ရောင်နီ/People’s Spring
ရန်ကုန်မြို့ ကမ္ဘာအေးဘုရားအနီး လမ်းမတွင် ကွန်တိန်နာယာဉ်က ဓာတ်ကြိုးများချိတ်မိပြီးမောင်းနှင်ခဲ့သောကြောင့် ဓာတ်တိုင်များလဲကျ၍ လမ်းပိတ်ဆို့မှုဆိုးဆိုးရွားရွားဖြစ်ခဲ့ကြောင်း မျက်မြင်တွေ့ခဲ့သူများက ပြောသည်။
အောက်တိုဘာ ၃ ရက် နေ့လည် ၂ နာရီခွဲခန့်တွင် ရန်ကုန်မြို့အတွင်းမောင်းနှင်လာသည့် ကွန် တိန်နာယာဉ်သည် ဓာတ်ကြိုးများကို မလွတ်ပဲမောင်းနှင်ခဲ့သောကြောင့် ဓာတ်တိုင် ၉တိုင်အထိ လဲကျကာ ကားလေးစီးခန့် ပျက်စီးခဲ့ကြောင်းမျက်မြင်တွေ့ခဲ့တစ်ဦးက ပြောသည်။
Public Service Announcement
ယင်းဖြစ်စဉ်ကြောင့် နေ့လည်ပိုင်းမှစတင်၍ မြို့ထဲဘက်သို့ သွားသည့် လမ်းပိတ်ထားခဲ့ရာ ယာဉ်ကြောပိတ်ဆို့မှုဆိုးဆိုးရွားရွားဖြစ်ခဲ့ပြီး ည ၇ နာရီအထိ တရွေ့ရွေ့ဖြင့်သွားနေရဆဲဖြစ်ကြောင်း ယင်းနေရာအနီး၌နေထိုင်သူတစ်ဦးက ပြောသည်။
အဆိုပါဖြစ်စဉ်နှင့်ပတ်သက်၍ ကြိုးမလွတ်ပဲ မောင်းသည့် ကားသမားကို အပြစ်တင်သူများရှိသလို အချို့ကလည်း လျှပ်စစ်မီးကြိုးများနှင့်အတူ ဝိုင်ဖိုင်ကြိုးများကို အဆမတန် ချိတ်ဆက် ကြသောကြောင့် အလေးချိန်များကာ ဓာတ်တိုင် အများအပြားလဲကျခြင်းဖြစ်နိုင်ကြောင်း သုံးသပ်နေကြသည်။
ထို့အပြင် အချို့ကလည်း မြို့တွင်းလမ်းများတွင် ကွန်တိန်နာယာဉ်များကို ဖြတ်သန်းခွင့်မပေးဟုသာသိထားသောကြောင့် ကမ္ဘာအေးဘုရားလမ်းပေါ်၌ ကွန်တိန်နာယာဉ်မောင်းနှင်မှုအပေါ် မေးခွန်းထုတ်ထားကြသည်။
အဆိုပါဖြစ်စဉ်တွင် ဓာတ်တိုင်အများအပြားလဲကျခြင်းဖြစ်သောကြောင့် လျှပ်စစ်ဓာတ်အားပြတ်တောက်မှုများဖြစ်နိုင်ပြီး ရေပြတ်တောက်မှုများလည်း ဖြစ်နိုင်သည်ဟု သတိပေးသူများလည်းရှိသည်။
