Bu il yaddaşlarda həm də İlham Əliyevin “kadr islahatları” şousu silsiləsindən məmurlarla kabinetində keçirdiyi görüşlərlə qalacaq. Xatırlayarsınız, həmin görüşlərdən biri Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayevlə olmuşdu. Prezident bu vəzifəyə keçən il təyin etdiyi Rzayevi hüzuruna çağırıb yetərincə qədər sorğu-suala tutmuş, bu səhnəciyi də TV-lərdə yayımlayıb hamıya göstərmişdi. Prezident son illər məcburi köçkünlərlə bağlı görülən işlərdən danışıb, fəxrlə onlara ev tikintisi üçün 7 milyard vəsait xərcləndiyini demişdi. Əlavə etmişdi ki, ev tikintisi növbəti ildə də davam edəcək. Bundan sonra da görülən işlər haqqında komitə sədri hesabat vermişdi. Onun hesabatından bəlli olmuşdu ki, Sumqayıtda məcburi köçkünlər üçün 1250 ailəlik qəsəbənin tikintisi başlayıb və 20 hektara yaxın yeni ərazi ayrılıb. Gələn il üçün proqram işlənib və o proqram əsasında ölkənin müxtəlif bölgələrində qəsəbələr salınması planı var. Planı variantları baş tutacağı halda, birinci variantda 6989 ailənin, ikinci variantda 6934 ailənin, üçüncü variantda isə 7059 ailənin yerləşdirilməsi mümkün ola bilər. O görüşün yekunundan ortaya çıxan nəticə də bu olmuşdu ki, millət gözünü işğal olunan torpaqlardan çəkib otursun yerində. Hökumətin ölkə boyu yeni qaçqın qəsəbələri salmaq planı tam da bu gerçəklikdən xəbər verir.
Doğrusu, adamın ağlına bu vəzifəyə nədən Qarabağ bölgəsindən olan biri deyil, Bakıda doğulmuş Rövşən Rzayevin gətirilməsi sualı da gəlir? Amma komitə sədrinin dosyesində buna da aydınlıq gətirən bir məqam var. Milli Məclisin 4-cü çağırış üzrə deputatı olan komitə sədrinin atası, Bakı şəhərinin sabiq prokuroru Şükür Rzayev Qarabağ müharibəsi zamanı 24 gün əsirlikdə olub. R. Rzayev də sələfi Əli Həsənovun nəvəsi ölümlə nəticələnən qəza hadisəsi törədən zaman məsələyə ən sərt münasibət göstərməsi ilə gündəmə gəlib. O, Nail Allahverdiyevin qanun qarşısında cavab verməli olduğunu vacib saydığını vurğulayıb. Bu açıqlamasından bir müddət sonra da indiki vəzifəsinə təyin olunub. R. Rzayevin adı başqa nazirlər kimi böyük korrupsiya qalmaqallarında hallanmasa da, məlum komitədə işlərin yeyintisiz aparılmasının mümkünsüz olduğunu hər kəs bilir. Zaman-zaman mətbuatda çıxan rəqəmləri ortaya töküb araşdırsaq, Prezidentin bəhs etdiyi 7 milyard manatın yarısının mənimsənildiyi məlum olar. Bu qədər vəsaitlə tikilən evlər indiyə kimi kimlərə paylanıb ki, hələ də yataqxanalarda və kirayələrdə zülm çəkən yüzlərlə ailə var. O evlərin tamam başqa statuslu adamlara satıldığı haqqında da xeyli sayda şikayət var ortada. Məcburi köçkün şəhərciklərinin salınması son illər hakimiyyətin ən böyük yeyinti sahəsinə çevrilib. Hakimiyyətin yeni kadrı özünü bu yeyicilərdən necə qoruyacaq? Ümumiyyətlə, qoruya biləcək, yoxsa özü də onlardan birinə çevriləcək, onu da yaxında görərik.