မကွေးတိုင်း ထီးလင်းမြို့နယ် စင်းစယ်ကျေးရွာကို စစ်ကောင်စီတပ်က ဒုတိယအကြိမ်မီးရှို့ဖျက်ဆီးခဲ့ရာ လူနေအိမ် ၁၂လုံးနှင့် စပါးတင်း ၅၀၀ သိုလှောင်ထားသည့် အဆောက်အဦတစ်လုံး မီးလောင်ပျက်စီးခဲ့ရကြောင်း ထီးလင်းမြို့နယ် ပြည်သူ့ကာကွယ်ရေးတပ်(PDF)က ယမန်နေ့တွင် သတင်းထုတ်ပြန်သည်။
မုံရွာ (နမခ)မှ ပုလဲ-မင်းတိုင်ပင်-ကျော-ရေမျက်နီ-ခေါင်းတုံ လမ်းအတိုင်း လမ်းဘေးရွာများကိုမီးရှို့ဖျက်ဆီး၍ ဂန့်ဂေါမြို့သို့တက်သွားသော စစ်ကောင်စီယာဉ်တန်းသည် ဇွန်လ ၆ရက်တွင် ဂန့်ဂေါမှ ကျောမြို့သို့ ပြန်လည်ထွက်ခွာလာပြီး စင်းစယ်ကျေးရွာသို့ ဝင်ရောက်ကာ လူနေအိမ်များမှ စားနပ်ရိက္ခာ ပစ္စည်းများရှာဖွေယူဆောင်ခြင်း၊ လူနေအိမ်များ စပါးကျီများ လမ်းဘေးတောများမှ လူနေတဲများအား လက်နက်ကြီးဖြင့်ထုခြင်း ၊ မီးရှို့ဖျက်ဆီးခြင်းများ ပြုလုပ်ခဲ့ခြင်း ဖြစ်သည်။
![ထီးလင်း PDF](https://i0.wp.com/www.ludunwayoo.com/wp-content/uploads/2022/06/285693154_397923372397121_3884000517214130564_n.jpg?resize=880%2C396&ssl=1)
![ထီးလင်း PDF](https://i0.wp.com/www.ludunwayoo.com/wp-content/uploads/2022/06/285746085_397923502397108_570510178265566099_n.jpg?resize=880%2C496&ssl=1)
စစ်ကောင်စီတပ်များ ပြန်လည်ထွက်ခွာသွားပြီးနောက် စင်းစယ်ကျေးရွာ ပြည်သူများနှင့်အတူ ထီးလင်း PDF ရဲဘော်များက မီးရှို့ဖျက်ဆီးခံ လူနေအိမ်များအား မီးငြိမ်းကူခြင်း၊ ပစ္စည်းများပြောင်းရွေ့ကူခြင်း၊ မီးငြိမ်းနေသော ပြည်သူများ၏ လုံခြုံရေးအတွက် ရှေ့ကင်း၊နောက်ကင်းများယူ၍ အကာ အကွယ်ပေးခြင်းလုပ် ဆောင်ခဲ့ပြီး စစ်ဘေးရှောင်ပြည်သူများ၏ စားနပ်ရိက္ခာအတွက် အနီးအနားရွာများမှ အကူအညီတောင်းခံပေးခဲ့ကြောင်း အသိပေးထားသည်။
ထို့ပြင် ကျန်းမာရေးစောင့်ရှောက်မှုများပေးနိုင်ရန်အတွက်စီစဥ်ပေးခဲ့သည်ဟု ထီးလင်း PDFက ထုတ်ပြန် သည်။
![ထီးလင်း PDF](https://i0.wp.com/www.ludunwayoo.com/wp-content/uploads/2022/06/286670097_397923399063785_4224033962072469441_n.jpg?resize=880%2C396&ssl=1)
![ထီးလင်း PDF](https://i0.wp.com/www.ludunwayoo.com/wp-content/uploads/2022/06/285450026_397923445730447_5916949701835911516_n.jpg?resize=880%2C396&ssl=1)
![ထီးလင်း PDF](https://i0.wp.com/www.ludunwayoo.com/wp-content/uploads/2022/06/286380791_397923545730437_3106812834908010995_n.jpg?resize=880%2C496&ssl=1)
စစ်ကောင်စီတပ်သည် ယခင်ကလည်း စင်းစယ်ရွာကို ဝင်ရောက်မီးရှို့ခဲ့ဖူးပြီး ယခုသည် ဒုတိယအကြိမ်မီးရှို့ခံရခြင်းဖြစ်သည်ဟု ဖော်ပြထားသည်။
စစ်ကောင်စီတပ်များသည် ပြည်သူလူထုနေအိမ်များကို မီးရှို့ဖျက်ဆီးမှုများ ဆက်တိုက်ပြုလုပ်လျက်ရှိရာ မေလအတွင်းက မကွေးတိုင်းရှိ အိမ် ၁,၀၀၀ နီးပါးနှင့် စစ်ကိုင်းတိုင်းမှ အိမ်ခြေ ၆,၃၀၀ ကျော် အပါအဝင် အိမ်ခြေ ၇,၀၀၀ကျော် မီးလောင်ပျက်စီးခဲ့ရကြောင်း Data for Myanmarက သတင်းထုတ်ပြန်သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)