စစ်ကိုင်းတိုင်း၊အရာတော်မြို့နယ်မြောက်ပိုင်းတွင်စစ်ကောင်စီတပ်ကရွာအတွင်းဝင်သည်နှင့်လက်နက်ကြီးများဖြင့် ပစ်ခတ်နေ၍ ကျေးရွာနှစ်ရွာမှ ပြည်သူများ ထွက်ပြေးတိမ်းရှောင်နေရကြောင်းဒေသခံများကပြောသည်။
အရာတော်မြို့နယ်မြောက်ပိုင်းသို့ စစ်ကြောင်းထိုးနေသော အကြမ်းဖက်စစ်တပ်သည်ယနေ့ (မေလ၂၉ ) မွန်းတည့် ၁၂ နာရီခန့်က ဟင်္သာကျေးရွာနှင့် လိန်လှကျေးရွာများ အနီးသို့ ရောက်ရှိလာပြီး လက်နက်ကြီးများဖြင့်ပစ်ခတ်ခဲ့ကြောင်း ဒေသခံများက ပြောသည်။
“စကစတွေက ရွာဝင်လာရင်ကို အရင်လက်နက်ကြီးတွေနဲ့ထုပါတယ်ဗျနောက်မီးရှို့ပါတယ်။ အရာတော်မြောက်နယ် အုပ်ရှစ်ကြီး ၊ လိမ်လှ စတဲ့ရွာတွေဘက်မှာဗျ”ဟု Ayadaw Bone Naing- A.B.N PDF အဖွဲ့ တာဝန်ရှိသူကပြောသည်။
ရွာခံပြည်သူများက နွားလှည်းများ၊ ဆိုင်ကယ်များ၊ ခြေလျင်အစရှိသဖြင့် ရုတ်တရက် တိမ်းရှောင်ထွက်ပြေးခဲ့ရကြောင်း၊ လူသားဒိုင်းအဖြစ်တွေ့ရာ ဒေသခံအချို့ကို ဖမ်းဆီးခေါ်လာပြီး လိန်လှရွာသား(၄)ဦး ဖမ်းဆီးခံထားရသည်ဟု သိရသော်လည်း အတည်မပြုနိုင်သေးကြောင်း အရာတော်ပို့စ်က ရေးသားထားသည်။
“အရာတော်မြောက်အရပ်တွေက လယ်ယာစိုက်ခင်းသမားတွေချည့်ပါ။ အနည်းဆုံးဆန်စပါး မျိူးစေ့ပေါင်းစုံဆုံးရှုံးနိုင်တယ်။ အကုန်လုံးပြေးနေရတယ်”ဟု အရာတော်နယ်ခံတစ်ဦးကပြောသည်။
အကြမ်းဖက်စစ်တပ်သည် ယမန်နေ့ကလည်း အရာတော် – ဒီပဲယင်းနယ်စပ်နှင့် အုပ်ရှစ်ကြီး၊ သစ်ချိုကျေးရွာများကို စီးနင်းမီးရှို့ဖျက်ဆီးခဲ့သေးသည်။
အရာတော်မြောက်ပိုင်းနယ်၌ အကြမ်းဖက်စစ်ကောင်စီစစ်ကြောင်းနှင့်ဒေသခံတော်လှန်ရေးအင်အားစုများထိတွေ့မှုဖြစ်ပွားလျက်ရှိသည်။
