြောင်း ကရင်နီပြည်ရဲဌာန KSP က ယနေ့ ထုတ်ပြန်သည်။
ယနေ့(သြဂုတ် ၂၅ ရက်)တွင် ဖွဲ့စည်းခြင်းသုံးနှစ်ပြည့်အစီရင်ခံစာထုတ်ပြန်ရာတွင် အသိပေးထုန်ပြန်လာခြင်းဖြစ်သည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
စစ်တပ်အာဏာသိမ်းပြီးနောက် ၂၀၂၁ကစ၍ CDM ရဲများ နှင့် အဖွဲ့ဝင်သစ်များပါဝင်သော ကရင်နီပြည်ရဲဌာနအနေဖြင့် ဖွဲ့စည်းကာ စိုးမိုးနယ်မြေများတွင် ရဲစခန်းရှစ်ခု ဖွင့်လှစ်ခဲ့သည်ဟု ဆိုသည်။
ယခု ၂၀၂၃-၂၀၂၄ ခုနှစ်တွင် ရဲစခန်းခြောက်ခု ၊လုံခြုံရေးရဲကင်း ၁၆ ခုနှင့်မြို့နယ်ရဲဌာနမှူးရုံး ၅ခုကို တိုးချဲ့ ဖွင့်လှစ်နိုင်ခဲ့ကြောင်း ဖော်ပြသည်။
“ရဲစခန်းပေါင်း ၁၄ ခုရှိသွားပါပြီ။အမှုအများစုကတော့ ရဲတပ်ဖွဲ့ဝင်တွေကိုယ်တိုင်ဖမ်းဆီးပါတယ်။တချို့ အမှုတွေကိုတော့ တော်လှန်ရေးတပ်ဖွဲ့တွေနဲ့ ပူးပေါင်း ဆောင်ရွက်ပါတယ်”ဟု KSP တာဝန်ရှိသူက လူထုနွေဦးသို့ ပြောသည်။
![](https://i0.wp.com/www.ludunwayoo.com/wp-content/uploads/2024/08/457096557_840965204768940_1127928167187173741_n.jpg?resize=540%2C960&ssl=1)
![](https://i0.wp.com/www.ludunwayoo.com/wp-content/uploads/2024/08/456513106_840965158102278_1652255438027957995_n.jpg?resize=720%2C960&ssl=1)
ရဲလုပ်ငန်းအားစိတ်ဝင်စားသည့် လူငယ်များကို စိစစ်ရွေးချယ်ပြီး အခြေခံရဲသင်တန်းကို အမှတ်စဥ်(၁)မှ (၈)အထိ ၊ရဲအရာရှိသင်တန်း အမှတ်(၁)ကို အောင်မြင်စွာဖွင့်နိုင်ခဲ့ကြောင်း အသိပေးသည်။
ကရင်နီပြည်ရဲဌာနတွင် အဖွဲ့ဝင်အင်အား အမျိုးသား ၅၅၈ ဦးနှင့် အမျိုးသမီး ၁၈၀ဦးဖြင့် တရားဥပဒေစိုးမိုးရေး၊ပြည်သူ့ဝန်ဆောင်မှု နှင့် လုံခြုံရေးလုပ်ငန်းများ ဆောင်ရွက်နေကြောင်း အစီရင်ခံစာက ဆိုသည်။
စစ်ကောင်စီနှင့်သက်ဆိုင်သည့် အမှု၊လူသတ်မှု၊မုဒိမ်းမှု၊ခိုးမှု၊မူးယစ်ဆေးဝါးမှု၊မူးရစ်ရမ်းကားမှု ၊အိမ်တွင်းအကြမ်းဖက်မှုစသည့် အမှုများနှင့်ပတ်သက်ပြီး သုံးနှစ်တာကာလအတွင်း အမှုပေါင်း ၅၂၀ခု အရေးယူခဲ့ကြောင်း KSP က ဖော်ပြသည်။
ဖရူဆိုမြို့နယ်၊မိုဆိုကျေးရွာအနီး စစ်ကောင်စီ၏ အစုလိုက်၊ အပြုံလိုက်သတ်ဖြတ်ခဲ့သည်အမှု၊ပင်လောင်းမြို့နယ် နမ်းနိန်ကျေးရွာဘုန်ကြီးကျောင်း၌ သံဃာများနှင့် ဒေသခံများ ကို သတ်ဖြတ်မှု နှင့် စာသင်ကျောင်းများကို လေကြောင်းမှ ဗုံးကြဲမှုကြောင့် ကလေးငယ်များသေဆုံးရသည်ကို သက်သေအချက် အလက်များစုဆောင်းနိုင်ခဲ့ပြီး အမျိုးသားညီညွတ်ရေးအစိုးရ (NUG)နှင့်ချိတ်ဆက်ကာ နိုင်ငံ တကာအဖွဲ့အစည်းများနှင့် မီဒီယာများထံသို့ ချပြနိုင်ခဲ့ကြောင်းလည်း အသိပေးသည်။
နယ်မြေဒေသအကျယ်အဝန်းအရ ပြည်သူလူထုအားရဲဝန်ဆောင်မှု ပိုမိုပေးနိုင်ရန် အဖွဲ့ဝင်သစ်များလိုအပ်ချက် နှင့် လက်နက်ခဲယမ်းနည်းပါးမှု၊ရဲဝတ်တန်ဆာ၊နယ်မြေစိုးမိုးရေးအတွက် ယာဥ် လိုအပ်မှုများ အပါအဝင် တော်လှန်ရေးကာလ ဖြစ်သည့်အတွက် နယ်မြေစိုးမိုးမှုမရှိသောဒေသများတွင် ဖြစ်ပွာသည့် ရာဇဝတ်မှုများ၊စစ်ရာဇဝတ်မှုများ၊လူ့အခွင့်အရေးချိုးဖောက်မှုနှင့်ပတ်သတ်၍ သတင်းအချက်အလက်ရယူခြင်း သက်သေစုဆောင်းခြင်းနှင့် အခြားရဲလုပ်ငန်းများ လုပ်ကိုင်ရန်အခက်အခဲမှာ KSP ၏ စိန်ခေါ်မှုများဖြစ် သည်။
အာဏာရှင်စနစ်ကိုဆန့်ကျင်၍ ဖက်ဒရယ်စနစ်ကိုအခြေခံကာ လူထုကိုဗဟိုပြုပြီး ကရင်နီပြည် ကြား ကာလအုပ်ချုပ်ရေးကောင်စီ၏ လမ်းညွှန်မှုအောက်၌ တရားဥပဒေစိုးမိုးရေး၊လုံခြုံရေး၊ဝန်ဆောင်မှုများပေးရာတွင် ရေးဆွဲပြဌာန်းထားသည် ဥပဒေ၊နည်းဥပဒေများအပြင် ကမ္ဘာ့ ကုလသမဂ္ဂက၏အပြည်ပြည်ဆိုင်ရာလူ့အခွင့်အရေးကြေညာစာတမ်းကို လိုက်နာဆောင်ရွက် မည်ဟု KSPက ကတိပြုသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)