ဒေါက်တာဇော်မြင့်မောင် မကွယ်လွန်မီ နာရီပိုင်းအလိုတွင်မှ လွတ်ငြိမ်းသက်သာခွင့်ပေးအပ်ခဲ့ခြင်းမှာ စစ်မှန်သောသနားကြင်နာမှုမဟုတ်ကြောင်း အီးယူသံရုံးထုတ်ပြန်

ထားအိ/People’s Spring

အာဏာသိမ်းစစ်ကောင်စီက ဒေါက်တာဇော်မြင့်မောင် မကွယ်လွန်မီ နာရီပိုင်းအလိုတွင်မှ လွတ်ငြိမ်းသက်သာခွင့်ပေးအပ်ခဲ့ခြင်းမှာ စစ်မှန်သော သနားကြင်နာမှုမဟုတ်ကြောင်း မြန်မာနိုင်ငံဆိုင်ရာ ဥရောပသမဂ္ဂ သံရုံးက ထုတ်ပြန်သည်။

ယနေ့(အောက်တိုဘာ ၇ရက်)နံနက်အစောပိုင်းတွင် ကွယ်လွန်ခဲ့သူ အမျိုးသားဒီမိုကရေစီအဖွဲ့ချုပ်(NLD)ပါတီ ဒုတိယဥက္ကဌ ဒေါက်တာဇော်မြင့်မောင်သည် မြန်မာ့ဒီမိုကရေစီအသွင်ကူးပြောင်းရေးကို လမ်းညွှန်ပေးခဲ့သည့် လူ့အခွင့်အရေးကို အထူးအလေးအနက်ထား ခုခံကာကွယ်ခဲ့သူတစ်ဦးဖြစ်ကြောင်း အီးယူသံရုံးက ဖော်ပြသည်။

မြန်မာနိုင်ငံဆိုင်ရာ ဥရောပသမဂ္ဂသံရုံးသည် ဒေါက်တာဇော်မြင့်မောင်၏ မိသားစုဝင်များ၊ မိတ်ဆွေများနှင့် ထပ်တူ ဝမ်းနည်းကြေကွဲရကြောင်း ဖော်ပြသည်။

Public Service Announcement

အသက်(၇၃)နှစ်အရွယ်တွင် ကွယ်လွန်ခဲ့သူ ဒေါက်တာဇော်မြင့်မောင်သည် ၂၀၂၁ ဖေဖော်ဝါရီ ၁ ရက် အာဏာသိမ်းမှုအပြီးတွင် စစ်အာဏာပိုင်းများက မမှန်ကန်သည့် နိုင်ငံရေးစွဲချက်များဖြင့် ထပ်မံဖမ်းဆီးခံရပြီး နှစ်ပေါင်းများစွာ လုံလောက်သည့် ဆေးကုသမှုကို မရရှိခဲ့ဘဲ ပြင်းထန်သော နာမကျန်းမှုဖြင့် ရုန်းကန်ခဲ့ရသည့် သူ၏ အကျဥ်းစံအခြေအနေသည် လွန်စွာ လူမဆန် ၊ အဆင့်နှိမ့်စွာ နေခဲ့ရကြောင်း အီးယူသံရုံးက ထုတ်ပြန်သည်။

ဒေါက်တာဇော်မြင့်မောင်သည် ၁၉၉၀ အထွေထွေရွေးကောက်ပွဲ၊ ၂၀၂၁ ကြားဖြတ်ရွေးကောက်ပွဲ၊ ၂၀၁၅ အထွေထွေရွေးကောက်ပွဲနှင့် ၂၀၂၀ အထွေထွေရွေးကောက်ပွဲ ရွေးကောက်ပွဲ ၄ကြိမ် ရွေးချယ်တင်မြှောက်ခံရပြီး ၂၀၁၅-၂၀၂၀ မန္တလေးတိုင်းဝန်ကြီးချုပ်အဖြစ် တာဝန်ထမ်းဆောင်ခဲ့သူဖြစ်သည်။

၁၉၉၀ အထွေထွေရွေးကောက်ပွဲအပြီးတွင် စစ်အစိုးရက တရားလက်လွတ်ဖမ်းဆီးခဲ့ပြီး ထောင်ဒဏ် ၂၅ နှစ်ချမှတ်ခံခဲ့ရသည်။ ဒေါက်တာဇော်မြင့်မောင်သည် အကျဥ်းထောင်များအတွင်း နှစ်ပေါင်း ၂၀ခန့် ဖြတ်သန်းခဲ့ရကာ ၂၀၀၉ ခုနှစ်တွင် ပြန်လည်လွတ်မြောက်လာခဲ့သည်။

ဥရောပသမဂ္ဂသည် မြန်မာပြည်သူများနှင့်အတူ ခိုင်မာစွာ ရပ်တည်လျက်ရှိပြီး ငြိမ်းချမ်းရေးနှင့် ပြန်လည် သင့်မြတ်ရေးတို့အတွက် မရှိမဖြစ် လိုအပ်ချက်များဖြစ်သည့် မတရားဖမ်းဆီး ထိန်းသိမ်းထားခြင်းခံရများအားလုံးကို ခြွင်းချက်မရှိ အမြန်ဆုံး ပြန်လွှတ်ပေးရန်နှင့် ဒီမိုကရေစီလမ်းကြောင်းပေါ်သို့ ပြန်လည်ရောက်ရှိရန် တောင်းဆို တိုက်တွန်းကြောင်း ယနေ့ ထုတ်ပြန်သည်။