မြန်မာနိုင်ငံသားသုံးဦးကို တောင်ကိုရီးယား၌ နိုင်ငံရေးခိုလှုံခွင့်ရရှိရေးအတွက် ကူညီဆောင်ရွက်ပေးခဲ့ကြောင်း NUG ကိုယ်စားလှယ်ရုံးက သတင်းထုတ်ပြန်သည်။
ဇွန်လအစောပိုင်းတွင် မြန်မာအမျိုးသားနှစ်ဦးနှင့် အမျိုးသမီးတစ်ဦးတို့သည် အင်ချွန်းလေဆိပ်မှတဆင့် ဝင်ရောက်ကာ နိုင်ငံရေးခိုလှုံခွင့်လျှောက်ထားခဲ့သော် လည်း တောင်ကိုရီးယားလူဝင်မှုကြီးကြပ်ရေးဌာနက အကြောင်းပြချက်မခိုင်လုံဟုဆိုကာ မိခင်နိုင်ငံသို့ ပြန်ပို့ရန်စီစဉ်ခဲ့ကြောင်း ထုတ်ပြန်ချက်၌ ဖော်ပြသည်။
သို့သော် အဆိုပါ မြန်မာနိုင်ငံသား သုံးဦးသည် တောင်ကိုရီးယားနိုင်ငံဆိုင်ရာ NUGကိုယ်စားလှယ်ရုံးတာဝန်ရှိသူများနှင့်ဆက်သွယ်ကာ အကူအညီတောင်းခံခဲ့သဖြင့် ၎င်းတို့ နိုင်ငံရေးခိုလှုံခွင့် ရရှိရေးအတွက် NUG ကိုယ်စားလှယ်ရုံးက ဆောင်ရွက်ပေးခဲ့သည်။
နိုင်ငံရေးခိုလှုံသူများအား ကူညီပေးနေသည့် APILရှေ့နေအဖွဲ့၊ မြန်မာအလုပ်သမားလူမှုဖူလုံရေးစင်တာ (ကိုရီးယား)၊ မြန်မာ့ငြိမ်းချမ်းရေးနှင့် ဒီမိုကရေစီအရေးအတွက် ကိုရီးယားလွှတ်တော်အမတ်များအဖွဲ့တို့နှင့် ပူးပေါင်း၍ ကူညီဆောင်ရွက်ပေးခဲ့ကြောင်း ထုတ်ပြန်ချက်၌ ဖော်ပြ သည်။
ထိုသို့ သက်ဆိုင်ရာအဖွဲ့အစည်းများ၏ ပူးပေါင်းဆောင်ရွက်မှုကြောင့် ယနေ့(ဇွန် ၁၆ ရက်) မွန်းလွဲပိုင်းတွင် တောင်ကိုရီးယားလူဝင်မှုကြီးကြပ်ရေးဌာနက မြန်မာနိုင်ငံသား သုံးဦးကို နိုင်ငံရေးခိုလှုံခွင့်ပေးခဲ့ကြောင်း NUG ကိုယ်စားလှယ်ရုံးက ထုတ်ပြန်သည်။
