ကော်သူးလေအုပ်ချုပ်နယ်မြေအတွင်း ဒေသခံတချို့ဆီကနေ ငှက်ဖျားရောဂါစစ်ဆေးတွေ့ရှိနေတယ်လို့ ကေအဲန်ယူ-ဖားအံခရိုင်က သတင်းထုတ်ပြန်ထားပါတယ်။
အခုရက်ပိုင်းထဲ မိုးအဆက်မပြတ်ရွာသွန်းမှုကြောင့် ကေအဲန်ယူ-ဖားအံခရိုင် မော်ပယ်ခို့ကျေးရွာအနီးတစ်ဝိုက်မှာရှိတဲ့ ဒေသခံတွေတချို့ဟာ အအေးမိချမ်းတုန်ပြီး အဖျားကြီးတာ၊ ချွေးထွက်တာ၊ ခေါင်းကိုက်တာ စတဲ့ ငှက်ဖျားရောဂါလက္ခဏာတွေနဲ့ အများအားဖြင့် ဆေးခန်းလာပြတယ်လို့ ဒေသခံဆရာမတစ်ဦးက ဆိုပါတယ်။
“အများစုက ကျောင်းသားတွေပေါ့နော်။ ချမ်းတုန်ပြီးတော့ အဖျားကြီးပြီးရောက်လာတာ မနေ့ကစစ်ကြည့်တော့ ၃ယောက်တွေ့တယ်။ကျောင်းသားနှစ်ယောက်ရယ်၊ ရွာသားတစ်ယောက်ရယ်ပေါ့” လို့ ဒေသခံဆရာမက ဆိုပါတယ်။
ငှက်ဖျားရောဂါခံစားနေရတဲ့ ရွာသားတစ်ဦးကတော့ “မဲတရေ့မှာ အလုပ်လုပ်နေတယ်။ ရွာပြန်ရောက်ပြီး ညတွင်းခြင်း ချမ်းတုန်ပြီးဖျားတယ်။ ပါရာသောက်တယ်။ နောက်သုံးရက်နေတော့ မခံမရပ်နိုင်လောက်အောင် အဖျားကြီး ခေါင်းကိုက်နေတော့ ဆေးခန်းလာပြတယ်။ ဆရာမ စစ်ကြည့်တော့ ငှက်ဖျားရောဂါတွေ့တယ်။ ဆရာမက ဖြူရော်ဖြူဖတ် ဖြစ်နေတယ်ဆိုလို့ ဆေးလုံးကြီးချိတ်ပေးတယ်။ ဆေးခန်းမှာ တစ်ညအိပ်ရတာပေါ့” လို့ ပြောပါတယ်။
လက်ရှိဖြစ်ပွားနေတဲ့ ငှက်ဖျားရောဂါကို အစုလိုက်အပြုံလိုက်မဖြစ်ရလေအောင် ခြင်းဖြန်းစက်ကြီးတွေ၊ ဆေးဝါးထောက်ပံ့စီမံမှု၊ ငှက်ဖျားရောဂါအသိပညာပေးမှုတွေကို မော်ပယ်ခို့ကျေးရွာအနီးတဝိုက်က ဒေသခံတွေက အကူအညီလိုအပ်လျက်ရှိနေတယ်လို့ ကေအဲန်ယူ-ဖားအံခရိုင် သတင်းစဉ်ရဲ့ ထုတ်ပြန်ထားချက်အရ သိရပါတယ်။
