ဟန်နွေ/People’s Spring
ချင်းပြည်နယ် မင်းတပ်မြို့ရှိ ပြည်သူများနေအိမ်များကို စစ်ကောင်စီတပ်က ယခု စက်တင်ဘာအတွင်း မီးရှို့မှု ၄ကြိမ်ထက်မနည်း ပြုလုပ်ခဲ့ရာ ယင်းသို့ မီးရှို့ခံရသည့် နေအိမ်များတွင် မင်းတပ်ရဲစခန်းမှ ရဲနှစ်ဦး၏ နေအိမ်များ လည်း ပါဝင်ကြောင်း ဒေသခံက ပြောသည်။
စက်တင်ဘာ ၂၆ရက် မင်းတပ်မြို့ အရှေ့ပြင် နမ့်ထာရပ်ကွက်ရှိ ပြည်သူနေအိမ်များကို စစ်ကောင်စီတပ်များက မီးရှီု့ခဲ့ရာ နေအိမ် ၁၀လုံးခန့် မီးလောင်ခဲ့ကြောင်း အသိပေးသည်။ ထို့ပြင် မင်းတပ်မြို့ ရဲစခန်း ခေါနူးရိပ်သာလမ်းမှ ပြည်သူ့ နေအိမ်အချို့ကိုလည်း စစ်ကောင်စီက မီးရှို့ခဲ့သည်ဟု ဆိုသည်။
” ယခု မီးလောင်သွားသည့်နေအိမ်များတွင် မင်းတပ်ရဲစခန်းထဲရှိ ချင်းရဲတပ်သား ၂ဦး၏ နေအိမ် ၂အိမ် လည်း ပါဝင်ကြောင်း သိရပါတယ်။ မြို့ထဲ ကျန်ရှိနေသော ပြည်သူများမှ မီးငြှိမ်းသတ်ရန် ကြိုးစားကြသော်လည်း မည်သူ့ကိုမှ အိမ်ပြင်ထွက်ခွင့် မပေးဘဲ ဂန်းဖြင့် ရမ်းသန်း ပစ်ခတ်နေကြတယ်လို့ ကြားသိရပါတယ်”ဟု မင်းတပ်ဒေသခံက လူမှုကွန်ရက်တွင် ရေးသားအသိပေးထားသည်။
Public Service Announcement
နေအိမ် မီးရှို့ခံရမှုကြုံခဲ့ရသည့် ရဲတပ်သား ၂ဦးသည် လက်ရှိ စစ်ကောင်စီလက်အောက်တွင် တာဝန်ထမ်းဆောင်နေဆဲ ရဲများဖြစ်သည်ဟုလည်း မင်းတပ်ဒေသခံက People’s Spring ၏ မေးမြန်းမှုကို အတည်ပြုပေးသည်။
စစ်ကောင်စီတပ်သည် စက်တင်ဘာ ၂၇ရက်တွင်လည်း စစ်ကောင်စီတပ်သည် မင်းတပ်မြို့ အရှေ့ပြင် မြို့ဦးဘုန်းကြီးကျောင်းအနီးပြည်သူ့နေအိမ် ၃လုံးကို စစ်ကောင်စီနှင့် ရဲများက ထပ်မံမီးရှို့ခဲ့သည်ဟု ဒေသခံက အသိပေးသည်။
” ယခု ကာလအတွင်း အကြမ်းဖက် စကစ တပ်သားများမှ မင်းတပ်မြို့ပေါ်အတွင်းရှိ ပြည်သူ့နေအိမ်ပေါင်း ၅၀ဝန်းကျင်ခန့်ကို မီးရှို့ဖျက်ဆီးခဲ့ကြပါတယ်”ဟု မင်းတပ်ဒေသခံက ဆိုသည်။
စစ်ကောင်စီတပ်သည် မေလကုန်ပိုင်းက ဖြစ်ပွားခဲ့သည့် တီးတိန်မြို့တိုက်ပွဲတွင်လည်း တီးတိန်မြို့ပေါ်ရှိ ပြည်သူလူထု နေအိမ်များကို မီးရှိုခြင်းများပြုလုပ်ခဲ့ကြောင်း PDF Zolandတပ်ဖွဲ့ထံ အလင်းဝင်လာသည့် စစ်ကောင်စီတပ်သား ဟိန်းထက်ကိုကိုက ပြောပြသည်။
စစ်ကောင်စီတပ်သည် နေအိမ်များ မီးမရှို့မီ ပြည်သူလူထုပိုင် ပစ္စည်းများကို စိတ်ကြိုက်ယူဆောင်ခဲ့ကြောင်း၊ ထို့နောက် မီးရှို့ခဲ့ကြောင်း ၎င်းက ပြောသည်။ ထို့ပြင် တီးတိန်မြို့ပေါ်ရှိ ပုဂ္ဂလိကဘဏ်နှင့် ဖုန်းဆိုင်များကိုလည်း စစ်ကောင်စီတပ်နှင့် ရဲများက ဖောက်ထွင်းခဲ့ကြောင်း တီးတိန်အခြေစိုက် ခလရ(၂၆၉)တပ်မှ လက်နက် ၂လက်ယူလာပြီး အလင်းဝင်လာသည့် တပ်သား ဟိန်းထက်ကိုကိုက ပြောထားသည်။
မင်းတပ်မြို့နယ်တွင်မူ စစ်ကောင်စီက တိုက်ပွဲဖြစ်ပွားမှုမရှိဘဲ နေအိမ်များကို မီးလိုက်ရှို့နေခြင်းဖြစ်သည်ဟု ဒေသခံက ပြောသည်။
ထို့ပြင် စစ်ကောင်စီတပ်သည် မင်းတပ်မြို့ကို လေကြောင်းတိုက်ခိုက်မှုများ ယခုလအတွင်း အကြိမ်ကြိမ်ပြုလုပ်ခဲ့ပြီး လေကြောင်းမှ ခဲယမ်း ရိက္ခာ ဖြည့်တင်းခြင်းများလည်း အကြိမ်ကြိမ်ပြုလုပ်ခဲ့သည်။
ယနေ့ (စက်တင်ဘာ ၂၈ရက်)တွင် စစ်ကောင်စီက မင်းတပ် ခလရ(၂၇၄) တပ်ရင်းသို့ Y12 ထောက်ပို့လေယာဉ်ဖြင့် စားနပ်ရိက္ခာ နှင့် ခဲယမ်းများ ထပ်မံချပေးခဲ့သည်ဟုဆိုသည်။ စစ်ကောင်စီတပ်သည် ဩဂုတ် လကုန်ပိုင်းမှစ၍ မင်းတပ် ခလရ(၂၇၄) တပ်ရင်းသို့ လေယာဉ်အသုံးပြုကာ ခဲယမ်းရိက္ခာများ ဖြည့်တင်းနေခြင်းဖြစ်သည်။
